Попередня       Головна       Наступна

ЖИТИЕ ПРЕПОДОБНААГО ОТЬЦА НАШЕГО ФЕОДОСИЯ, ИГУМЕНА ПЕЧЕРЬСКАГО

Господи, благослови отьче.

Благодарю тя, владыко мой, господи Иисусе Христе, яко съподобилъ мя еси недостойнааго съповЂдателя быти святыимъ твоимъ въгодьникомъ, се бо испьрва писавъшю ми о житие и о погублении и о чюдесЂхъ святою и блаженою страстотрьпьцю Бориса и ГлЂба, понудихъ ся и на другое исповЂдание приити, еже выше моея силы, ему же и не бЂхъ достоинъ — грубъ сы и неразумичьнъ. Къ симъ же яко и не бЂхъ ученъ никоеиждо хытрости, нъ въспомянухъ, господи, слово твое, рекъшее: «Аще имате вЂру яко и зьрно горущьно и речете горЂ сей: преиди и въврьзися въ море, и абие послушаеть васъ». Си на умЂ азъ грЂшьный Нестеръ приимъ и оградивъся вЂрою и упованиемь, яко вься възможьна отъ тебе суть, начатъкъ слову списания положихъ, еже о житии преподобнааго отьца нашего Феодосия, бывъша игумена манастыря сего святыя владычицЂ нашея богородицЂ, его же и день усъпение нынЂ праздьнующе память творимъ. Се же якоже, о братие, въспоминающю ми житие преподобнааго, не сущю же съписану ни отъ кого же, печалию по вься дни съдрьжимъ бЂхъ и моляхъся богу, да съподобить мя по ряду съписати о житии богоносьнааго отьца нашего Феодосия. Да и по насъ сущеи чьрноризьци, приимьше писание и почитающе ú, тако видяще мужа доблесть, въсхвалять бога, и въгодника его прославляюще, на прочия подвигы укрЂпляються, наипаче же яко и въ странЂ сей такъ сий мужь явися и угодьникъ божий. О семь бо и самъ господь пророче: «Яко мнози приидуть отъ въстокъ и западъ и възлягуть съ Авраамъмь и съ Исакъмь и Ияковъмь въ царствии небесьнЂмь» и пакы: «Мнози будуть послЂдьнии пръвии», ибо сии послЂдьнии вящии прьвыхъ отьць явися, житиемь бо подражая святааго и пьрвааго начальника чьрьньчьскууму образу, великааго мЂню Антония чьрньчьскууму образу. И се же чюдьнЂе, якоже пишеть въ отьчьскыихъ книгахъ: «Слабу быти послЂдьнюму роду»; сего же Христосъ въ послЂдьниимь родЂ семь такого себе съдЂльника показа и пастуха инокыимъ, бЂ бо измолода житиемь чистъмь украшенъ, добрыими дЂлесы, вЂрою же и съмыслъмь паче. Его же нынЂ отъсюду уже начьну съповЂдати еже отъ уны вьрсты житие блаженааго Феодосия.

Нъ послушайте, братие, съ вьсяцЂмь прилежаниемь, испълнь бо есть пользы слово се вьсЂмъ послушающиимъ. Молю же вы, о възлюблении: да не зазьрите пакы грубости моей, съдрьжимъ бо сый любъвию еже къ преподобьнууму, сего ради окусихъся съписати вься си яже о святЂмь, къ симъ же и блюдый, да не къ мнЂ речено будеть: «Зълый рабе лЂнивый, подобаше ти дати сребро мое тържьникомъ, и азъ пришед быхъ съ лихвою истязалъ е». ТЂмьже якоже и нЂсть лЂпо, братие, таити чюдесъ божиих наипаче богу рекъшюуму ученикомъ своимъ: «Яко еже глаголю вамъ въ тьмЂ, повЂдите на свЂтЂ и еже въ уши слышасте, проповЂдите въ домъхъ». Си на успЂхъ и на устроение бесЂдующимъ съписати хощю, и о сихъ бога славяще, мьзды отдание приимете. Хотящю же ми исповЂдати начати, преже молюся господеви, глаголя сице: «Владыко мой, господи вьседрьжителю, благымъ подателю, отче господа нашего Исус Христа, прииди на помощь мнЂ и просвЂти сьрдце мое на разумЂние заповЂдий твоихъ и отвьрзи устьнЂ мои на исповЂдание чюдесъ твоихъ и на похваление святааго въгодника твоего, да прославиться имя твое, яко ты еси помощьникъ всЂмъ уповающимъ на тя въ вЂкы. Амин».

Градъ есть отстоя отъ Кыева, града стольнааго, 50 попьрищь, именемь Васильевъ. Въ томь бЂста родителя святаго въ вЂрЂ крьстияньстЂй живуща и всячьскыимь благочьстиюмь укршена. Родиста же блаженаго дЂтища сего, таче въ осмый дьнь принесоста и́ къ святителю божию, якоже обычай есть крьстияномъ, да имя дЂтищю нарекуть. Прозвутеръ же, видЂвъ дЂтища и сьрьдьчьныма очима прозьря, еже о немь, яко хощеть измлада богудатися, Феодосиемь того нарицаетъ. Таче же, яко и минуша 40 дьний дЂтищю, крьщениемь того освятиша. Отроча же ростяше, кърмимъ родителема своима, и благодать божия съ нимь, и духъ святый измлада въселися въ нь.

Къто исповЂсть милосьрьдие божие! Се бо не избьра отъ премудрыхъ философъ, ни отъ властелинъ градъ пастуха и учителя инокыимъ, нъ — да о семь прославиться имя господне — яко грубъ сы и невЂжа премудрЂй философъ явися. О утаения тайно! Яко отнюдуже не бЂ начаятися, оттудуже въсия намъ деньница пресвЂтла, якоже отъ всЂхъ странъ видЂвъше свьтЂние ея, тещи к ней, вся презрЂвъше, тоя единоя свЂта насытитися. О благости божия! Еже бо испьрва мЂсто назнаменавъ и благословивъ, пажить створи, на немь же хотяше паствитися стадо богословесьныхъ овьць донъдеже пастуха избьра.

Бысть же родителема блаженаго преселитися въ инъ градъ Курьскъ нарицаемый, князю тако повелЂвъшю, паче же реку — богу сице изволивъшю, да и тамо добляаго отрока житие просияеть, намъ же, якоже есть лЂпо, отъ въстока дьньница възидеть, събирающи окрьстъ себе ины многы звЂзды, ожидающи солнца правьдьнааго, Христа бога, и глаголюща: се азъ, владыко, и дЂти яже въспитахъ духовьнымь твоимь брашьнъмь; и се, господи, ученици мои, се бо сия ти приведохъ, иже научихъ вся житийская презрЂти и тебе, единого бога и господа, възлюбити. Се, о владыко, стадо богословесьныхъ твоихъ овьць, и имъ же мя бЂ пастуха створилъ и еже упасохъ на бъжьствьнЂй твоей пажити, и сия ти приведохъ, съблюдъ чисты и непорочьны. Таче господь къ нему: «Рабе благый, верьне умноживый преданый талантъ, тЂмьже приими уготованый тебе вЂньць и въниди въ радость господа своего». И къ ученикомъ его речеть: «ПридЂте, благое стадо, добляаго пастуха богословесьная овьчата, иже мене ради алкавъше и трудивъшеся приимЂте уготованое вамъ царствие от съложения миру».

ТЂмьже и мы, братие, потъщимъся рьвьнителе быти и подражателе житию преподобьнааго Феодосия и ученикомъ его, ихъ же тогда предъ собою къ господу посла, да тако сподобимъся слышати, гласъ он, еже отъ владыкы и вседрьжителя речеться: «ПридЂте убо, благословлении отьца моего, приимЂте уготованое вамъ царствие».

Мы же пакы поидемъ на прьвое исповЂдание святааго сего от, рока. Растый убо тЂлъмь и душею влекомъ на любъвь божию, и хожаше по вся дьни въ цьркъвь божию, послушая божьствьныхъ книгъ съ всЂмь въниманиемь. Еще же и къ дЂтьмъ играющимъ не приближашеся, якоже обычай есть унымъ, нъ и гнушашеся играмъ ихъ. Одежа же его бЂ худа и сплатана. О семь же многашьды родителема его нудящема и́ облещися въ одежю чисту и на игры съ дЂтьми изити. Онъ же о семь не послушааше ею, нъ паче изволи быти яко единъ от убогыхъ. Къ симъ же и датися веля на учение божьствьныхъ книгъ единому от учитель; якоже и створи. И въскорЂ извыче вся граматикия, и якоже всЂмъ чюдитися о премудрости и разумЂ дЂтища и о скорЂмь его учении. Покорение же его и повиновение къто исповЂсть, еже сътяжа въ учении своемь не тъкмо же къ учителю своему, нъ и къ всЂмъ учащимъся с ним?

Въ то же время отьць его житию коньць приятъ. Сущю же тъгда божьствьному Феодосию 13 лЂт. ОттолЂ же начатъ на труды паче подвижьнЂй бывати, якоже исходити ему съ рабы на село и дЂлати съ всякыимь съмЂрениемь. Мати же его оставляше ú, не велящи ему тако творити, моляше и́ пакы облачитися въ одежю свЂтьлу и тако исходити ему съ съвьрьстьникы своими на игры. Глаголаше бо ему, яко, тако ходя, укоризну себе и роду своему твориши. Оному о томь не послушаюшю ея, и такоже многашьды ей отъ великыя ярости разгнЂватися на нь и бити и, бЂ бо и тЂлъмь крЂпъка и сильна, якоже и мужь. Аще бо кто и не видЂвъ ея, ти слышааше ю бесЂдующю, то начьняше мьнЂти мужа ю суща.

Къ симъ же пакы божьствьный уноша мысляаше, како и кымь образъмь спасеться. Таче слыша пакы о святыхъ мЂстЂхъ, идеже господь нашь Иисусъ Христосъ плътию походи, и жадаше тамо походити и поклонитися имъ. И моляшеся богу, глаголя: «Господи Иисусъ Христе мой! Услыши молитву мою и съподоби мя съходити въ святая твоя мЂста и съ радостию поклонитися имъ». И тако многашьды молящюся ему, и се приидоша страньници въ градъ тъ, иже и видЂвъ я божьствьный уноша и радъ бывъ, текъ, поклонися имъ, и любьзно цЂлова я, и въпроси я, отъкуду суть и камо идуть. ОнЂмъ же рекъшемъ, яко отъ святыхъ мЂстъ есмъ, и, аще богу велящю, хощемъ въспять уже ити. Святый же моляше я, да и поимуть въ слЂдъ себе и съпутьника и́ сътворяют съ собою. Они же обЂщашася пояти и́ съ собою и допровадити и́ до святыхъ мЂстъ. Таче се слышавъ блаженыи Феодосий, еже обЂщашася ему, радъ бывъ, иде въ домъ свой. И егда хотяху страньнии отъити, възвЂстиша уноши свой отходъ. Онъ же, въставъ нощию и не вЂдущю никомуже, тай изиде из дому своего, не имый у себе ничсоже, раз†одежа, въ ней же хожаше, и та же худа. И тако изиде въ слЂдъ страньныхъ. Благый же богъ не попусти ему отъити отъ страны сея, его же и-щрева матерьня и пастуха быти въ странЂ сей богогласьныихъ овьць назнамена, да не пастуху убо отшьдъшю, да опустЂеть пажить, юже богъ благослови, и тьрние и вълчьць въздрастеть на ней, и стадо разидеться.

По трьхъ убо дьньхъ увЂдЂвъши мати его, яко съ страньныими отъиде, и абие погъна въ слЂдъ его, тъкъмо единого сына своего поимъши, иже бЂ мьний блаженааго Феодосия. Таче же, яко гънаста путь мъногъ, ти тако пристигъша, яста и́, и отъ ярости же и гнЂва мати его имъши и́ за власы, и поврьже и́ на земли, и своима ногама пъхашети и́, и страньныя же много коривъши, възвратися въ домъ свой, яко нЂкоего зълодЂя ведущи съвязана. Тольми же гнЂвъмь одрьжима, яко и въ домъ ей пришьдъши, бити и́, дондеже изнеможе. И по сихъ же, въведъши ú въ храмъ и ту привяза ú, и затворьши, и тако отъиде. Божьствьный же уноша вься си съ радостию приимаше, и бога моля, благодаряше о вьсЂхъ сихъ. Таче пришедъши мати его по двою дьнию отрЂши и́ и подасть же ему ясти, еще же гнЂвъмь одьржима сущи, възложи на нозЂ его желЂза, ти тако повелЂ ему ходити, блюдущи, да не пакы отъбЂжить отъ нея. Тако же сътвори дьни мъногы ходя. По томь же пакы умилосрьдивъшися на нь, нача съ мольбою увЂщавати и́, да не отъбЂжить отъ нея, любляше бо и́ зЂло паче инЂхъ и того ради не тьрпяше без него. Оному же обЂщавъшюся ей не отъити отъ нея, съня желЂза съ ногу его, повелЂвъши же ему по воли творити, еже хощеть. Блаженый же Феодосий на прьвый подвигъ възвратися и хожаше въ цьркъвь божию по вся дьни. Ти видяше, яко многашьды лишаемЂ сущи литургии, проскурьнааго ради непечения, жаляшеси о томь зЂло и умысли же самъ своимь съмЂрениемь отълучитися на то дЂло. Еже и сътвори: начатъ бо пещи проскуры и продаяти, и еже аще прибудяше ему къ цЂнЂ, то дадяше нищимъ. ЦЂною же пакы купяше жито и, своима рукама измълъ, пакы проскуры творяше. Се же тако богу изволивъшю, да проскуры чисты приносяться въ цьркъвь божию отъ непорочьнаго и несквьрньнааго отрока. Сице же пребысть двЂнадесяте лЂтЂ или боле творя. Вьси же съврьстьнии отроци его ругающеся ему, укаряхути и́ о та ковЂмь дЂлЂ, и тоже врагу научающю я. Блаженый же вься си съ радостию приимаше, съ мълчаниемь и съ съмЂрениемь.

Ненавидя же испьрва добра золодЂй врагъ, видя себе побЂжаема съмЂрениемь богословесьнааго отрока, и не почиваше, хотя отъвратити и́ отъ таковаго дЂла. И се начатъ матерь его поущати, да ему възбранить отъ таковааго дЂла. Мати убо, не тьрпящи сына своего въ такой укоризнЂ суща, и начатъ глаголати съ любъвию к нему: «Молю ти ся, чадо, останися таковааго дЂла, хулу бо наносиши на родъ свой, и не трьплю бо слышати отъ вьсЂхъ укаряему ти сущю о таковЂмь дЂлЂ. И нЂсть бо ти лЂпо, отроку сущю, таковааго дЂла дЂлати». Таче съ съмЂрениемь божьствьный уноша отъвЂщавааше матери своей, глаголя: «Послушай, о мати, молю ти ся, послушай! Господь бо Иисусъ Христосъ самъ поубожися и съмЂрися, намъ образъ дая, да и мы его ради съмЂримъся. Пакы же поруганъ бысть и опльванъ и заушаемъ, и вься претьрпЂвъ нашего ради спасения. Кольми паче лЂпо есть намъ трьпЂти, да Христа приобрящемъ. А еже о дЂлЂ моемь, мати моя, то послушай: егда господь нашь Иисусъ Христосъ на вечери възлеже съ ученикы своими, тъгда приимъ хлЂбъ и благословивъ и преломль, даяше ученикомъ своимъ, глаголя: «ПриимЂте и ядите, се есть тЂло мое, ломимое за вы и за мъногы въ оставление грЂховъ». Да аще самъ господь нашь плъть свою нарече, то кольми паче лЂпо есть мнЂ радоватися, яко съдЂльника мя съподоби господь плъти своей быти». Си слышавъши мати его и чюдивъшися о премудрости отрока и отътолЂ нача оставатися его. Нъ врагъ не почиваше, остря ю на възбранение отрока о таковЂмь его съмЂрении. По лЂтЂ же единомь пакы видЂвъши его пекуща проскуры и учьрнивъшася от ожьжения пещьнаго, съжалиси зЂло, пакы начатъ оттолЂ бранити ему овогда ласкою, овогда же грозою, другоици же биющи и́, да ся останеть таковаго дЂла. Божьствьный же уноша въ скърби велицЂ бысть о томь, и недъумЂя, чьто створити. Тъгда же, въставъ нощию отай изиде из дому своего, и иде въ инъ градъ, не далече сущь оттолЂ, и обита у прозвутера, и дЂлааше по обычаю дЂло свое. Потомь же мати его, яко его искавъши въ градЂ своемь и не обрете его, съжалиси по немь. Таче... по дьньхъ мнозЂхъ слышавъши, къде живеть, и абие устрьмися по нь съ гнЂвъмь великъмь, и пришедъши въ прежереченый градъ и, искавъши, обрете и́ въ дому презвутерове, и имъши, влечаше и́ въ градъ свой биющи. И въ домъ свой приведъши и запрети ему, глаголющи, яко «къ тому не имаши отити мене; елико бо аще камо идеши, азъ.шедъши и обрЂтъши тя, съвязана биющи приведу въ сий градъ». Тъгда же блаженый Феодосий моляшеся богу, по вся дьни ходя въ цьркъвь божию, бЂ же съмЂренъ сьрьдцьмь и покоривъ къ вьсЂмъ.

Якоже и властелинъ града того, видЂвъ отрока въ такомь съмерении и покорении суща, възлюби и́ зЂло и повелЂ же ему, да пребываеть у него въ цьркви, въдасть же ему и одежю свЂтьлу, да ходить въ ней. Блаженый же Феодосий пребысть въ ней ходя мало дьний, яко нЂкую тяжесть на собЂ нося, тако пребываше. Таче съньмъ ю, отдасть ю нищимъ, самъ же въ худыя пърты обълкъся, ти тако хожаше. Властелинъ же, видЂвы и́ тако ходяша, и пакы ину въдасть одежю, вящьшю пьрвыя, моля и́, да ходить въ ней. Онъ же съньмъ и ту отъда. Сице же многашьды сътвори, якоже судии то увЂдЂвъшю, большимь начатъ любити и́, чюдяся съмЂрению его. По сих же божьствьный Феодосий шедъ къ единому от кузньць, повелЂ ему желЂзо съчепито съковати, иже и възьмъ и препоясася имь въ чресла своя, и тако хожаше. ЖелЂзу же узъку сущю и грызущюся въ тЂло его, онъ же пребываше, яко ничсоже скьрбьна от него приемля тЂлу своему.

Таче, яко ишьдъшемъ дьньмъ мъногомъ и бывъшю дьни праздьничьну, мати его начать велЂти ему облещися въ одежю свЂтьлу на служение вьсЂмъ бо града того вельможамъ, въ тъ дьнь възлежащемъ на обЂдЂ у властелина. И повелЂно бЂ убо блаженууму Феодосию предъстояти и служити. И сего ради поущашети и́ мати его, да облечеться въ одежю чисту, наипаче же якоже и слышала бЂ, еже есть сътворилъ. Якоже ему облачащюся въ одежю чисту, простъ же сы умъмь неже блюдыйся ея. Она же прилЂжьно зьряаше, хотящи истЂе видЂти, и се бо видЂ на срачици его кръвь сущю от въгрызения желЂза. И раждьгъшися гнЂвъмь на нь, и съ яростию въставъши и растьрзавъши сорочицю на немь, биющи же и́, отъя желЂзо от чреслъ его. Божий же отрокъ, яко ничьсоже зъла приятъ от нея, обълкъся и, шедъ, служаше предъ възлежащими съ вьсякою тихостию.

Таче по времени пакы нЂкоторЂмь слыша въ святЂмь еуангелии господа глаголюща: «Аще кго не оставить отьца или матере и въ слЂдъ мене не идеть, то нЂсть мене достоинъ». И пакы: «ПридЂте къ мънЂ вьси тружающиеся и обременении, и азъ покою вы. ВъзьмЂте ярьмъ мой на ся и научитеся от мене, яко крътъкъ есмь и съмЂренъ сьрдьцьмь, и обрящете покой душамъ вашимъ». Си же слышавъ богодъхновеный Феодосий и раждьгъся божьствьною рьвьностшо и любъвию, и дышаниемь божиемь, помышляаше, како или кде пострЂщися и утаитися матере своея. По сълучаю же божию отъиде мати его на село, и якоже пребыти ей тамо дьни мъногы. Блаженый же, радъ бывъ, помоливъся богу, и изиде отай из дому, не имый у себя ничьсоже, раз†одежа, ти мало хлЂба немощи дЂля телесьныя. И тако устрьмися къ Кыеву городу, бЂ бо слышалъ о манастырихъ ту сущиихъ. Не вЂдый же пути, моляшеся богу, да бы обрЂлъ съпутьникы, направляюща и́ на путь желания. И се по приключаю божию бЂша идуще путьмь тЂмь купьци на возЂхъ съ бремены тяжькы. УвЂдЂвъ же я блаженый, яко въ тъ же градъ идуть, прослави бога и идяшеть въ слЂдъ ихъ издалеча, не являяся имъ. И онЂмъ же ставъшемъ на нощьнЂмь становищи, блаженый же не доида, яко и зьрЂимо ихъ, ту же опочивааше, единому богу съблюдающю и́. И тако идый трьми недЂлями доиде прежереченааго града. Егда же пришедъ и обьходи вся манастыря, хотя быти мнихъ и моляся имъ, да приятъ ими будеть. Они же видЂвъше отрока простость и ризами же худами облечена, не рачиша того прияти. Сице же богу изволивъшю тако, да на мЂсто, идеже бЂ бъгъмь от уности позъванъ, на то же ведешеся.

Тъгда же бо слышавъ о блаженЂмь Антонии, живущиимь въ пещерЂ, и окрилатЂвъ же умъмь устрьмися къ пещерЂ. И пришьдъ къ преподобьнуму Антонию, его же видЂвъ и, падъ, поклонися ему съ сльзами, моляся ему, да бы у него былъ. Великый же Антоний казаше и глаголя: «Чадо, видиши ли пещеру сию, скьрбьно суще мЂсто и тЂснЂйше паче инЂхъ мЂстъ. Ты же унъ сый, якоже мню, и не имаши трьпЂти на мЂстЂ семь скърби». Се же не тъкмо искушая и́ глаголаше, нъ и прозорочьныма очима прозря, яко тъ хотяше възгради: ти самъ мЂстъ то и манастырь славьнъ сътворити на събьрание множьству чьрньць. Богодъхновеный же Феодосий отвЂща ему съ умилениемь: «ВЂжь, чьстьный отьче, яко проразумьникъ всячьскыихъ богъ приведе мя къ святости твоей и спасти мя веля, тЂмьже, елико ми велиши сътворити, сътворю». Тъгда глагола ему блаженый Антоний: «Благословенъ богъ, чадо, укрЂпивый тя на се тъщание, и се мЂсто — буди въ немь».

Феодосий же, пакы падъ, поклонися ему. Таче благослови и́ старьць и повелЂ великому Никону острЂщи и́, прозвутеру тому сущю и чьрноризьцю искусьну, иже и поимъ блаженаго Феодосиа и по обычаю святыихъ отьць остригы и облече и́ въ мьнишьскую одежю.

Отьць же нашь Феодосий предавъся богу и преподобьнууму Антонию, и оттолЂ подаяшеся на труды телесьныя, и бъдяше по вся нощи въ славословлении божии, съньную тягость отвръгъ, къ въздьржанию же и плътию своею тружаяся, рукама дЂло свое дЂлая и въспоминая по вься дыш псалъмьское оно слово: «Вижь съмЂрение мое и трудъ мой и остави вься грЂхы моя». ТЂмь вьсь съ вьсЂмь въздьржаниемь душю съмЂряаше, тЂло же пакы трудъмь и подвизаниемь дручааше, яко дивитися преподобьнууму Антонию и великому Никону съмЂрению его, и покорению, и толику его въ уности благонравьству, и укрЂплению, и бъдрости. И вельми о вьсемь прослависта бога.

Мати же его много искавъши въ градЂ своемь и въ окрьстьнихъ градЂхъ и яко не обрете его, плакаашеся по немь лютЂ, биющи въ пьрси своя яко и по мрьтвЂмь. И заловЂдано же бысть по всей странЂ той, аще къде видЂвъше такого отрока, да пришьдъше възвЂстите матери его и велику мьзду приимуть о възвещении его. И се пришьдъше от Кыева и повЂдаша ей, яко преже сихъ 4 лЂт видЂхомы и́ въ нашемь градЂ ходяща и хотяща острЂщися въ единомь от манастыревъ. И то слышавъши она и не облЂнивъшися и тамо ити. И нимало же помьдьливъши, ни дълготы же пути убоявъшися въ прежереченый градъ иде на възискание сына своего. Иже и пришедъши въ градъ тъ, и обьходи вься манастыря, ищющи его. ПослЂди же повЂдаша ей, яко въ пещерЂ есть у преподобнааго Антония. Она же и тамо иде, да и́ тамо обрящеть. И се начатъ старьца льстию вызывати, глаголющи, яко да речете преподобьнууму да изидеть. «Се бо многъ путь гънавъши приидохъ, хотящи бесЂдовати къ тебе и поклонитися святыни твоей, и да благословлена буду и азъ от тебе». И възвЂщено бысть старьцю о ней, и се изиде къ ней. Его же видЂвъши и поклонися ему. Таче сЂдъшема има, начатъ жена простирати к нему бесЂду многу, послЂди же обави вину, ея же ради прииде. И глаголаше же: «Молю ти ся, отьче, повЂжь ми, аще сде есть сынъ мой. Много же си жалю его ради, не вЂдущи, аще убо живъ есть». Старьць же сый простъ умъмь и, не разумЂвъ льсти ея, глагола ей, яко «сде есть сынъ твой, и не жалиси его ради, се бо живъ есть». То же она къ нему: «То чьто, отьче, оже не вижю его? Многъ бо путь шьствовавъши, придохъ въ сий градъ, тъкмо же да вижю си сына своего, Ти тако възвращюся въ градъ свой». Старьць же к ней отъвЂща: «То аще хощеши видЂти и́ да идеши нынЂ въ домъ, и азъ, шедъ, увЂщаю и́, не бо рачить видЂти кого. Ти въ утрЂй дьнь пришедъши, видиши й». То же слышавъши, она отъиде, чающи въ приидущий дьнь видЂти и́. Преподобьный же Антоний, въшедъ въ пещеру, възвЂсти вся си блаженууму Феодосию, иже и́ слышавъ, съжалиси зЂло, яко не може утаитися ея. Въ другый же дьнь прииде пакы жена, старьць же много увЂщавааше блаженааго изити и видЂти матерь свою. Онъ же не въсхотЂ. Тъгда же старьць, ишьдъ, глагола ей, яко «много молихы и́, да изидеть къ тебе, и не рачить». Она же к тому уже не съ съмЂрениемь начатъ глаголати къ старьцю, съ гнЂвъмь великъмь въпияаше о нуже старьца сего, яко имый сына моего и съкрывый въ пещерЂ, не рачить ми его явити. «Изведи ми, старьче, сына моего, да си его вижю. И не трьплю бо жива быти, аще не вижю его! Яви ми сына моего, да не зълЂ умьру, се бо сама ся погублю предъ двьрьми печеры сея, аще ми не покажеши его». Тъгда Антоний, въ скърби велицЂ бывъ и въшедъ въ пещеру, моляаше блаженааго Антоний, да изидеть къ ней. Онъ же не хотя ослушатися старьца и изиде къ ней. Она же видЂвъши сына своего въ таковЂй скьрби суща, бЂ бо уже лице его измЂнилося отъ многааго его труда и въздьржания, и охопивъшися емь плакашеся горко. И одъва мало утЂшивъшися, сЂде и начатъ увЂщавати Христова слугу, глаголющи: «Поиди, чадо, въ домъ свой, и еже ти на потребу и на спасение души, да дЂлаеши въ дому си по воли своей, тъкмо же да не отълучайся мене. И егда ти умьру, ты же погребеши тЂло мое, ти тъгда възвратишися въ пещеру сию, якоже хощеши. Не трьплю бо жива быти не видящи тебе». Блаженый же рече къ ней: «То аще хощеши видЂти мя по вся дьни, иди въ сий градъ, и въшьдъши въ единъ манастырь женъ и ту остризися. И тако, приходящи сЂмо, видиши мя. Къ симъ же и спасение души приимеши. Аще ли сего не твориши, то — истину ти глаголю — к тому лица моего не имаши видЂти». СицЂми же и инЂми многыими наказани пребывааше по вся дьни, увЂщавая матерь свою. Онъй же о томь не хотящи, ни понЂ послушати его. И егда отъхожаше от него, тъгда блаженый, въшедъ въ пещеру, моляшеся богу прилЂжно о спасении матере своея и обращении сьрьдьца ея на послушание. Богъ же услыша молитву угодьника своего. О семь бо словеси рече пророкъ: «Близъ господь призывающиимъ въистину и волю боящимъся его творить, и молитву ихъ услышить, и спасеть я». Въ единъ бо дьнь пришьдъши мати ему глаголя: «Се, чадо, велимая вься тобою сътворю, и къ тому не възвращюся въ градъ свой, нъ яко богу волящю, да иду въ манастырь женъ, и ту остригъшися прочая пребуду дьни своя. Се бо от твоего учения разумЂхъ, яко ничтоже есть свЂтъ сий маловременьный». Си слышавъ, блаженый Феодосий въздрадовася духъмь и въшьдъ съповЂда великому Антонию, иже, и услышавъ, прослави бога, обративъшааго сьрьдце ея на такавое покаяние. И шьдъ къ ней и много поучивъ ю, еже на пользу и на спасение души, и, възвЂстивъ о ней княгыни, пусти ю въ манастырь женьскый, именуемъ святааго Николы. И ту постриженЂ ей быти, и въ мьнишьскую одежю облеченЂ ей быти, и поживъши же ей въ добръ исповЂдании лЂта многа, съ миръмь усъпе.

Се же житие блаженааго отьца нашего Феодосия отъ уны вьрсты до сде, дондеже прииде въ пещеру, мати же его съповЂда единому от братия, именьмь Феодору, иже бЂ келарь при отьци нашемь Феодосии. Азъ же от него вся си слышавъ, оному съповЂдающю ми, и въписахъ на память всЂмъ почитающимъ я. Обаче и на прочее съказание отрока исправления поиду, съврьшение же глаголъ ми укажеться благоисправляющю богу и словослову.

Сий убо отьць нашь Феодосий святый побЂдоносьць показася въ пещерЂ на злыя духы. По острижени же матере своея и по отврьжении всякоя мирьскыя печали большими труды паче наченъ подвизатися на рьвение божие. И бЂ видЂти свЂтила три суща въ пещерЂ разгоняща тьму бЂсовьскую молитвою и алканиемь: мЂню же преподобнааго Антония, и блаженааго Феодосия и великааго Никона. Си бЂша въ пещерЂ моляще бога, и богъ же бЂ съ ними; «иде бо, — рече, — 2 или трие съвъкуплени въ имя мое, ту есмь посредЂ ихъ».

Въ то же время иже бЂ прьвый у князя въ болярЂхъ имьньмь Иоан. И того сынъ часто прихожаше къ преподобьнымъ, наслажаяся медоточьныихъ тЂхъ словесъ, иже исхожааху изъ устъ отьць тЂхъ, и възлюби же я зЂло и яко въсхотЂти ему жити съ ними и вься презьрЂти въ житии семь, славу и богатьство ни въ что же положивъ. Прикосну бо ся емь слово господне, рекшее, «яко удобЂе есть вельбуду сквозЂ иглинЂ уши проити, нежели богату въ царствие небесное вънити». Тъгда же повЂда единому Антонию мысль свою, глаголя: «ХотЂлъ быхъ, отьче, аще богу годьно, мнихъ быти и жити съ вами». Глагола ему старьць: «Благо хотЂние твое, чадо, и помыслъ испълненъ благодати, нъ блюди, чадо, да не богатьство и слава мира сего възврати тя въспять. Господу рекъшю: «Никтоже възложь рукы своея на рало и зря въспять, управленъ есть въ царствии небеснЂмь», тако и мнихъ възвращаяся къ^-миру мыслию и пекыися о мирьскыхъ не имать управитися въ жизнь вЂчьную». И ина многа старьць бесЂдова къ отроку и оному же сьрьдце боле остряшеся на любъвь божию и тъгда отиде въ домъ свой.

И въ другый же дьнь одЂвъся въ одежю свЂтьлу и славьну и тако въсЂдъ на конь поеха къ старцю, и отроци бЂша окрестъ его едуще и другыя коня въ утвари ведуще пред ним, и тако въ сла†велицЂ приеха къ печерЂ отець тЂх. ОнЂмь же изшедшим и поклонившимся ему, якоже есть лЂпо велможам, он же пакы поклонися имъ до земля, потомь же снемъ съ себе одежу боляръскую и положи ю пред старцемь, и також коня, сущаа въ ютвари, и постави пред нимь, глаголя: «Се вся, отче, красьнаа прельсть мира сего суть, и якоже хощеши, тако сътвори о них, азъ бо уже вся си прЂзрЂх и хощу мних быти и с вами жити в печерЂ сей, и к тому не имам възвратитися в дом свой». Старець же рече к нему: «Блюди, чадо, къ кому обЂщаваешися и чий въинь хощеши быти, се бо невидимо предстоятъ аггели божии, приемлюще обЂщаниа твоя. Но егда како отець твой пришед съ многою властию и изведет тя отсюду, нам же не могущим помощи ти, ты же пред богом явишися, якож ложь и отмЂтникь его». И глагола ему отрок: «ВЂрую богу моему, отче, яко аще и мучити мя начнеть отець мой, не имам послушати его, еже възвратити мя къ миру. Молю же ти ся, отче, да въскорЂ острыжеши мя». Тогда повелЂ преподобный Антоние великому Никону, да пострижеть его и обличеть въ мнишескую одежю. Он же, по обычаю, молитвовавь, и остриже его, и въ мнишескыя ризы облече его, Варлаам имя тому нарекь.

Тогда же приде каженикъ нЂкто от княжа дому, иже бЂ любим князем и предръжа у него вся, и моляшеся старцю Антонию, и той хотя быти чръноризець. Его же поучивъ старець еже о спасении души, и предасть его Никону, да того острыжеть. Он же и того остригь, облече его въ мнишескую одеждю и ЕфрЂм имя тому нарекъ. НЂсть же лЂпо таити, еже нанесе врагь скръбь на преподобныя ею ради. Ненавидяй же добра врагь, да диаволъ, видя себе побЂждаема от святаго стада и разумЂвь, яко оттолЂ хотяше прославленно быти мЂсто то, плакашеся своея погыбели. Начат же злыми своими козньми раждизати сердце князю на преподобныя, да поне тако то святое стадо распудить, но ни тако възможе, но сам посрамлень бысть молитвами их и въпадеся въ яму, юже сътвори. «Обратится болЂзнь его на главу его и на верхъ его сниде неправда его».

И увЂдавь убо князь Изяславь бывшее о боляринЂ и о каженицЂ его, разгнЂвався зЂло и повелЂ единого от них привести пред ся, дръзнувша таковаа сътворити. И ту абие, скоро шедше, великаго Никона приведоша предо нь. Князь же, со гнЂвом възрЂв на Никона, глагола ему: «Ты ли еси остригый болярина и каженика без повелЂниа моего?». Никонъ же отвЂща: «Благодатию божиею азъ есмъ остригы их повелЂнием небеснаго царя и призвавшаго их Исуса Христа на таковый подвигь». Князь же рече то: «Или увЂщавь их в дом свой поити, или на заточение послю тя и сущаа с тобою, и печеру вашу раскопаю». К симь же Никонь отвЂща се:

«Еже есть, владыко, угодно пред очима твоима, тако сътвори, мнЂ же нЂсть лЂпо отвратити въинь от царя небеснаго». Антоний же и иже с ним, въземше одежда своа, отъидоша от мЂста своего, хотяще отъити въ ину область. Князю же еще гнЂвающюся и укоряющу Никона, и се единь от отрокь, вшед, поведаше, яко Антоний и иже съ нимь отъходить отъ града сего въ ину область. Тъгда глагола ему жена его: «Послушай, господи, и не гнЂвайся. Яко тако же бысть и въ странЂ нашей, отъбЂжавъшемъ нЂкоея бЂды ради чрьньцемъ, много зъла створися въ земли той ихъ ради, нъ блюди, господи, да не тако въ области твоей будеть». То же слышавъ князь и убоявъся гнЂва божия, отпусти великааго Никона, повелЂвъ ему ити въ пещеру свою. По онЂхъ же посла, рекый, да съ мольбою възвратяться въспять. Иже едва по три дьни увЂщани быша възвратитися въ свою пещеру, яко се нЂкотории храбри от брани, побЂдивъше супостата своего врага. И бЂша въину молящеся дьнь и нощь къ господу богу. Нъ ни тако не почиваше врагъ, боряся съ ними. Тъгда бо увЂдЂвъ боляринъ Иоанъ, яко никоегоже имъ зъла не створи христолюбивый князь Изяславъ и раждьгъся на ня гнЂвъмь, сына ради своего, и поимъ отрокы многы, и иде на святое стадо, иже и распудивъ я, и въшедъ въ пещеру, и имъ сына своего божьствьнааго Варлаама извлече и́ вънъ, таче съньмъ съ него святую мантию, и въврьже ю въ дьбрь, такоже и шлЂмъ спасения, иже бЂ на гла†его, съньмъ, завьрже и́. И тъгда же и́ облече въ одежю славьну и свЂтьлу, якоже е лЂпо боляромъ. Онъ же съврьже ю долу, не хотя ни видЂти ея, и тако створи многашьды. Тоже повелЂ отьць его съ гнЂвъмь съвязати ему руцЂ и одЂти и́ въ прежереченую одежю, ти тако ити ему сквозЂ градъ въ домъ свой. Онъ же, иже поистинЂ теплый душею на божию любъвь Варламъ, идый путьмь узрЂ распалину, калну сущю, и скоро въшьдъ въ ню и божиею помощию съврьже одежю съ себе, и своима ногама попирашеть ю въ калЂ, попирая съ тЂми и злыя помыслы и лукаваго врага. Таче по сихъ пришедъшемъ имъ въ домъ, повелЂ отець его сЂсти съ нимь на трЂпезЂ. Оному же сЂдъшю, и ничьсоже въкуси отъ брашьна, нъ пребывааше нича и долу зря. По отъядении же отъпусти и́ въ своя храмы, приставивъ отрокы блюсти, да не отъидеть; повелЂ же и женЂ его утворитися въ утварь всякую на прельщение отрока и служити предъ нимь. Рабъ же Христовъ Варламъ въшедъ въ едину клЂть, сЂдЂ в углЂ ея. Жена же его, якоже бЂ ей повелЂно, хожаше предъ нимь и моляшети и́ сЂсти на одрЂ своемь. ВидЂвъ же онъ неистовьство жены и разумЂвъ, яко на прельщение ему уготова отьць, моляшеся въ тайнЂ сьрьдца своего къ милосьрдууму богу, могущууму спасти отъ прельсти тоя. Пребысть же на мЂстЂ томь сЂдя три дьни, не въстая от него, ни брашьна же въкушая, ни въ одежю облечеся, нъ въ единой свитЂ си пребывааше. Преподобьный же Антоний и съ сущиими съ нимь и съ блаженыимь Феодосиемь бЂша въ печали мнозЂ его ради моляхуться богу за нь. Богъ же услыша молитву ихъ: «възъваша бо, — рече, — правьдьни, и господь услыша я и от вьсЂхъ печалий ихъ избавить я. Близь господь съкрушеныихъ сьрьдцьмь и съмЂреныя духъмь спасеть».

ВидЂвъ убо благый богъ тьрпЂние и съмЂрение отрока, обрати жестокое сьрьдце отьца его на милость къ сыну своему. Тъгда убо възвЂстиша ему отроци, глаголюще, яко «се уже четвертый дьнь имать не въкушая брашьна, ни въ одежю рачить облЂщися». То же слышавъ, отьць его съжалиси зЂло его ради, блюдый, да не гладъмь и зимою умреть. Призъвавъ же и любьзно цЂловавъ и отпусти и́. Бы же тъгда вещь пречюдьна и плачь великъ, яко и по мрьтвЂмь. Рабы и рабыня плакахуться господина своего и яко отъхожааше отъ нихъ, иде жена, мужа лишающися плакашеся, отьць и мати сына своего плакастася, яко отлучашеся отънихъ итако съ плачьмь великъмь проважахути и́. Тъгда Христовъ воинъ ишедъ из дому своего, яко птица ис пругла истьргъшися или яко сьрна отъ тенета, тако скоро текый, и доиде пещеры оноя. Его же видЂвъше отьци ти въздрадовашася радостию великою и ставъше прославиша бога, яко услыша молитву ихъ. То уже оттолЂ многыимъ приходящемъ въ пещеру благословления ради еже от отьць тЂхъ и друзии от нихъ бывааху чрьньци божиею благодатию.

Тъгда же великий Никонъ и другый чьрньць святаго Мины манастыря, болярина тако наречемъ, съвЂщавъшася, тако отъидоста, хотяща особЂ сЂсти. И пришьдъша надъ море, ту же и разлучистася отъ себе, якоже се апостола Павьлъ и Варнава на проповЂдание Христово, якоже пишеться въ ДЂянихъ апостолъ. Боляринъ же идый къ Костянтиню граду обрете островъ средЂ моря и ту въселися въ ньмь. Поживе лЂта многа, трьпя зиму и гладъ, и тако успе съ миръмь. Се же и донынЂ островъ тъ зовомъ есть Боляровъ. Великый же Никонъ отъиде въ островъ Тьмутороканьскый, и ту обрЂтъ мЂсто чисто близь града, сЂде на немь. II божиею благодатию въздрасте мЂсто то и цьркъвь святыя богородица възгради на немь, и бысть манастырь славьнъ, иже и донынЂ есть, прикладъ имый въ сий Печерьский манастырь.

По сихъ же пакы Ефремъ каженикъ отиде въ Костянтинь градъ и ту жизяше въ единомь манастыри. ПослЂже же изведенъ бысть и въ страну сию и поставленъ бысть митрополитъмь въ городЂ Переяславли. Се же уже многыими наказании предъложение слову створихомъ, обаче отъселЂ на предълежащее слово възвратимъся, къде бо се все мину и по отходЂ отьць тЂхъ.

Тъгда же блаженый отьць нашь Феодосий поставленъ бысть презвутеръмь повелЂниемь преподобьнааго Антония и бЂ по вся дьни божьствьную служьбу съвьршая съ всякыимь съмЂрениемь, бяше бо кротъкъ нравъмь, и тихъ съмыслъмь, и простъ умъмь, и духовьныя всея мудрости испълненъ. Любъвь же непорочьну имЂя къ всей братии, бЂ бо уже съвъкупилося братия яко до пяти-на-десяте. Преподобьный же Антоний, якоже бЂ обыклъ единъ жити и не трьпя всякого мятежа и мълвы, затворися въ единой келии пещеры, поставивъ въ себе мЂсто братии блаженаго Варлаама, сына болярина Иоана. И отътуда пакы преселися на инъ хълмъ Антоний и, ископавъ пещеру, живяше, не излазя из нея, идеже и донынЂ чьстьное тЂло его лежить. Тъгда же божествьный Варламъ постави надъ пещерою малу цьрквицю въ имя святыя богородица, веля, да ту братия събираються на божьствьное словословие. То уже всЂмъ явлено бысть мЂсто то, бЂ бо мнозЂми суще преже не вЂдомо.

А еже испьрва житие ихъ въ пещерЂ, и елико скърби и печали прияша, тЂсноты ради мЂста того, богу единому съвЂдущю, а устомъ человЂчьскомъ не мощьно исповЂдати. Къ симъ же и ядь ихъ бЂ ръжанъ хлЂбъ тъкмо, ти вода. Въ суботу же ти въ недЂлю сочива въкушахуть; многашьды же и въ та дьни не обрЂтъшюся сочиву, зелие съваривъше едино и то ядяху. Еще же и рукама своима дЂлахуть дЂло: ово ли копытьца плетуще и клобукы, и ина ручьная дЂла строяще и тако, носяще въ градъ, продаяху и тЂмь жито купяху, и се раздЂляхуть, да къждо въ нощи свою часть измеляшеть на състроение хлЂбомъ. Таче по томь начатъкъ пЂнию заутрьнюуму творяаху и тако пакы дЂлааху ручьное свое дЂло. Другоици же въ оградЂ копахуть зелиинааго ради растения, дондеже будяше годъ божьствьнууму славословию, и тако вьси въкупЂ съшедъшеся въ цьркъвь, пЂния часомъ творяахуть, таче святую служьбу съврьшивъше, и тако въкусивъше мало хлЂба и пакы дЂлЂ ся своемь къждо имяшеть. И тако по вся дьни трудящеся, пребывахуть въ любъви божии.

Отьцъ же нашь Феодосий съмЂренъмь съмыслъмь и послушаниемь вься преспЂвааше, трудъмь и подвизаниемь и дЂлъмь телесьныимь, бяше бо и тЂлъмь благъ и крЂпъкъ и съ поспЂшьствъмь всЂмъ служаше, и воду нося и дръва из лЂса на своею плещю, бъдя же по вся нощи въ славословлении божии. И братии же на опочители суще, блаженый же възьмъ раздЂленое жито и когождо часть измълъ и поставляше на своемь мЂстЂ. Другоици же, оваду сущу многу и комаромъ, въ нощи излЂзъ надъ пещеру и, обнаживъ тЂло свое до пояса, сядяше, прядый вълну на съплетение копытьцемъ и псалтырь же Давыдову поя. Отъ множьства же овада и комара все тЂло его покръвено будяше, и ядяху плъть его о немь, пиюще кръвь его. Отьць же нашь пребыв.аше неподвижимъ ни въстая от мЂста того, дондеже годъ будяше утрьний, и тако преже всЂхь обрЂташеся въ цьркви. И ставъ на своемь мЂстЂ непоступьнъ сы, ни мятыйся умъмь, божьствьное славословие съврьшаше, ти тако пакы и-црькве послЂже всЂхъ излажааше. И сего ради вьси любляхути и́ зЂло и яко отьца имяхути и́, зЂло дивящеся съмЂрению его и покорению.

Таче по сихъ божествьный Варлаамъ, игуменъ сы братии въ пещерЂ, изведенъ бысть княжемь повелЂниемь въ манастырь святаго мученика Димитрия и ту игуменъмь поставленъ. Тъгда же братия ту сущая въ пещерЂ събравъшеся, изволениемь всЂхъ, възвЂстивъше преподобьноуму Антонию, блаженааго отьца нашего Феодосия игумьнъмь себе нарекоша, яко и чьрньчьскую жизнь управивъша и божия извЂсто заповЂди излиха вЂдуща.

Отьць же нашь Феодосий, аще и старЂйшиньство приимъ, не измЂни съмЂрения своего правила, на памяти господа имЂя, рекъша: «Иже аще кто въ васъ хощеть быти старЂй, буди всЂхъ убо мьний и всЂмъ слуга». ТЂмь же съмЂряшеся, мьний всЂхъ ся творя и всЂмъ служа, и собою образъ вьсЂмъ дая, и на дЂло преже всЂхъ исходя и въ чину святыя литургия. И оттолЂ цвьтяше и мъножашеся мЂсто то правьдника молитвою. «Правьдьникъ бо, — рече, — яко и фуникъсъ процвьтеть и яко и кедръ, иже въ ЛиванЂ, умножиться». Умножаху бо ся оттолЂ братия и цвьтяше мЂсто то добрыими нравы и молитвами ихъ и инЂми благочьстивыими нравы. И многымъ отъ вельможь приходити къ нему благословления ради, и от имЂний своихъ малу нЂкаку часть подающи имъ. Преподобьный же отьць нашь, иже поистинЂ земльный ангелъ и небесный человЂкъ, Феодосий видя мЂсто скьрбьно суще и тЂсно и еще же и скудно при всЂмь, и братии мъножащися, цьркви же малЂ сущи на съвъкупление имъ, и николиже въпаде о томь въ печаль, ни поскърбе о томь, нъ по вся дьни братию всю утЂшая, учаше и никакоже попечися о плътьнЂмь, но господень гласъ въспоминаше, имъ глаголя: «Не пьцЂтеся, чьто пиемъ, или что Ђмъ, или въ что облечемъся: вЂсть бо отьць вашь небесьный, яко требуеть вься си, обаче ищете цесарьства небеснаго и си вься приложаться вамъ». Блаженый же сице помышляше, богъ же все на потребу нескудьно подаваше ему.

Тъгда бо сий великий Феодосий обрЂтъ мЂсто чисто, недалече от печеры суще, и разумЂвъ, яко довъльно есть на възгражение манастыря, и разбогатЂвъ благодатию божиею и оградивъся вЂрою и упованиемь, испълнивъ же ся духа святаго, начатъ подвизатися въселити мЂсто то. И якоже богу помагающю ему, въ мало время възгради цьрькъвь на мЂстЂ томь въ имя святыя и преславьныя богородица и приснодЂвица Мария, и оградивъ и постави келиЂ многы, и тъгда преселися от пещеры съ братиею на мЂсто то въ лЂто 6570. И отътолЂ божиею благодатию въздрасте мЂсто то, и бысть манастырь славьнъ, се же и донынЂ есть Печерьскый наричемъ, иже от святаго отьца нашего Феодо.сия съставленъ бысть.

По сихъ же посла единого отъ братия въ Костянтинь градъ къ Ефрему скопьцю, да вьсь уставъ Студийскааго манастыря, испьсавъ, присълеть ему. Онъ же преподобьнааго отьца нашего повелЂная ту абие и створи, и всь уставъ манастырьскый испьсавъ, и посъла къ блаженому отьцю нашему Феодосию. И его же приимъ отьць нашь Феодосий, повелЂ почисти предъ братию, и оттолЂ начатъ въ своемь манастыри вся строити по уставу манастыря Студийскааго, якоже и донынЂ есть, ученикомъ его сице съврьшаемъмъ. Вьсякому же хотящю быти чьрноризьну и приходящему къ нему, не отрЂвааше ни убога, ни богата, нъ вся приимаше съ всякымь усьрдиемь, бЂ бо и самъ въ искушении томь былъ, якоже и выше речеся: егда бо приде отъ града своего, хотя быти мнихъ, якоже обьходящю тому вься манастыря, не рачахуть бо того прияти — богу тако сътворьшю на искушение ему. Се бо си въспоминая благый, какова скьрбь бываеть человЂку, тъгда хотящюуму острЂщися, и сего ради вся съ радостию приходящая приимаше. Нъ не ту абие постригаше его, нъ повелЂваше ему въ своей одежи ходити, дондеже извыкняше всь устрой манастырьскый, таче по сихъ облечашети и́ въ мьнишьскую одежю и тако пакы въ всЂхъ служьбахъ искушашети и́, ти тъгда остригы, и оболочашети и́ въ мантию, дондеже пакы будяше чьрньць искусьнъ житиемь чистъмь си, ти тъгда сподобяшети и́ прияти святую скиму.

По вься же дьни святыихъ мясопущь святый отьць нашь Феодосий отхожаше въ святую свою пещеру, идеже и чьстьное тЂло его положено бысть. Ту же затворяшеся единъ до врьбьныя недЂля, и въ пятъкъ тоя недЂля, въ годъ вечерьняя, прихожааше къ братии и, ставъ въ двьрьхъ цьркъвьныихъ, учааше вься и утЂшая, подвига ради и пощения ихъ. Себе же недостоина творя, якоже ни единоя недЂлЂ, понЂ достигнути противу трудомъ ихъ. Многу же скърбь и мьчатание зълии дуси творяхуть ему въ пещерЂ той; еще же и раны наносяще ему, якоже и о святЂмь и велицЂмь Антонии пишеться. Нъ явивыйся оному, дрьзати веля тъ, и сему невидимо съ небесе силу подасть на побЂду ихъ.

Кто бо не почюдиться убо блаженууму сему, еже въ такой тьмьнЂ пещерЂ пребывая единъ, мъножьства пълковъ невидимыхъ бЂсовъ не убояся, нъ крЂпко стоя, яко храбъръ сильнъ, бога моляаше и господа Иисус Христа на помощь себе призывающа,

И тако побЂди я Христовою силою, яко къ тому не съмЂти имъ ни приближитися емь, нъ и еще издалеча мьчьты творящемъ ему. По вечерьниимь убо пЂнии сЂдъшю ему и хотящю опочинути, не бо николиже на ребрЂхъ своихъ ляжашеть, нъ аще коли хотящю ему опочинути, то сЂдъ на столЂ, и тако, мало посъпавъ, въстаняше пакы на нощьное пЂние, и поклонение колЂномъ творя. СЂдъшю же ему, якоже речеся, и се слышааше гласъ хлопота въ пещерЂ отъ множьства бЂсовъ, якоже се имъ на колесницахъ Ђдущемъ, другымъ же въ бубъны биющемъ, и инЂмъ же въ сопЂли сопущемъ, ти тако всЂмъ кличющемъ, якоже трястися пещерЂ отъ множьства плища зълыихъ духовъ. Отьць же нашь Феодосий, вся си слышавъ, не убояся духъмь, ни ужасеся сьрьдцьмь, нъ оградивъся крьстьнымь оружиемь и, въставъ, начатъ пЂти псалтырь Давидову. И ту абие многый трусъ не слышимъ бывааше. Таче по молит†сЂдъшю ему, се пакы бещисльныихъ бЂсовъ глас слышаашеся, якоже и преже. И преподобьнууму же Феодосию ставъшю и начьнъшю оно псалъмьское пЂние, глас онъ абие ищазааше. Сице же по многы дьни и нощи творяхуть ему зълии дуси, яко не дати ему ни мало опочинути, дондеже благодатию Христовою побЂди я, и възятъ от бога власть на нихъ, якоже отътолЂ не съмЂти имъ ни прикоснутися ни къ мЂсту тому, идеже блаженый молитву творяше.

Се бо пакы бысть пакость творящемъ бЂсомъ въ храмЂ, идеже хлЂбы братия творяаху: овогда муку расыпающе, овогда же положеный квасъ на състроение хлЂбомъ разливааху и ину мъногу пакость творяще бЂша. Тъгда же старЂй пекущимъ, шьдъ, съповЂда блаженууму Феодосию пакости нечистыихъ бЂсовъ. То же сь уповая, яко възятъ власть на нихъ отъ бога, въставъ вечеръ и иде въ храмъ тъ, и затворивъ двьри о себе, ту же пребысть въ немь до утрьняя, молитвы творя. Якоже отъ того часа не явитися бЂсомъ на томь мЂстЂ, ни пакости никоеяже творити имъ, запрещениемь преподобьнааго и молитвою.

ИмЂяше же обычай сиць великый отьць нашь Феодосий, якоже по вся нощи обиходити ему келиЂ мниховы вьсЂ, хотя увЂдЂти когождо ихъ како житие. Егда бо услышааше кого молитву творяща, ти тъгда, ставъ, прославяше о немь бога, егда же пакы кого слышааше бесЂдующа дъва ли или трие съшедъшеся въкупЂ, то же ту, ударивъ своею рукою въ двьри ти, тако отхожааше, назнаменавъ тЂмь свой приходъ. Таче въ утрЂй дьнь призъвавъ я, нъ не ту абие обличааше ихъ, нъ якоже издалеча притъчами нагоня, глаголааше къ нимъ, хотя увЂдЂти, еже къ богу тъщание ихъ. Аще бо будяше братъ льгъкъмь сьрьдьцьмь и теплъ на любъвь божию, то сий въскорЂ разумЂвъ свою вину, падъ, поклоняшеся, прощения прося отъ него прияти. Аще ли будяше пакы братъ омрачениемь бЂсовьскымь сьрьдьце покръвено имый, то сий станяше, мьня, яко о иномь бесЂдують, самъ чистъ ся творя, дондеже блаженый обличашети и́, и епитимиею того утвьрдяше, и отъпустяше. И тако вься прилЂжьно учааше молитися къ господу и не бесЂдовати ни къ кому же по павечерьний молитвЂ, и не преходити отъ келиЂ въ келию, нъ въ своей келии бога молити, якоже кто можеть и рукама же своима дЂлати по вся дьни, псалмы Давыдовы въ устЂхъ своихъ имуще...

ТЂмь же убо слышаще князи и боляре доброе ихъ житие прихожааху къ великууму Феодосию, исповЂдающе тому грЂхы своя, иже велику пользу приимъше бо от того, отъхожааху, ти тако пакы приношааху ему нЂчьто мало отъ имЂний своихъ на утЂшение братии, на състроение манастырю своему. Друзии же и села въдаваюче на попечение имъ. Наипаче же зЂло любляаше блаженааго христолюбивый князь Изяславъ, предьржай тъгда столъ отьца своего, и часто же и́ призывааше къ собЂ, мъножицею же и самъ прихожааше к нему и тако духовьныихъ тЂхъ словесъ насыщашеся и отъхожааше. Якоже отътолЂ тако богъ възвеличаше мЂсто то, умножая вьсЂхъ благыихъ въ немь молитвами въгодьника своего.

Отьць же нашь Феодосий бЂаше сице запретилъ вратарю, да по отъЂдении обЂда не отврьзаеть вратъ никомуже, и никтоже пакы да не въходить въ манастырь, дондеже будяше годъ вечерьний, яко да полудьнию сущю почиють братия нощьныихъ ради молитвъ и утрьняго пЂния.

И въ единъ дьнь полудьнию сущу прииде по обычаю христолюбьць Изяславъ съ малъмь отрокъ: егда хотяше поЂхати къ блаженууму, тъгда распустяше вся боляры въ домы своя, нъ тъкмо съ шестию или съ пятию отрокъ прихожааше къ нему. Се же, яко рЂкъхъ, приЂхавъ и съсЂде съ коня, ни бо николиже Ђха на дворъ манастырьскый, и приступивъ къ вратомъ повелЂ отъврьсти, вънити хотя. Онъ же отъвЂща ему, яко повелЂние есть великааго отьца не отъврьзати вратъ никомуже, дондеже годъ вечерьний будеть. Таче пакы христолюбьць възвЂщая ему, да увЂсть, къто есть. И глаголаше: «Се бо азъ есмь, и мнЂ отъврьзи врата единому». Онъ же, не вЂдый, яко князь есть, отъвЂщавааше ему сице: «РЂхъ ти, яко повелЂно ми есть отъ игумена, яко аще и князь приидеть, не отъврьзи вратъ, то уже аще хощеши, потрьпи мало, дондеже годъ будеть вечерьний». Онъ же отъвЂща, яко «Азъ есмь князь, то или мнЂ не отъврьзеши». Тъгда изникъ видЂтъ, и познавъ князя его суща, и въ страсЂ бывъ, не отъврьзе вратъ, нъ блаженууму съповЂдатъ тече, оному же стоящю предъ враты и тьрпящю, о семь подражающю святаго и вьрховьняаго апостола Петра: изведену бо бывъшю тому ангелъмь ис тьмьницЂ и пришьдъшю ему къ дому, идеже бЂша ученици его и тълкънувъшю ему въ врата, и се рабыни изникнувъши, видЂ Петра стояща, и от радости же не отврьзе воротъ, нъ текъши повЂда ученикомъ приходъ его, Тако же и сь от страха не отврьзе вратъ, нъ скоро текъ, повЂда блаженууму христолюбьца. Таче блаженый ишедъ и видЂвъ князя и поклонися ему, и по сихъ начатъ глаголати ему христолюбьць: «О како, отьче, запрещение твое, еже глаголеть чьрноризьць сий, яко, аще и князь приидеть, не пустити его». Блаженый же отвЂща: «Сего ради глаголють, владыко благый, повелЂние то, якоже да въ годъ полудьньный не исходять братия из манастыря, нъ починуть въ то время, нощьнааго ради славословия. Твое же богъмь подвижьное тъщание къ святЂй владычици нашей богородици благо и души твоей на успЂхъ. И мы же вельми радуемъся о прихожении твоемь», таче по сихъ шедъшема има въ цьркъвь и сътворивъ молитву сЂдоста. Ти тако христолюбивый князь насыщашеся медоточьныихъ тЂхъ словесъ и иже исхожааху от устъ преподобьнааго отьца нашего Феодосия и велику пользу приимъ отъ него, иде въ домъ свой славя бога. И от того дьне большиими начатъ любити и́, тако имяше его, яко единого отъ прьвыихъ святыихъ отьць и вельми послушааше его и творяаше вся повелЂная ему отъ великааго отьца нашего Феодосия.

Божествьный же Варламий, сынъ Иоана болярина, игуменъ же манастыря святаго мученика Дьмитрия, иже възгради христолюбивый князь Изяславъ, иде въ святый градъ Иерусалимъ. Таче походивъ святая та мЂста, възвратися въ свой манастырь и пакы по времени нЂкоторЂмь иде въ Костянтинь градъ, и ту такоже походи вся манастыря и искупивъ, еже на пользу манастырю своему, и тако поиде на конихъ въ страну свою. Идый же путьмь и уже въ странахъ своихъ си, въпаде въ недугъ лютъ. Таче, яко доиде града Володимиря, въниде въ манастырь, ту сущий близъ города, иже наричюти и Святая гора, ту же усъпе съ миръмь и житию коньць приятъ. И заповЂдавъ сущиимъ с нимь, да доправять тЂло его въ манастырь святааго и блаженааго отьца нашего Феодосия и ту положать е, и вся сущая, яже бЂ искупилъ въ Костянтини градЂ — иконы и ино, еже на потребу, повелЂвъ туда, иде же самъ, ту же и то повелЂ въдати блаженууму, якоже заповЂда имъ. Ти тако донесъше тЂло его, положиша е въ манастыри блаженаго и преподобьнааго отьца нашего Феодосия на деснЂй странЂ цьркве, идеже и донынЂ есть гробъ его.

Тъгда же христолюбивый князь от манастыря великааго отьца нашего Феодосия избьравъ единого отъ братия, иже въ чьрньчьскЂмь житии просиявъша, Исаию наричемааго, того же изведъ, игумена постави въ манастыри своемь у святааго мученика Димитрия, иже и послЂже добрыхъ ради нравъ его, поставленъ бысть епискупъмь Ростову городу.

Тъгда же великий Никонъ, умьръшю Ростиславу князю острова того, умоленъ бысть отъ людий тЂхъ преити къ Святославу князю и молити и́, да пустить къ нимъ сына своего, да сядеть на столЂ томь. Таче яко и пришьдъ, прииде въ манастырь блаженааго отьца нашего Феодосия, и яко видЂста другъ друга, падъша оба въкупЂ, поклонистася, и тако пакы охопистася, и надълзЂ плакастася, якоже много время не видЂвъшася.

По сихъ же моляшети и́ святый Феодосий не отълучитися ему от него, дондеже еста въ плъти. Тъгда же великий Никонъ обЂщася ему, глаголя, якоже «тъкмо дошьдъ тамо и манастырь свой обрядивъ, и ту абие възвращуся въспять»; яко: же и сътвори: дошьдъ бо съ князьмь ГлЂбъмь острова того, и оному сЂдъшю на столЂ въ градЂ томь, Никонъ же възворотися въспять. Таче пришедъ въ манастырь великааго отьца нашего Феодосия, и вься своя благая предавъ блаженууму, самъ же бЂ съ всякою радостию покаряяся ему, зЂло же любляшети и́ богодъхновеный Феодосий, яко отьца его себе имЂяшеть. ТЂмьже, аще и коли къде отъходя, поручаше тому братию и еже тЂхъ съблюдати же и поучати, якоже старЂйшю тому сущю всЂхъ. И егда же пакы самъ поучаше братию въ цьркъви духовьныими его словесы и повелЂвааше пакы великууму Никону, яко се ис кънигъ почитающе поучение творити братии, таче и пакы преподобьнууму отьцю нашему Стефану, ексиарху тъгда сущю, послЂже же игумену сущу того манастыря по съмрьти блаженааго Феодосия, таче по томь епискупу въ Володимирьскую оболость.

Се же и о сихъ съповЂдахъ, таче на послЂдъцЂ о единомь блаженЂмь отьци Феодосии словеси поиду и яже о немь достойна своя ему исправления, божию благодатию исповЂдая свЂтила просвЂщенааго отьца нашего Феодосия.

БЂаше бо поистинЂ чловЂкъ божий, свЂтило въ вьсемь мирЂ видимое и просиявъшее въ всемь чьрноризьцемъ: съмЂренъмь, съмыслъмь и послушаниемь, и прочиими труды подвизаяся, дЂлая по вся дьни, не дада рукама своима ни ногама покоя. Еще же и въ пещьницю часто исхожааше и съ пекущими веселяшеся духъмь, тЂсто мЂшааше и хлЂбы пека. БЂаше бо, и преже рЂхъ, крЂпъкъ тЂлъмь и сильнъ. Вься же стражющая бЂ уча и укрЂпляя и утЂшая, никакоже раслабЂти въ дЂлЂхъ своихъ.

Въ единъ же от дьний хотящемъ имъ праздьникъ творити святыя богородица, и водЂ не сущи, преже же намЂненууму Феодору, сущю тъгда келарю, иже и многаа ми съповЂда о преславьнЂмь мужи семь. Тъ же, шедъ, повЂда блаженууму оть.цю нашему Феодосию, яко нЂсть къто воды нося. То же блаженый, съ спЂхъмь въставъ, начатъ воду носити отъ кладязя. И се единъ отъ братия видЂвы и́ воду носяща и, скоро щедъ,възвЂсти нЂколику братии, иже и съ тъщаниемь притекъше наносиша воды до избытъка. И се же пакы дръвомъ нЂколи приготованомъ не сущемъ на потребу варения, шедъ же келарь Феодоръ къ блаженууму Феодосию глаголя, яко да повелиши единому от братия, сущюуму праздьну, да, въшедъ, приготовить дръва, еже на потребу. То же блаженый отъвЂща ему: «То се азъ праздьнъ есмь, и се поиду». Таче повелЂ на трапезу братии ити, бЂ бо годъ обЂду, самъ же, възьмъ сЂчиво, нача сЂчи дръва. И се по отъядении излЂзъше братия, ти видЂша преподобьнааго игумена своего сЂкуща дръва и тако тружающася. И възятъ къждо сЂчиво свое, таже тако приготоваша дръва, якоже тЂмъ довольномъ имъ быти на многы дьни.

Сице бо ти бЂ тъщание къ богу блаженааго и духовьнааго отьца нашего Феодосия, имяаше бо съмЂрение и кротость велику, о семь подражая Христоса, истиньнааго бога, глаголавьшааго: «НавыкнЂте отъ мене, яко крътъкъ есмь и съмЂренъ сьрьдцьмь». ТЂмьже на таковое подвизание възирая, съмЂряшеся, послЂдьний ся вьсЂхъ творя и служьбьникъ, и собою вьсЂмъ образъ дая. На дЂло же преже вьсЂхъ исходя, и въ цьркви же преже вьсЂхъ обрЂтаяся, и послЂже вьсЂхъ излазя. Мъногашьды же пакы великууму Никону сЂдящю и дЂлающю книгы, и блаженууму въскраи того сЂдящю и прядущю нити еже на потребу таковууму дЂлу. Таково ти бЂ того мужа съмЂрение и простость. И никтоже его николиже видЂ на ребрЂхъ своихъ лежаща, ли воду възливающа на тЂло, раз†тъкмо руцЂ умывающа. А одежа его бЂ свита власяна остра на тЂлЂ, извьну же на ней и ина свита. И та же вельми худа сущи, и тоже сего ради възволочааше на ся, яко да не явитися власяници сущи на нем. О сей одежи худЂй мнози несъмысльнии ругахуся ему, укаряюще его. Блаженууму же си съ радостию вься приимающю укоризну ихъ, имЂя убо присно на памяти слово господне и тЂмь утЂшая веселяшеся: «Блажени бо, — рече, — есте, егда укорять вы, егда рекуть всякъ зълъ глаголъ на вы, лъжюще мене ради. Въздрадуйтеся въ тъ дьнь и възыграйте, се бо мьзда ваша мънога на небесЂхъ». Си въспоминая блаженый и о сихъ утЂшаяся, трьпяше укоризну и досажение от всЂхъ.

И се въ единъ дьнь шедъшю великууму отьцю нашему Феодосию нЂкоторааго ради орудия къ христолюбьцю князю Изяславу, далече ему сущю отъ града. Таче яко и пришьдъ и до вечера умудивъшю ему орудия ради. И повелЂ христолюбьць, нощьнааго ради посъпания ему, на возЂ допровадити и́ до манастыря его. И яко бысть идый путьмь и возяй его, видЂвы и́ въ такой одежи сущааго, и мьнЂвъ, яко единъ от убогыхъ есть, глагола ему: «Чьрноризьче! Се бо ты по вься дьни пороздьнъ еси, азъ же трудьнъ сый. Се не могу на кони Ђхати. Нъ сице сътворивЂ: да азъ ти лягу на возЂ, ты же могый на коли Ђхати». То же блаженый съ вьсякыимь съмЂрениемь въставъ, сЂде на кони, а оному же легъшю на возЂ, и идяше путьмь, радуяся и славя бога. И егда же въздрЂмаашеся, тъгда же съсЂдъ, текъ, идяаше въскрай коня, дондеже трудяашеся, ти тако пакы на конь въсядяше. Таче же уже зорямъ въсходящемъ и вельможамъ Ђдущемъ къ князю, и издалеча познавъше блаженааго и съсЂдъше съ конь, покланяахуся убо блаженууму отьцю нашему Феодосию. Тъгда же глагола отроку: «Се уже, чадо, свЂтъ есть! Въсяди на конь свой». Онъ же видЂвъ, еже тако вьси покланяхуться ему, и ужасеся въ умЂ и, трепетенъ сыи, въста и въсЂде на конь. Ти тако поиде путьмь, а преподобьнууму Феодосию на возЂ сЂдящю. Вси же боляре, сърЂтъше, покланяхуся ему. Таче дошьдъшю ему манастыря, и се ишедъше вься братия поклонишася ему до земля. То же отрокъ больми ужасеся, помышляя въ себе: кто сь есть, еже тако вьси покланяються ему? И емы и́ за руку, въведе и́ въ трапезьницю, таче повелЂ ему дати Ђсти и пити, елико хощеть, еще же и кунами тому давъ, отъпусти и́. Си же съповЂда самъ братии повозьникъ тъ, а блаженууму о семь никомуже явивъшю, нъ сице бЂ убо по вся дьни о сихъ уча братию, не възноситися ни о чемь же, нъ съмерену быти . мниху, а самому мьньшю всЂхъ творитися и не величатися, нъ къ вьсЂмъ покориву быти. «И ходяще же — глаголааше имъ — руцЂ съгьбенЂ на прьсьхъ своихъ къжьдо да имате, и никтоже васъ да не преходить въ съмЂрении же вашемь, да ся покланяете къждо другъ къ другу, якоже есть лЂпо мьниху, и не преходити же отъ келиЂ въ келию, нъ въ своей келии къждо васъ да молить бога». Сицими же и инЂми словесы по вся дьни не престая ихъ наказааше, и аще пакы слышааше от братия, комуже сущю от мьчьтаний бЂсовьскыихъ, то сия призъвавъ и, яко въ вьсЂхъ искушенихъ бывъ, учааше и наказааше стати крЂпъцЂ противу дияволемъ къзньмъ, никакоже поступати, ни раслабЂтися от мьчьтаний и бЂсовьскыя напасти, не отходити имъ от мЂста того, нъ постъмь и молитвою оградитися и бога часто призывати на побЂду злааго бЂса. Глаголааше же и се къ нимъ, яко тако и мнЂ бЂ испьрва. «Единой бо нощи поющю ми въ кели обычьныя псалъмы, и се пьсъ чьрнъ ста предъ мною, якоже имь мнЂ нельзЂ ни поклонитися. Стоящю же ему на многъ часъ предъ мною, се же азъ постреченъ бывъ, хотЂхъ ударити и́, и се невидимъ бысть от мене. Тъгда же страхъ и трепетъ обиятъ мя, якоже хотЂти ми бЂжати отъ мЂста того, яко аще не бы господь помоглъ ми. Се бо малы въспрянувъ от ужасти, начахъ прилЂжьно бога молити и часто поклонение колЂномъ творити, и тако отбеже отъ мене страхъ тъ, якоже отъ того часа не бояти ми ся ихъ, аще предъ очима моима являхуть ми ся».

Къ симъ же и ина многа словеса глаголааше, крЂпя я на зълыя духы. И тако отпущааше я, радующася и славя бога о таковЂмь наказании добляаго наставьника и учителя ихъ.

И се исповЂда ми единъ отъ братия, именьмь Иларионъ, глаголя, яко многу ми пакость творяху въ келии зълии бЂси. Егда бо ему легъшю на ложи своемь, и се множьство бЂсовъ пришьдъше и за власы имъше и́, и тако пьхающе, влачахути и́, и друзии же, стЂну подъимъше, глаголааху: «СЂмо да влеченъ будеть, яко стЂною подавленъ». И тако по вся нощи творяхуть ему, и уже не могый тьрпЂти, шедъ, съповЂда преподобьнуму отьцю Феодосию пакость бЂсовьскую. И хотя отъити отъ мЂста того въ ину келию. То же блаженый моляшети и́, глаголя: «Ни, брате, не отходи отъ мЂста того, да не како похваляться тобою злии дуси, яко побЂдивъше тя и бЂду на тя створьше, и оттолЂ пакы больше зъло начьнути ти творити, яко власть приимъше на тя. Нъ се да молишися богу въ келии своей, да и богъ, видя твое трьпЂние, подасть ти побЂду на ня, якоже не съмЂти имъ ни приближитися къ тебе». Онъ же пакы глаголаше ему: «Молю ти ся, отьче, яко отселЂ не могу пребывати въ келии множьства ради живущихъ бЂсовъ въ ней». Тъгда же блаженый, прекрестивы и́, таче глагола ему: «Иди и буди въ келии своей, и отселЂ не имуть ти никоеяже пакости створити лукавии бЂси, не бо видЂти ихъ имаши». Онъ же вЂру имъ и, поклонивъся святууму, отъиде, и тако въ ту нощь легъ въ келии своей, съпа сладъко. И отътолЂ проныривии бЂси не съмЂша ни приближитися къ мЂсту тому, молитвами бо преподобнаго отьца нашего Феодосия отъгоними суще и бЂжаще отидоша.

И се пакы тъ же чьрньць Иларионъ съповЂда ми. Бяше бо и книгамъ хытръ псати, сий по вся дьни и нощи писааше книгы въ келии у блаженааго отьца нашего Феодосия, оному же псалтырь усты поющю тихо и рукама прядуща вълну, или кое ино дЂло дЂлающа. Тако же въ единъ вечеръ дЂлающема има къжьдо свое дЂло, и се въниде икономъ, глаголя блаженому, яко въ утрий дьнь не имамъ купити, еже на ядь братии и на ину потребу. То же блаженый глагола ему: «Се, якоже видиши, уже вечеръ сущь, и утрьний дьнь далече есть. ТЂмьже иди и потрьпи мало, моляся богу, некъли тъ помилуеть ны и попечеться о насъ, якоже самъ хощеть». И то слышавъ, икономъ отъиде. Таче, въставъ, блаженый иде въ келию свою пЂтъ по обычаю обанадесяте псалма. Тако же и по молитвЂ, шьдъ, сЂде дЂлая дЂло свое. И се пакы въниде икономъ, то же глаголя. Тъгда отвЂша ему блаженый: «РЂхъти, иди и помолися богу. Въ утрий дьнь шедъ въ градъ иу продающиихъ да възьмеши възаимъ, иже ти на потребу братии, и послЂдь, егда благодЂавшу богу, отдамы дългъ от бога, таче вЂрьнъ есть глаголай: «Не пьцЂтеся утрЂйшимь, и тъ не имать насъ оставити». Таче отшедъшю иконому, и се вълезе свЂтьлъ отрокъ въ воиньстЂй одении и поклонивъся, и ничьсоже рекый, и положивъ же на стълпЂ гривьну злата и тако пакы мълча излезе вънъ. Тъгда же въставъ блаженый, и възьмъ злато, и съ сльзами помолися въ умЂ своемь. Таче вратаря възъвавъ, пыташе и́, еда къто къ воротомъ приходи въ сию нощь. Онъ же съ клятвою извЂщася, яко и еще свЂтЂ затвореномъ сущемъ воротомъ, и оттолЂ нЂсмь ихъ отврьзалъ, и никтоже приходилъ къ нимъ. Тъгда же блаженый, призвавъ иконома, подасть ему гривьну злата глаголя: «Чьто глаголеши, брате Анастасе, яко не имамъ чимь купити братии требования? Нъ сице, шьдъ, купи еже на потребу братии. Въ утрЂй же пакы дьнь богъ да попечеться нами». Тъгда же икономъ, разумЂвъ, падъ, поклонися ему. Блаженый же учааше и глаголя: «Николиже не отъчаися, нъ въ вЂрЂ крЂпяся, вьсю печаль свою възвьрзи къ богу, яко тъ попечеться нами, якоже хощеть. И сътвориши братии праздьникъ великъ дьнесь». Богъ же пакы нескудьно подавааше ему еже на потребу божествьнууму тому стаду.

Блаженый же о сихъ всЂхъ по вся нощи бе-съна пребываше, моля бога съ плачьмь и часто къ земли колЂиЂ прекланяя, якоже и многашьды слышаша цьркъвьнии строителе, вънегда бо годъ будяше заутрьнюму пЂнию и онЂмъ хотящемъ благословление възяти отъ него. И единъ отъ нихъ тихы шедъ и, ставъ, послушааше, ти слышаше и́ молящася и вельми плачющася и главою часто о землю биюща, таче мало отъступивъ и се начьняше рамяно шьствовати и, якоже слышааше тутънъ, умълкъняше, творяся, еже мнЂти оному, яко съпить. Оному же тълъкнувъшю и рекъшю: «Благословести, отьче!». Блаженый же мълчаше, якоже оному до трий кратъ сице тълкънувъшю и глаголавъшю: «Благослови, отьче!». То же сий, яко от съна въспрянувъ, глаголааше: «Господь нашь Исусъ Христосъ да благословить тя, чадо», и тако же пакы преже всЂхъ обрЂтаашеся въ цьркви. Сице же пакы по вся нощи съповЂдахути и́ творяща.

И бЂ въ манастыри его единъ нЂкто чьрноризьць, санъмь прозвутеръ, имьньмь Дамианъ, иже рьвьнием подражааше житию и съмЂрению преподобнааго своего отьца Феодосия. О немь же мнози съвЂдЂтельствують о добрЂмь его съмЂрении и о житии и послушании и еже къ вьсЂмъ покорение сътяжа. Наипаче же бывъшеи съ тЂмь въ келии ти видЂвъше кротость его и несъпание по вся нощи, и почитающа съ прилежаниемь святыя книгы, и участяща пакы на молитву; сии же ина многа съповЂдаху о мужи томь. Тому же нЂколи болящю и при коньци уже сый, моляшеся богу съ сльзами, глаголя: «Господи мой, Исус Христе, съподоби мя съобьщьнику быти славы святыихъ твоихъ и съ тЂми причаститися царствию твоему и не отлучи мене, молю ти ся, владыко, отьца и наставьника моего преподобнааго Феодосия, нъ съ тЂмь убо причьти мя въ свЂтЂ томь, еже еси уготовалъ правьдьникомъ». Сице же ему пребывающю и молящюся, и се вънезаапу предъста у одра его блаженый Феодосий, иже и падъ на пьрсьхъ его и любьзно цЂлуя и глаголааше к нему: «Се, о, чадо, о немь же молися господеви, се нынЂ посла мя извЂстити ти, яко сице по прошению твоему будеть ти, и съ святыми причьтенъ будеши и съ тЂми въ царствии у небеснааго владыкы обьщьникъ будеши. И егда пакы господь богъ повелить ми отъ свЂта сего преставитися и приити ми къ тебе, и тъгда не има†разлучитися от себе, нъ въкупЂ буде†въ свЂтЂ ономь». И се рекъ, невидимъ бысть от него. Тъгда же тъ разумЂвъ, яко явление от бога бысть ему, не бо его видЂ двьрьми излЂзъша, ни пакы двьрми вълЂзъша, нъ на немь же мЂстЂ явивъся, на томь же пакы и невидимъ бысть. И въскорЂ же пригласивъ служащааго ему и пославъ по блаженааго Феодосия. Тому же въскорЂ пришедъшю, и глагола ему онъ веселъмь лицьмь: «Се, отьче, буде ли тако, якоже нынЂ явивъся обЂща ми ся». Блаженый же, яко не вЂдый того, отвЂща: «Ни, чадо, яко не вЂмь того, еже глаголеши обЂщание». Тъгда же съповЂда ему, како молися и како явися ему тъ самъ преподобьный. То же услышавъ богодъхновеный отьць нашь Феодосий, осклабивъся лицьмь и мало просльзивъся глаголеть тому: «Ей, чадо! Будеть ти, якоже ти ся обЂща ангелъ, явивъся въ образЂ моемь. Азъ же, грЂшьный, како могу обьщьникъ быти славы оноя, еже уготована есть правьдьникомъ?». Обаче онъ, слышавъ обЂщание, радъ бысть. И тако братии малу събьравъшюся, цЂлова вься и сице съ миръмь предасть въ руцЂ душю пришедъшимъ по нь ангеломъ. Тъгда блаженый повелЂ ударити въ било, да съберуться братия, и тако съ лЂпотьною чьстию и съ пЂниемь погребоша чьстьное тЂло его, идеже и всю братию погрЂбаху.

По сихъ же множащися братии, и нужа бысть славьному отьцю нашему Феодосию распространити манастырь на поставление келий, множьства ради приходящихъ и бывающимъ мнихомъ. И бЂ самъ съ братиею дЂлая и городя дворъ манастырьскый. И се же разгражену бывъшю манастырю и онЂмъ не стрЂгущемъся, и се въ едину нощь, тьмЂ сущи велицЂ, приидоша на ня разбойници. Глаголаху, яко въ полатахъ цьркъвьныихъ, ту есть имЂние ихъ съкръвено, да того ради не идоша ни къ единой же келии, нъ цьркви устрьмишася. И се услышаша гласъ поющихъ въ цьркви. Си же, мьнЂвъше, яко братии павечерняя молитвы поющимъ, отъидоша. И мало помьдливъше въ лЂсЂ, таче мьнЂша, яко уже коньчану быти пЂнию, пакы придоша къ цьркви. И се услышаша тъ же глас и видЂша свЂтъ пречюдьнъ въ цьркви сущь, и благоухание исхожаше , отъ цьркве, ангели бо бЂша поюще въ ней. ОнЂмъ мнящемъ, яко братии полунощьное пЂние съвьрьшающемъ, и тако пакы отидоша, чающе, донъдеже сии съконьчають пЂние, и тъгда, въшьдъше въ цьркъвь, поемлють вься сущая въ и́. И тако многашьды приходящемъ имъ, и тъ глас аньгельскый слышащемъ. И се годъ бысть утрьнюуму пЂнию, и пономонареви биющю въ било. То же они, отъшьдъше мало въ лЂсъ и сЂдъше, глаголааху: «Чьто сътворимъ? Се бо мьниться намъ, привидЂние бысть въ цьркви? Нъ се да егда съберуться вьси въ цьркъвь, тъгда, шьдъше и от двьрии заступивъше, вься я погубимъ и тако имЂние ихъ възьмемъ». То же тако врагу на то острящю я, хотящю тЂмъ святое то стадо искоренити от мЂста того, нъ обаче ни како възможе, нъ обаче самъ от нихъ побЂженъ бысть, богу помагающю молитвами преподобьнааго отьца нашего Феодосия. Тъгда бо зълии ти человЂци, мало помудивъше, и преподобьнууму тому стаду събьравъшюся въ цьркъвь съ блаженыимь наставьникъмь и пастухъмь своимь Феодосиемь и поющемъ утрьняя псалмы, устрьмишася на ня, акы звЂрие дивии. Таче яко придоша, и се вънезаапу чюдо бысть страшьно: отъ земля бо възятъся цьркы и съ сущиими въ ней възиде на въздусЂ, яко не мощи имъ дострЂлити ея. Сущеи же въ цьркви съ блаженыимь не разумЂша, ни чюша того. Они же, видЂвъше чюдо се, ужасошася и, трепетьни бывъше, възвратишася въ домъ свой. И оттолЂ умилишася никомуже зъла сътворити, якоже и старЂйщинЂ ихъ съ инЂми трьми пришьдъшемъ къ блаженому Феодосию покаятися того и исповЂдати ему бывъшее. Блаженый же, то слышавъ, прослави бога, спасъшааго я от таковыя съмьрьти. Онъ же поучивъ я, еже о спасении души, и тако отпусти я, славяща и благодаряща бога о вьсЂхъ сихъ.

Сицево же чюдо о цьркви той и инъгда пакы видЂ единъ от боляръ христолюбьця Изяслава. Яздящю тому нЂколи въ нощи на поли, яко 15 попьрищь от манастыря блаженааго.

И се видЂ цьркъвь у облака сущу. И въ ужасти бывъ, погна съ отрокы, хотя видЂти, кая то есть цьркы. И се яко доиде манастыря блаженааго Феодосия, тъгда же, оному зьрящю, съступи цьркы и ста на своемь мЂстЂ. Оному же тълъкнувъшю въ врата, и вратарю отвьрьзъшю ему врата, въниде и повЂда блаженому бывъшее. И оттолЂ часто приходяше къ нему и насыщаяся от него духовьныихъ тЂхъ словесъ, подаваше же и от имЂния своего на състроение манастырю.

И се же пакы инъ боляринъ того же христолюбьця идый нЂколи съ князьмь своимь христолюбьцьмь на ратьныя, хотящемъ имъ брань сътворити, обЂщася въ умЂ своемь, глаголя, яко «аще възвращюся съдравъ въ домъ свой, то дамь святЂй богородици въ манастырь блаженааго Феодосия 2 гривьнЂ золота, еще же и на икону святыя богородиця вЂньць окую». Таче бывъшю сънятию и многомъ от бою оружиемь падъшемъ. ПослЂже побЂжени бывъше ратьнии, си же спасени възъвратишася въ домы своя. Боляринъ же забысть еже дасть святЂй богородици. И се по дьньхъ нЂколицЂхъ, съпящю ему въ полудьне въ храминЂ своей, и се приде ему глас страшьнъ, именьмь того зовущь его: «Клименте!» Онъ же въспрянувъ и сЂде на ложи. Ти видЂ икону святыя богородиця, иже бЂ въ манастыри блаженаго, прЂдъ одръмь его стоящю. И глас от нея исхожааше сице: «Почто се, Клименте, еже обЂща ми ся дати, и нЂси ми далъ? Нъ се нынЂ глаголю ти: потъщися съвьрьшити обЂщание свое!» Си же рекъши, икона святыя богородиця невидима бысть от него. Тъгда же боляринъ тъ, въ страсЂ бывъ, таче възьмъ, имь же бЂ обЂщалъся, несъ въ манастырь, блаженому Феодосию въдасть, такоже и вЂньць святыя богородиця на иконЂ окова. И се же пакы по дьньхъ немнозЂхъ умысли тъ же боляринъ дати еваньгелие въ манастырь блаженааго. Таче, яко приде къ великууму Феодосию въ манастырь, имый подъ пазухою съкръвено святое евангелие, и по молит†хотящема има сЂсти, оному не еще явивъшю еуангелия, глагола тому блаженый: «ПьрьвЂе, брате Клименте, изнеси си святое еуангелие, еже имаши въ пазусЂ своей и еже обЂщалъ еси дати святьй богородици, ти тъгда сядемъ». Се слышавъ онъ ужасеся о проповЂдании преподобьнааго, не бЂ бо никомуже о томь възвЂстилъ. И тако изнесъ святое то еваньгелие, въдасть блаженому на руцЂ, и тако сЂдъ и духовьныя тоя бесЂды насытивъся, възвратися въ домъ свой. И оттолЂ велику любъвь имяаше къ блаженому Феодосию и часто прихожааше къ нему, и велику пользу приимаше от него.

И егда же сии прихожааху къ нему, то же си и тако по божьствьнЂмь томь учении прЂдъставляаше тЂмъ тряпезу от брашьнъ тЂхъ манастырьскыихъ: хлЂбъ, сочиво и мало рыбъ. Мъногашьды же и христолюбьцю Изяславу и таковыихъ брашьнъ въкушающю, якоже и веселяся, глаголаше блаженому Феодосию: «Се, якоже вЂси, отьче, вьсЂхъ благыихъ мира сего испълънися домъ мой, то же нЂсмь тако сладъка брашьна въкушалъ, якоже нынЂ сьде. Многашьды бо рабомъ моимъ устроившим различьная и многоцЂньная брашьна, ти не суть така сладъка. Нъ молю ти ся, отьче, повЂжь ми, откуду есть сладость си въ брашьнЂ вашемь?». Тъгда же богодъхновеный отьць Феодосий, хотя увЂрити того на любъвь божию, глагола ему: «То аще, благый владыко, сия увЂдЂти хощеши, послушай насъ, и повЂдЂ ти. Егда бо братии манастыря сего хотящемъ варити, или хлЂбы пещи, или кую ину служьбу творити, тъгда же пьрьвое шьдъ единъ от нихъ възьметь благословление отъ игумена, таче по сихъ поклониться прЂдъ святыимь олътарьмь три краты до земля, ти тако свЂщю въжьжеть от святаго олътаря и отъ того огнь възгнЂтить. И, егда пакы воду въливая въ котьлъ, глаголеть старЂйшинЂ: «Благослови, отьче!» И оному рекущю: «Богъ да благословить тя, брате!» И тако вься служьба ихъ съ благословлениемь съвьрьшаеться. Твои же раби, и якоже рече, дЂлають сварящеся и шегающе и кльнуще другъ друга, многашьды же и биеми суть от приставьникъ. И тако же вься служьба ихъ съ грЂхъмь сътваряеться». То же слышавъ, христолюбьць глагола: «ПоистинЂ, отьче, тако есть, якоже глагола».

А иже преподобьный отьць нашь Феодосий, иже поистинЂ испълъненъ духа святааго, тЂмьже и божия таланта умъноживъ, иже населивъ мЂсто множьствъмь чьрьноризьць, иже пусто суще, манастырь славьнъ сътвори. ТЂмьже не хотяше никакоже прилога творити въ немь, нъ бЂ вЂрою и надежею къ богу въскланяяся, якоже паче не имЂти упования имЂнием. ТЂмьже и тако сего ради многашьды хожаше по келиямъ ученикъ своихъ, и аще чьто обрящааше у кого, ли брашьно сънЂдьно, ли одежею лише уставьныя одежа, или от имЂния чьто, сия възьмъ, въ пещь въмЂташе, якоже вражию часть сущю и прЂслушание грЂху. И сице же глаголаше имъ: «НЂсть лЂпо намъ, братие, мьнихомъ сущемъ и отвьрьгъшемъся мирьскыихъ, събьрание пакы творити имЂнию въ келию свою. Како же можемъ молитву чисту приносити къ богу, съкровища имЂнию дьрьжаще въ келии своей? 0 семь слыша господа рекуща, яко «иде съкровища ваша, ту и сьрьдьца ваша», и пакы о събирающиихъ: «Безумьне, въ сию нощь душю твою изьму, а яже събьра — кому будуть?». ТЂмьже, братие, довъльни будЂмъ о уставьныихъ одежахъ нашихъ и о брашьнЂ прЂдъложенЂмь на трапезьници от келаря, а въ келии от сицевыихъ не имуще ничьтоже, да тако съ вьсякыимь усьрьдиемь и вьсею мыслию молитву свою чисту приносимъ къ богу». И се же и ина многа увЂщавааше я съ вьсякыимь съмЂрениемь и съ сльзами учаше вься. Не бо николиже бЂ напраснъ, ни гнЂвьливъ, ни яръ очима, нъ милосьръдъ и тихъ, и милость имЂя къ вьсЂмъ. ТЂмьже и аще къто от святааго стада раслабЂлъ бЂ сьрьдцьмь, отидяше от манастыря, то же блаженый его ради въ велицЂ печали и скърби будяше и моляся къ богу, дабы отблудивъшееся овьча от стада его възвратилъ въспять. И такоже по вься дьни прЂбываше плача и моля бога его ради, донъдеже братъ тъ възвратяшеся въспять. То же того блаженый съ радостию приимъ учаше и́ никакоже раслабЂти вражиями къзньми, ни попустити имъ на ся, нъ крЂпЂ стати. Се бо глаголааше яко «не мужьскыя есть душа, еже раслабЂти печальныими сими напастьми». Си и ина многа глаголавъ, утЂшивъ того, отпустяаше въ келию его съ миръмь.

БЂ же ту единъ братъ слабъ сы, иже и часто отбЂгаше от блаженаго манастыря, и егда пакы приидяше, то же блаженый съ радостию его приимаше, глаголаше бо, яко не имать бо его оставити тако, да кромЂ манастыря сего съконьчаеться. Се бо аще и многашьды отходя есть от насъ, нъ сь имать въ манастыри семь коньць житию прияти. И моляше съ плачьмь бога о немь, прося тьрьпЂния ему. Таче по мнозЂмь исхожении ему, приде единою къ манастырю, моляся великому Феодосию, дабы приятъ былъ. То же, иже поистинЂ милостивый и, яко овьча от заблуждения пришьдъшее, тако того съ радостию приятъ и причьте къ стаду своему. Тъгда же чьрьноризьць тъ, иже бЂ своима рукама дЂлая, сътяжалъ имЂния мало, бЂ бо платьна дЂлая, сия принесъ, прЂдъ блаженыимь положи. То же святый глагола ему: «Аще хощеши чьрноризьць съвьрьшепъ быти, възьмъ сия, яко ослушания дЂло есть, въвьрьзи въ пещь горущу». Онъ же, иже теплъ сый на вЂру, несъ, по повелЂнию блаженаго въвьрьже въ пещь, и тако изгорЂ. Самъ же оттолЂ живяше въ манастыри томь, прочая дьни своя проводя, и тако ту по проречению блаженаго усъпе съ миръмь. Сицева ти бЂ любы блаженаго, и сицево милосьрьдие къ ученикомъ своимъ имяше, дабы ни едипъ от стада его отлучилъся, нъ вься въкупЂ, яко пастухъ добрый, пакы пасяше, уча и утЂшая и словесы увЂщавая душа ихъ, къръмляше и напаяя не престаяше. ТЂмьже и мъногы на божий разумъ наводяше и къ небесьному царствию направляше. Нъ се пакы на прокое отселЂ съповЂдание отьца нашего Феодосия поидемъ.

Се бо въ единъ от дний приде келарь къ сему блаженому глаголя, яко въ сий дьнь не имамъ, что прЂдъложити на ядь, се бо ни съварити чьто имамъ. Глагола тому блаженый: «Иди, потьрьпи мало, моля бога, некъли тъ попечеться нами. Аще ли же, то да съваривъше пьшеницу, ти ту, съмятъ съ медъмь, прЂдъставиши на тряпезЂ братии, да Ђдять. Обаче же надЂюся на бога, иже въ пустыни людьмъ непокоривыимъ хлЂбъ небесьный одъжди и источи крастЂли. Тъ и намъ дьньсь мощьнъ есть пищю подати». То слышавъ келарь отиде. И блаженый моляше бога о сихъ. И се прЂжереченый онъ боляринъ, богу ему възложьшю на умъ, се бо напълнивъ три возы брашьна: хлЂбъ, и сыръ, и рыбъ, сочиво же и пьшено, еще же и медъ, и то посъла къ блаженому въ манастырь. И еже видЂвъ, блаженый прослави бога и глагола келарю:

«Видиши ли, брате Феодоре, яко не имать насъ богь оставити, аще надЂемъся на нь вьсЂмь сьрьдцьмь. Нъ иди и сътвори обЂдъ братии великъ въ сий дьнь, се бо посЂщение божие есть». И тако блаженый възвеселися съ братиею на обЂдЂ веселиемь духовьныимь, бЂ же самъ Ђда хлЂбъ сухъ и зелие варено без масла и воду пия — се же Ђдь его бЂ вьсегда. И николиже его бЂ видЂти дряхла или съньзъшася на обЂдЂ сЂдяща съ братиею, нъ вьсегда весело лице имуща и благодатию божиею бЂ утЂшаяся.

Къ сему же блаженому нЂколи приведоша разбойникы съвязаны, ихъ же бЂша яли въ единомь селЂ манастырьскЂ, хотяща красти. Блаженый же, видЂвъ я съвязаны и въ такой скърби суща, съжалиси зЂло и, просльзивъся, повелЂ раздрЂшити я и дати же тЂмъ Ђсти и пити. И тако пакы тЂхъ учаше мъного, еже никогоже прЂобидЂти и никомуже зъла сътворити. Подасть же тЂмъ от имЂния довъльное, еже на потрЂбу, и тако тЂхъ съ миръмъ отпусти, славяща бога, якоже оттолЂ тЂмъ умилитися и никомуже зъла сътворити, нъ своими дЂлы довъльномъ быти.

Таково бо бЂ милосьрьдие великааго отьца нашего Феодосия, аще бо видяше нища или убога, въ скърьби суща и въ одежи худЂ, жаляашеси его ради и вельми тужаше о семь и съ плачьмь того миновааше. И сего ради сътвори дворъ близь манастыря своего и цьркъвь възгради въ немь святааго пьрьвомученика Стефана, ту же повелЂ прЂбывати нищимъ и слЂпыимъ и хромыимъ и трудоватыимъ, и от манастыря подавааше имъ еже на потрЂбу и от вьсего сущаго манастырьскааго десятую часть даяше имъ. И еще же и по вься суботы посылаше въ потребу возъ хлЂбъ сущиимъ въ узахъ.

Въ единъ же от дьнии приде къ преподобьнуму Феодосию прозвутеръ от града, прося вина на служьбу святыя литурьгия. И ту абие блаженый, призъвавъ строителя цьркъвьнаго, повелЂ налияти вина, юже ношаше викию, и дати ему. Онъ же глагола, яко «мало имамъ вина, еже тъкъмо довълЂеть на 3, или на 4 дьни святЂй литурьгии». Блаженый же отвЂща ему: «ИзлЂй вьсе человЂку сему, и нами богъ да попечеться». Онъ же отшьдъ и прЂобидЂвъ святааго повелЂния, вълия ему въ викию мало вина, оставивъ на утрия цьркъвьнЂй служьбЂ. Прозвутеръ же, несъ, еже мало ему въда, показа блаженому Феодосию. И пакы призъвавъ пономонаря, глагола ему: «РЂхъ ти, излЂй вьсе и о утрЂйшьниимь дьне не пьцися, не бо имать богъ оставити цьркве сея въ утрий дьнь бе-служьбы, нъ се въ сий дьнь подасть намъ вина до избытъка». Тъгда же, шьдъ, пономонарь излия вьсе вино прозвутерови и тако и́ отъпусти. Таче по отъЂдении къ вечеру сЂдящемъ имъ, и се по проречению блаженаго привезоша 3 возы пълъны суще къръчагъ съ винъмь, ихъ же посъла жена нЂкая, иже бЂ прЂдьрьжащи вься въ дому благовЂрьнааго князя Вьсеволода. Си же видЂвъ, парамонарь прослави бога, чюдяся проповЂданию блаженаго Феодосия, еже якоже рече: «Въ сий дьнь вина до избытъка богъ подасть намъ», — такоже и бысть.

Бывъшю же нЂколи дьни святаго и великаго Димитрия, въ нь же Христа ради мучению коньць приятъ, преподобьному же Феодосию съ братиею идущу въ манастырь святаго Димитрия, и се принесоша ему хлЂбьцЂ нЂ от кыихъ зЂло чисты, ихъ же повелЂ келарю прЂдъложити на ядь оставъшии ту братии. И то же онъ, прЂслушавъся того, помысли въ себЂ, глаголя, яко «въ утрЂй дьнь, пришьдъши вьсей братии, прЂдъложю сия хлЂбы на Ђдь имъ; нынЂ же манастырьскый хлЂбъ и да прЂдъложю сей братии». Якоже помысли, такоже и сътвори. И въ утрЂй дьнь сЂдъшемъ имъ на обЂдЂ, хлЂбомъ же тЂмъ издрЂзаномъ сущемъ, таче блаженый прЂзьрЂвъ и видЂ хлебы такы суща, и, пригласивъ келаря, въпрашаше его, откуду си суть хлЂби. Онъ же отвЂщева, яко «вьчера принесени суть, нъ сего ради вьчера малу сущю братии, помыслихъ въ сий день вьсей братии прЂдъложити на ядь». Тъгда же блаженый глагола ему: «ЛЂпо бЂ не пещися о приходящимь дьни, нъ по повелЂнию моему сътворити. И нынЂ бы господь нашь и присно печеться нами, большими попеклъся и подалъ намъ еже на потрЂбу». Таче повелЂ единому от братиЂ събьрати въ кошь укрухы ты и, несъше, посрЂдЂ рЂкы въсыпати Ђ, оного же епитимиею утвьрьди, якоже прЂслушание сътворыла.

Сицимь же образъмь творяаше, еже аще слышаше кое дЂло творимо, благословению пьрвое не възяту бывъшю, не бо хотяаше, да святое стадо того таковааго брашьна въкусити, еже не благословлениемь сътворено и от прЂслушания суще, нъ се яко вражию часть сущю повелЂваше овъгда въ пещь горущю въмЂтати, овъгда же въ рЂчьныя струя въврЂщи.

Се же якоже по съмьрьти блаженаго отьца нашего Феодосия сицева нЂкака от прЂслушания вещь бысть, еже аще нЂсть лЂпо сьде съповЂдати ея, имь же на въспомяновение того приидохомъ и сему подобьно слово къ слову приложимъ.

Се бо по изгънании еже от манастыря преподобьнааго нашего игумена Стефана и великому Никону игуменьство прЂимъшю, приспЂвъшемъ же дьньмъ святааго и великаго поста. И въ 1-вую недЂлю таковаго въздьрьжания и яко добрыимъ подвижьникомъ потрудивъшемъся въ ту недЂлю, тЂмьже уставлено бысть преподобьныимь отьцьмь нашимь Феодосиемь, въ пятокъ тоя недЂля да бывають инъ хлЂби чисти зЂло, друзии же от нихъ съ медъмь и съ макъмь творени. То же тако повелЂвъшу Никону по обычаю творити келарю, онъ же прЂслушанию творя, сълъга, рекый яко «мукы не имамъ на сътворение такыимъ хлЂбомъ». Нъ обаче богъ не прЂзьрЂ труда и молитвы преподобьныихъ своихъ, и да пакы не разориться уставленое божьствьнымь Феодосиемь. Се бо по святЂй литурьгии идущемъ тЂмъ на постышя ты обЂды, се отнюду же бЂ не начаятися тоже, тако ти привезоша возъ таковыихъ хлЂбъ. Еже видЂвъше братия прославиша бога, чюдящеся, како присно богъ печеться ими, подавая вься имъ, еже на потрЂбу, молитвами преподобьнааго имъ отьца и наставьника Феодосия. Таже по дъвою дьнью повелЂвъшю келарю, да по обычаю хлЂбы братии испекуть въ муцЂ той, ея же бЂ прЂже реклъ «не имамъ», то же пекущиимъ готовящемъ и тЂсто мЂсящемъ и пакы имъ лЂющемъ укропъ въ не, и се обрЂтеся ту жаба, якоже той варенЂ быти въ таковЂй водЂ и такоже то тЂмъ осквьрьни, иже от прЂслушания твореное дЂло. Богу сице извольшю на съблюдение святаго стада, иже и таковъ подвигъ сътворьше въ святую ту недЂлю, то же да не таковыихъ хлЂбъ въкусять. Нъ се, яко вражию часть сущю, гадъмь осквьрьни сию богъ, якоже на показание тому быти. Еже о семь да не зазьрить ми никътоже от васъ, яко сии сьде въписахъ и прЂсЂчение слову сътворихъ: се бо сего ради си въписахъ, да разумЂете, яко нЂсть лЂпо намъ ни въ чемь же ослушатися наставьника игумена своего, вЂдуще, яко аще чьто утаимъ от него, нъ от бога нЂсть потаено ничьтоже, и тъ имать въскорЂ мьсть сътворити о немь, его же постави намъ старЂйшину и пастуха, яко да вьси послушають его и по повелЂнию его вься сътворимъ.

Обаче же уже на пьрьвое съповЂдание възвратимъся, яже о блаженЂмь Феодосии исповЂдающе.

Се бо приспЂвъшю нЂколи праздьнику Усъпения прЂсвятыя богородиця, бЂша же и цьркви творяще праздьникъ въ тъ дьнь, маслу же не сущю дрЂвяному въ кандила на вълияние въ тъ дьнь. Помысли строитель цьркъвьный въ сЂмени льнянЂмь избити масла, и то, вълиявъше въ кандила, въжещи. И въпросивъ о томь блаженаго Феодосия, и оному повелЂвъшю сътворити тако, якоже помысли. И егда въсхотЂ лияти въ кандило масло то, и се видЂ мышь въпадъшю въ не, мьрътву плавающу въ немь. Таче скоро шьдъ, съповЂда блаженому, глаголя, яко «съ вьсякыимь утвьрьженеемь бЂхъ покрылъ съсудъ тъ съ маслъмь, и не вЂдЂ, откуду вълЂзе гадъ тъ и утопе». То же блаженый помысли, яко божие есть съмотрение се. Похуливъ же свое невЂрьство, глагола тому: «ЛЂпо бы намъ, брате, надежю имЂти къ богу уповающе, яко мощьнъ есть подати намъ на потрЂбу, его же хощемъ. А не тако, невЂрьствовавъше, сътворити, его же не бЂ лЂпо. Нъ иди и пролЂй масло то на землю. И мало потьрьпимъ, моляще бога, и тъ имать намъ дати въ сий дьнь до избытька дрЂвянаго масла». Таче уже бывъшю году вечерьнюму, и се нЂкъто от богатыихъ принесе къръчагу велику зЂло, пълъну масла дрЂвянааго. Ю же видЂвъ, блаженый прослави бога, яко тъ въскорЂ услыша молитву ихъ. И тако налияша кандила вься, и избыся его большая часть. И тако сътвориша на утрЂй дьнь праздьникъ свЂтьлъ святыя богородиця.

Боголюбивый же кънязь Изяславъ, иже поистинЂ бЂ теплъ на вЂру, яже къ господу нашему Исусу Христу и къ прЂчистЂй матери его, иже послЂже положи душю свою за брата своего по господню гласу, сь любъвь имЂя, якоже речеся, не просту къ отьцю нашему Феодосию, и часто приходя къ нему, и духовьныихъ тЂхъ словесъ насыщаяся от него. И тако въ единъ от дьний пришьдъшю тому, и въ цьркви сЂдящема има на божьствьнЂй тои бесЂдЂ, и годъ бысть вечерьний. Тако же сий христолюбьць обрЂтеся ту съ блаженыимь и съ чьстыгаю братиею на вечерьниимь славословии. И абие божиею волею дъждю велику лЂющюся, блаженый же, видЂвъ тако належание дъждю, призъвавъ же келаря, глагола ему: «Да приготовиши на вечерю брашьна на ядь кънязю». Тъгда же приступи къ нему ключарь, глаголя: «Господи отьче! Меду не имамъ, еже на потрЂбу пити кънязю и сущиимъ съ нимь». Глагола тому блаженый: «Ни ли мало имаши?» ОтвЂща онъ: «Ей, отьче, яко ни мало не имамъ, бЂаше бо, якоже рече, опроворотилъ таковый съсудъ тъщь и ниць положилъ». Глагола тому пакы блаженый: «Иди и съмотри истЂе, еда осталося или мало чьто от него будеть». Онъ же отвЂщаваше рекый: «Ими ми вЂру, отьче, яко и съсудъ тъ, въ немь же бЂ таковое пиво, опровратихъ и тако ниць положихъ». То же блаженый, иже поистинЂ испълъненъ духовьныя благодЂти, глагола тому сь: «Иди по глаголу моему и въ имя господа нашего Исуса Христа обрящеши медъ въ съсудЂ томь». Онъ же, вЂру имъ блаженому, отъиде, и пришьдъ въ храмъ, и по словеси святааго отьца нашего Феодосия обрЂте бъчьвь ту пра†положену и пълъну сущю меду. Въ страсЂ же бывъ и въскорЂ шьдъ, съповЂда блаженому бывъшее. Глагола тому блаженый: «Мълъчи, чаДо, и не рьци никомуже о томь слова, нъ иди и носи, елико ти на трЂбу кънязю и сущиимъ съ нимь; и еще же и братии подай от него, да пиють. Се бо благословление божие есть». Таче пакы дъждю прЂставъшю, отъиде христолюбьць въ домъ свой. Бысть же тако благословление въ дому томь, якоже на мъногы дьни довъльномъ имъ тЂмь быти.

Въ единъ же пакы от дьний от единоя вьси приде мьнихъ манастырьскый къ блаженому отьцю нашему Феодосию, глаголя, яко «въ хлЂвинЂ, идеже скотъ затваряемъ, жилище бЂсомъ есть, тЂмьже и многу пакость ту творять въ немь, якоже не дадуще тому ясти. Многашьды же и прозвутеръ молитву творить и водою святою покрапляя, то же никако: осташася зълии ти бЂси, творяще муку и доселЂ скоту». Тъгда же отьць нашь Феодосий въоруживъся на ня постъмь и молитвою по господню гласу, еже рече: «Сь родъ изгониться ничимьже, тъкъмо молитвою и постъмь». ТЂмьже уповая блаженый, яко имать прогънати я от мЂста того, якоже дрЂвле от мЂсильниця. И прииде въ село то и вечеръ въниде единъ въ хлЂвину ту, идеже бЂси жилище имяхуть, и, затворивъ двьри, ту же прЂбысть до утрьняя, молитву творя. Якоже от того часа не явитися бЂсомъ на то мЂсто, се же ни въ дворЂ пакости творити никомуже. Молитвами преподобьнааго отьца нашего Феодосия, яко се оружиемь отгънани быша от вьси тоя. И тако пакы блаженый приде въ манастырь свой, яко храбъръ сильнъ, побЂдивъ зълыя духы, пакостьетвующа въ области его.

Пакы же нЂколи въ единъ от дьний къ сему блаженому и преподобьному отьцю нашему Феодосию приде старЂй пекущиимъ, глаголя, яко «мукы не имамъ на испечение хлЂбомъ братии». Глагола тому блаженый: «Иди, съглядай въ сусЂцЂ, еда како мало мукы обрящеши въ немь, донъдеже пакы господь попечеться нами». Онъ же вЂдяашеся, яко и помелъ бЂ сусЂкъ тъ и въ единъ угълъ мало отрубъ, яко се съ троЂ или съ четверы пригъръще, тЂмьже глаголааше: «Истину ти вЂщаю, отьче, яко азъ самъ пометохъ сусЂкъ тъ, и нЂсть въ немь ничьсоже, раз†мало отрубъ въ угълЂ единомь». Глагола тому отьць: «ВЂру ми ими, чадо, яко мощьнъ есть богъ, и от тЂхъ малыихъ отрубъ напълънить намъ сусЂкъ тъ мукы, иже якоже и при Илии сътвори въдовици оной, умъноживъ от единЂхъ пригъръщь мукы множьство, якоже прЂпитатися ей съ чады своими въ гладьное врЂмя, донъдеже гобино бысть въ людьхъ. Се бо нынЂ тъ же есть, и мощьнъ есть и такоже и намъ от мала мъного сътворити. Нъ иди и съмотри, еда благословление будеть на сусЂцЂ томь». То же слышавъ, онъ отъиде, и яко въниде въ храмъ тъ, ти видЂ сусЂкъ тъ, иже бЂ пьрьвЂе тъщь, и молитвами преподобьнааго отьца нашего Феодосиа пълънъ сущь мукы, якоже прЂсыпатися ей чрЂсъ стЂну на землю. Тъгда же въ ужасти бысть, видя таковое прЂславьное чюдо и, въспятивъся, блаженому съповЂда. То же святый къ тому: «Иди, чадо, и не яви никомуже сего, нъ сътвори по обычаю братии хлЂбы. Се бо молитвами преподобьныя братия нашея посъла богъ милость свою къ намъ, подая намъ вься на потрЂбу, его же аще хощемъ».

Тако ти тъщание бЂ къ богу надежа преподобьнаго Феодосиа и тако упование имяаше къ господу нашему Исусу Христу, якоже не имЂти надежа о земьныихъ никоеяже, ни уповати же ни о чемь же въ мирЂ семь, нъ бЂ вьсею мыслию и вьсею душею къ богу въскланяяся и на того вьсе упование възложь, никакоже пекыйся о утрьнимь дьне и господень глас по вься дьни имяаше на памяти сьрьдця своего, еже рече: «Не пьцЂтеся ни о чемь же и съмотри же пътиць небесьныхъ, како не сЂють, ни жьнють, ниже събирають въ житьниця своя, нъ отьць небесьный питаеть я, кольми паче тЂхъ уньше есте вы». ТЂмьже по вься нощи моляшеся къ богу съ сльзами о стадЂ своемь глаголя: «Яко ты нынЂ еси, владыко, съвъкупилъ въ мЂсто се, и аще годЂ. ти есть жити намъ въ немь, буди намъ помощьникъ и податель вьсЂмъ благыимъ. Се бо въ имя прЂсвятыя матере твоея възграженъ бысть домъ сий. Мы же пакы въ твое имя събьраны въ нь, и ты съблюди ны и съхрани от вьсякого съвЂта вьселукавааго врага и съподоби ны получити вЂчьную жизнь. Присно же вълагай въ сьрьдьця наша страхъ твой, яко да тЂмь причастимъ благая она, яже уготова правьдьникомъ». И тако пакы по вься дьни прЂбывааше, братию уча, и утЂшая, и запрЂщая же никакоже раслабЂти, нъ крЂпЂ быти на вься труды чьрьньчьскыя. И тако прилежаниемь стадо свое пасяаше, блюды и́, еда нЂкако зълокъзньный вълъкъ, въшьдъ, распудить божьствьное то стадо.

ТЂмьже о семь, якоже и человЂку нЂкоему христолюбиву и боящюся бога явлениемь открыся еже о блаженЂмь и преподобьнЂмь отьци нашемь Феодосии и о прЂчистЂй того и непорочьнЂй молитвЂ, еще же и о святЂмь того манастыри, и от того пакы показуя ино мЂсто, якоже тЂмъ ту прЂселитися.

Есть бо мала гора, надълежащи надъ манастырьмь тЂмь, и человЂку тому туда вь нощи по ней Ђдущю, и се видЂти тому чюдо испълънь ужасти. Нощи бо сущи тьмьнЂ, свЂтъ же прЂчюдьнъ тъкъмо надъ манастырьмь блаженааго, и се, яко възьрЂвъ, видЂ прЂподобьнааго Феодосия въ свЂтЂ томь, посрЂдЂ манастыря прЂдъ цьрквию стояща, руцЂ же на небо въздЂвъшю и молитву къ богу прилЂжьно творяща. Таче тому зьрящю и чюдящюся о томь, и се ино чюдо явльшеся тому: пламень великъ зЂло от вьрьха цьркъвьнааго ишьдъ и, акы комара сътворивъся, прЂиде на другый хълъмъ, и ту тЂмь коньцьмь ста, идеже блаженый отьць нашь Феодосий цьркъвь назнамена, начатъ зьдати послЂже. Се же якоже и донынЂ есть на мЂстЂ томь манастырь славьнъ. Сий же тако пламень тъ являшеся тому, яко дуга стоя единЂмь коньцьмь на вьрьху цьркъвьнЂмь, таче и другыимь на нареченЂмь мЂстЂ, донъдеже тому заЂхавъшю за гору не видЂти того. Се же якоже то самъ видЂвъ, исповЂда единому от братия въ манастыри блаженааго, иже истиньна суть. ТЂмьже есть лЂпо намъ съ божьствьныимь Ияковъмь рещи, яко есть господь на мЂстЂ семь и есть свято мЂсто се и нЂсть ино, нъ се домъ божий и си врата небесьная.

И се же пакы подобьно есть рещи, еже яко пишеться таково о святЂмь и велицЂмь СавЂ. Се бо въ едину нощь такоже тому шьдъшю ис келия своея и молящюся, и се показася тому стълъпъ огньнъ до небесе сущь. Таче потомь, якоже дошьдъ мЂста того, и обрЂте въ немь пещеру и ту тако въ мало дьний сътвори манастырь славьнъ. Такоже и сьде разумЂвати есть, богу назнаменавъшю мЂсто то, еже яко видЂти есть манастырь славьнъ сущь на мЂстЂ томь, иже и донынЂ есть молитвами его цвьтущь.

Сицева ти бЂ блаженаго отьця нашего Феодосия молитва еже къ богу о стадЂ своемь и о мЂстЂ томь, и сицево бъдЂние и несъпание по вься нощи, и тако сияше яко свЂтило прЂсвЂтьло въ манастыри томь.

ТЂмьже тако того молитвами благый богъ ино пакы чюдо показа о святЂмь томь мЂстЂ человЂкомъ близь ту живущемъ, иже якоже и послЂже съповЂдаша вьсей братии бывъшее. Въ едину бо нощь слышаша гласъ бещисльно поющиихъ. То же яко ти слышаша глас тъ, въсташа от ложь своихъ и, ишьдъше исъ храмъ и на высоцЂ мЂстЂ ставъше, съмотряху гласа того. Сияше бо и свЂтъ великъ надъ манастырьмь блаженаго, и се видЂша мъножьство чьрьноризьць исходящь отъ ветъхыя цьркве и бяхуть грядуще на нареченое мЂсто, носяху же прЂди икону святыя богородиця. Вьси иже ти въ слЂдъ идуще, пояху, и вьси въ рукахъ свЂщЂ горущЂ имяхуть, прЂдъ ними же идяше преподобьный отьць ихъ и наставьникъ Феодосий. Таче дошьдъше мЂста того, ту же пЂние и молитву сътворьше, възвращахуся въспять. И, якоже тЂмъ зьрящемъ, вънидоша пакы поюще въ ветъхую цьрькъвь. Се ж.е не единъ, ни дъва видЂста, нъ мънози людие, видЂвъше сия, съповЂдааху. Си же, якоже разумЂти есть, аньгеломъ сице явльшимъся быти, имь же от братия ни единому же сихъ чювъшю, богу сице извольшю и съкрывъшю отъ нихъ тайну сию. И якоже послЂже слышавъше, прославиша бога, творящааго чюдеса велика и прославляющааго мЂсто то и освящающа е молитвами преподобьнааго отьца нашего Феодосия.

Нъ се пакы лЂпо есть намъ сия съповЂдавъше на прокое похваление блаженааго съказание поити и яже о немь достойная съ истиною исповЂдающе, еже по господи нашемь ИсусЂ ХристЂ того рьвьние. Се бо и сиць обычай имяше блаженый, якоже многашьды въ нощи въстая и отай вьсЂхъ исхожааше къ жидомъ, и тЂхъ еже о ХристЂ прЂпирая, коря же и досажая тЂмъ, и яко отметьникы и безаконьникы тЂхъ нарицая, жьдаше бо еже о Христо†исповЂдании убиенъ быти.

И се же якоже бЂ отъходя въ постьныя дьни въ прЂжЂреченую пещеру и оттуду пакы многашьды, якоже того не вЂдущю никомуже, въ нощи въставъ и, богу того съблюдающю, отходяаше единъ на село манастырьско, и ту уготованЂ сущи пещерЂ въ съкръвенЂ мЂстЂ, и никомуже того вЂдущю, прЂбывааше въ ней единъ до вьрьбьныя недЂля, и такоже пакы прЂидяше пакы въ нощи въ прЂжереченую пещеру, и оттуда въ пятъкъ вьрьбьныя недЂля къ братии излазяаше, якоже тЂмъ мьнЂти, ту ему прЂбывъшю въ постьныя дьни. И тако прЂбывааше, не дадый себЂ покоя бъдЂниемь и молитвами вьсЂми нощьныими о стадЂ своемь, моля бога и того призывая помощьника имъ быти о вьсякомь подвизЂ ихъ, и по вься нощи обиходя дворъ манастырьскый и молитву творя, и тою огражая и яко градъмь твьръдъмь стрЂгый, яко да не въшьдъ змий лукавый плЂнить кого от ученикъ его. И тако бЂ оградилъ вься области его манастырьскыя.

Се бо нЂколи ятомъ бывъшемъ мужемъ разбой творящемъ от нЂкыихъ стрЂгущиихъ дому своего, и бысть съвязаномъ имъ сущемъ и ведомомъ въ градъ къ судии. И се по изволению божию сълучися имъ миновати мимо едино село манастырьское, и единъ от зълодЂй тЂхъ съвязаныихъ, покывавъ главою на село то, глаголааше якоже «нЂколи въ едину нощь приидохомъ къ двору тому, разбой хотяще творити и поимати вься сущая, и видЂхомъ градъ сущь высокъ зЂло, яко не мощи намъ приближитися емь». Сице бо бЂ благый богъ оградилъ невидимо вься та съдьрьжания молитвами правьдьнааго и преподобьнааго сего мужа. ТЂмьже и божьствьный Давыдъ о семь прЂдъизвЂща, рекый: «Очи господьни на правьдьныя и уши его въ молитву ихъ». Присно бо владыка, съзьдавый ны, прикладаеть слуха своя на послушание призывающимъ и въистину, и такоже молитву ихъ услышавъ, спасе я. Сьде же по воли ихъ и прошению вься творить, имъ же упъвающиимъ на нь.

Сицево преподобьному и прЂблаженому отьцю нашему Феодосию пасущю стадо свое съ вьсякыимь благочьстиемь и чистотою и еще же и житие свое съ въздьрьжаниемь и подвигъмь исправляющю, бысть въ то врЂмя съмятение нЂкако от вьселукавааго врага въ трьхъ кънязьхъ, братии сущемъ по плъти, якоже дъвЂма брань сътворити на единого старЂйшааго си брата, христолюбьца, иже поистинЂ боголюбьця Изяслава. То же тако тъ прогънанъ бысть от града стольнааго, и онЂма, пришьдъшема въ градъ тъ, посылаета же по блаженааго отьца нашего Феодосия, бЂдяща того прити къ тЂма на обЂдъ и причетатися неправьдьнЂмь томь съвЂтЂ. То же, иже бЂ испълъненъ духа святого, преподобьный же Феодосий разумЂвь, еже неправьдыю суще изгънание, еже о христолюбьци, глаголеть посъланому, яко не имамъ ити на тряпезу Вельзавелину и причаститися брашьна того, испълнь суща кръви и убийства. И ина же многа укоризьна глаголавъ, отпусти того, рекый, яко да възвЂстиши вься си посълавъшимъ тя.

Нъ обаче она, аще и слышаста си, нъ не възмогоста прогьЂватися на нь, видяста бо правьдьна суща человЂка божия, ни пакы же послушаста того, нъ устрьмистася на прогънание брата своего, иже от вьсея тоя области отъгънаста того, и тако възвратистася въспять. И единому сЂдъшю на столЂ томь брата и отьца своего, другому же възвративъшюся въ область свою,

Тъгда же отьць нашь Феодосий, напълнивъся святаго духа, начатъ того обличати, яко неправьдьно сътворивъша и не по закону сЂдъша на столЂ томь, и яко отьця си и брата старЂйшаго прогънавъша. То же тако обличаше того, овъгда епистолия пиша, посылааше тому, овъгда же вельможамъ его, приходящемъ къ нему, обличааше того о неправьдьнЂмь прогънании брата, веля тЂмъ повЂдати тому. Се же и послЂже въписа къ нему епистолию велику зЂло, обличая того и глаголя: «Глас кръве брата твоего въпиеть на тя къ богу, яко Авелева на Каина». И инЂхъ многыихъ дрЂвьниихъ гонитель, и убойникъ, и братоненавидьникъ приводя, и притъчами тому вься еже о немь указавъ и тако въписавъ, посъла. И яко тъ прочьте епистолию ту, разгнЂвася зЂло, и яко львъ рикнувъ на правьдьнааго, и удари тою о землю. И якоже отътолЂ промъчеся вЂсть, еже на поточение осужену быти блаженому. Тоже братия въ велицЂ печали быша и моляаху блаженааго остатися и не обличати его. Тоже такоже и от боляръ мънози приходяще повЂдахуть ему гнЂвъ княжь на того сущь и моляхуть и́ не супротивитися ему. «Се бо, — глаголааху, — на заточение хочеть тя посълати». Си же слышавъ блаженый, яко о заточении его рЂша, въздрадовася духъмь и рече къ тЂмъ: «Се бо о семь вельми ся радую, братие, яко ничьсоже ми блаже въ житии семь: еда благодатьство имЂнию лишение нудить мя? Или дЂтий отлучению и селъ опечалуеть мя? Ничьсоже от таковыихъ принесохомъ въ миръ сь, нъ нази родихомъся, такоже подобаеть намъ нагомъ проити от свЂта сего. ТЂмьже готовъ есмь или на съмьрьть». И оттолЂ начатъ того укаряти о братоненавидЂнии, жадааше бо зЂло, еже поточену быти.

Нъ обаче онъ, аще и вельми разгнЂвалъся бЂ ма блаженааго, нъ не дьрьзну ни единого же зъла и скьрьбьна сътворити тому, видяаше бо мужа преподобьна и правьдьна суща его. Якоже прЂже многашьды его ради завидяаше брату своему, еже такого свЂтилышка имать въ области своей, якоже съповЂдаше, слышавъ от того, чьрноризьць Павьлъ, игуменъ сый от единого манастыря, сущиихъ въ области его.

Блаженый же отьць нашь Феодосий, много молимъ бывъ от братьЂ и от вельможь, наипаче же разумЂвъ, яко ничьсоже успЂшьно сими словесы тому, остася его, и оттолЂ не укаряаше его о томь, помысливъ же въ себЂ, яко унЂ есть мольбою того молити, да бы възвратилъ брата си въ область свою.

Не по мнозЂхъ же дьньхъ разумЂвъ благый князь тъ прЂложение блаженааго Феодосия от гнЂва и утЂшение, еже от обличения того, въздрадовася зЂло, издавьна бо жадааше бесЂдовати съ нимь и духовьныихъ словесъ его насытитися. Таче посылаеть къ блаженому, аще повелить тому прити въ манастырь свой или ни? Оному же повелЂвъшу тому приити. То же сий, съ радостию въставъ, приде съ боляры въ манастырь его. И великому Феодосию съ братиею ишьдъшу ис цьркве и по обычаю сърЂтъшю того и поклоньшемася, якоже е лЂпо кънязю, и тому же цЂловавъшю блаженаго. Таче глаголааше се: «Отьче, не дьрьзняхъ приити къ тебЂ, помышляя, еда како гнЂваяся на мя и не въпустиши насъ въ манастырь». То же блаженый отвЂща: «Чьто бо, благый владыко, успЂеть гнЂвъ нашь еже на дьрьжаву твою. Нъ се намъ подобаеть обличити и глаголати вамъ еже на спасение души. И вамъ лЂпо есть послушати того». И тако же въшьдъшема въ цьркъвь и бывъши молит†сЂдоста, и блаженому Феодосию начьнъшю глаголати тому отъ святыихъ кънигъ, и много указавъшю ему о любъви брата. И оному пакы многу вину износящю на брата своего, и того ради не хотящю тому съ тЂмь мира сътворити. И такоже пакы по мнозЂй той беседЂ отъиде князь въ домъ свой, славя бога, яко съподобися съ таковыимь мужьмь бесЂдовати, и оттолЂ часто приходяше къ нему и духовьнаго того брашьна насыщаяся паче меду и съта: се же суть словеса блаженааго, яже исходяахуть от медоточьныихъ устъ тЂхъ. Многашьды же великый Феодосий къ тому хожаше и тако въспоминаше тому страхъ божий и любъвь еже къ брату.

И въ единъ от дьний шьдъшю къ тому благому и богоносьному отьцю нашему Феодосию, и яко въниде въ храмъ, идеже бЂ князь сЂдя, и се видЂ многыя играюща прЂдъ нимь: овы гусльныя гласы испущающемъ, другыя же оръганьныя гласы поющемъ, и инЂмъ замарьныя пискы гласящемъ, и тако вьсЂмъ играющемъ и веселящемъся, якоже обычай есть прЂдъ князьмь. Блаженый же, бЂ въскрай его сЂдя и долу нича и яко малы въсклонивъся, рече къ тому: «То будеть ли сице на ономь свЂтЂ?» То же ту абие онъ съ словъмь блаженааго умилися и малы просльзиси, повелЂ тЂмъ прЂстати. И оттолЂ, аще коли приставяше тыя играти, ти слышааше блаженаго пришьдъша, то повелЂвааше тЂмъ прЂстати от таковыя игры.

Многашьды же пакы, егда възвЂстяхуть приходъ тому блаженаго, то же, тако ишьдъ, того сърЂташе, радуяся, прЂдъ двьрьми храму, и тако вънидоста оба в храмъ. Се же, якоже веселяся, глаголаше преподобьному: «Се, отьче, истину ти глаголю: яко аще быша ми възвЂстили отьця въставъша отмьртвыихъ, не быхъ ся тако радовалъ, яко о приходЂ твоемь. И не быхъ ся того тако боялъ или сумьнЂлъ, яко же преподобьныя твоея душа». Блаженый же тоже: «Аще тако боишися мене, то да сътвори волю мою и възврати брата своего на столъ, иже ему благовЂрьный отьць твой прЂдасть». Онъ же о семь умълъче, не могый чьто отвЂщати къ симъ, тольми бо бЂ и́ врагъ раждьглъ гнЂвъмь на брата своего, яко ни слухъмь хотяше того слышати. Отьць же нашь Феодосий бЂ по вься дьни и нощи моля бога о христолюбьци ИзиславЂ, и еще же и въ ектении веля того поминати, яко стольному тому князю и старЂйшю вьсЂхъ, сего же, якоже рече, чрЂсъ законъ сЂдъшю на столЂ томь, не веляше поминати въ своемь манастыри. О семь же едъва умоленъ бывъ от братиЂ, повелЂ и того съ нимь поминати, обаче же пьрьвое христолюбьца, ти тъгда сего благаго.

Великый же Никонъ, видЂвъ таковое съмятение въ князихъ суще, отънде съ инЂма дъвЂма чьрьноризьцема въ прЂжереченый островъ, идеже бЂ манастырь съставилъ, и блаженому Феодосию мъного того моливъшю, яко да не разлучитися има, донъдеже еста въ пЛъти, и не отходити ему от него. Обаче онъ не послушавъ его о томь, нъ, якоже рече, отъйде въ свое мЂсто.

Тъгда же отьць нашь Феодосий, напълнивъся духа святааго, начатъ благодатию божиею подвизатися, якоже въселити тому въ другое мЂсто, помагающу тому святому духу, и цьркъвь же велику камениемь възградити въ имя святыя богородиця и приснодЂвыя Мария, пьрьвЂй бо цьркви древянЂ сущи и малЂ на приятие братии.

Въ начатъкъ же таковааго дЂла събьрася множьство людий, и мЂсто на възгражение овЂмъ ова кажющемъ, инЂмъ же ино, и вьсЂхъ не бЂ подобьно мЂсто княжю полю, близь прилежащю. И се по строю божию бЂ благый князь Святославъ туда минуя и, видЂвъ многъ народъ, въпроси, чьто творять ту. И якоже увЂдЂвъ, и съвративъ коня, приЂха къ нимъ, и, яко от бога подвиженъ, показа тЂмъ мЂсто на своемь поли, веля ту възградити ту таковую цьркъвь. Се же якоже и по молит†тому самому начатъкъ копанию положити. БЂаше же и самъ блаженый Феодосий по вься дьни съ братиею подвизаяся и тружая о възгражении таковаго дому. Обаче аще и не съвьрьши его живъ сы, нъ се и по съмьрьти того, Стефану приимъшю игуменьство и богу помагающю тому молитвами преподобьнааго отьца нашего Феодосия, съвьрьшено дЂло и домъ съграженъ. Ту же братии преселивъшемъся, и онъдеже малу ихъ оставъшю, и съ тЂми прозвутеру и диякону, якоже по вься дьни и ту святая литурьгия съвьрьшаеться.

Се же житие преподобьнааго и блаженааго отьца машего Феодосия, еже от уны вьрьсты до сьде от многаго мало въписахъ. Къто бо довъльнъ вся по ряду съписати добрая управления сего блаженааго мужа, къто же възможеть по достоянию его похвалити! Аще бо искушюся того достойно противу исправлению его похвалити, нъ не възмогу — грубъ сы и неразумичьнъ.

Многашьды же сего блаженаго князи и епископи хотЂша того искусити, осиляюще словесы, нъ не възмогоша и акы о камыкъ бо приразивъшеся отскакаху, ограженъ бо бЂ вЂрою и надежею, еже къ господу нашему Иисусу Христу, и въ себе жилище святааго духа сътвори. И бысть въдовицямъ заступьникъ и сирыимъ помощьникъ и убогыимъ заступьникъ и, съпроста рещи, вься приходящая, уча и утЂшая, отпущааше, убогыимъ же подавая, еже на потрЂбу и на пищю тЂм.

Мънози же того от несъмысльныихъ укаряхуть, то же сий съ радостию та приимааше, се же якоже и от ученикъ своихъ многашьды укоризны и досажения тому приимати, нъ обаче онъ, бога моля за вься, прЂбываше. И еще же и о худости ризьнЂй мнози от невЂглас, усмихающеся тому, ругахуться. Онъ же и о томь не поскърьбЂ, нъ бЂ радуяся о поругании своемь и о укоризнЂ и вельми веселяся, бога о томь прославляше. Якоже бо аще къто не зная того, ти видяше и́ въ такой одежи суща, то не мьняаше того самого суща блаженааго игумена, нъ яко единого от варящиихъ. Се бо и въ единъ дьнь идущю тому къ дЂлателемъ, идеже бЂша цьркъвь зижющеи, сърЂте и того убога въдовиця, яже бЂ от судии обидима, и глагола тому самому блаженому: «Чьрьноризьче, повЂжь ми, аще дома есть иуменъ вашь?» Глагола той блаженый: «Чьто трЂбуеши от него, яко тъ человЂкъ есть грЂшьнъ?». Глагола тому жена: «Аще грЂшьнъ есть, не вЂмь, тъкъмо се вЂмь, яко многы избави от печали и напасти, и сего ради и азъ придохъ, яко да и мнЂ поможеть, обидимЂ сущи бес правьды от судии». Таче блаженый увЂдЂвъ, яже о ней, съжалиси, глагола той: «Жено! НынЂ иди въ домъ свой, и се, егда придеть игуменъ нашь, то же азъ възвЂщю ему, еже о тебЂ, и тъ избавить тя от печали тоя». То же слышавъши жена отъиде въ домъ свой, и блаженый иде къ судии и еже о ней глаголавъ тому, избави ту от насилия того, якоже тому посълавъшю възвратити той, имь же бЂ обидя ю.

Тако же сий блаженый отьць нашь Феодосий многыимъ заступьникъ бысть прЂдъ судиями и князи, избавляя тЂхъ, не бо можахуть ни въ чемь прЂслушати его, вЂдуше и́ правьдьна и свята. Не бо его чьстяху чьстьныихъ ради пърътъ, или свЂтьлыя одежа, или имЂния ради мъногаго, нъ чистаго его ради жития и свЂтьлыя душа, и поучение того многыихъ, яже кыпяхуть святымь духъмь от устъ его. Козьлины бо тому бЂахуть, яко многоцЂньная и свЂтьлая одежа, власяниця же, яко се чьстьная и цесарьская багъряниця, и тако, тЂмь величаяся, ходяше и житиемь богоугодьно поживъ.

И уже на коньць жития прЂшьдъ, прЂже увЂдЂвъ, еже къ богу свое отшьствие и дьнь покоя своего: правьдьныимъ бо съмьрьть покой есть.

Тъгда же уже повелЂ събьрати вьсю братию и еже въ селЂхъ или на ину кую потрЂбу шьли и, вься съзъвавъ, начатъ казати тиуны, и приставьникы и слугы, еже прЂбывати комужьдо въ порученЂй ему служьбЂ съ вьсякыимь прилежаниемь и съ страхъмь божиемь, въ покорении и любъви. И тако пакы вься съ сльзами учааше, еже о спасении души и богоугодьнЂмь житии и о пощении, и еже къ цьркви тъщание, и въ той съ страхъмь стояние, и о братолюбии, и о покорении, еже не тъкъмо къ старЂйшинамъ, нъ и къ съвьрьстьныимъ себЂ любъвь и покорение имЂти. Глаголавъ, отъпусти я, самъ же, вълЂзъ въ келию, начатъ плакатися, бия въ пьрьси своя, припадая къ богу и моляся ему о спасении души, и о стадЂ своемь и о мЂстЂ томь. Братия же, ишьдъше вънъ, глаголаху къ себЂ: «Чьто убо сий сицево глаголеть? Еда, къде отшьдъ, съкрытися хощеть въ тайнЂ мЂстЂ, ти жити единъ и намъ не вЂдущемъ его», — якоже многашьды въсхотЂ тако сътворити, нъ умоленъ бывааше о томь от князя и от вельможь, братии о томь паче молящися. И такоже и ту тако тЂмъ мьнящемъ.

Таче по сихъ блаженаго зимЂ възгрозивъши и огню уже лютЂ распальшу и́, и не могый къ тому ничьтоже, възлеже на одрЂ, рекъ: «Воля божия да будеть, и якоже изволися ему о мънЂ, тако да сътворить! Нъ обаче молю ти ся, владыко мой, милостивъ буди души моей, да не сърящеть ея противьныихъ лукавьство, нъ да приимуть ю ангели твои, проводяще ю сквозЂ пронырьство тьмьныихъ тЂхъ мытарствъ, приводяще ю къ твоего милосьрьдия свЂту». И си рекъ, умълъче, къ тому не могый ничьтоже.

Братии же въ велицЂ скърьби и печали сущемъ его ради. Потомь онъ 3 дьни не може ни глаголати къ кому, ниже очию провести, яко многыимъ мьнЂти, якоже уже умрЂтъ, тъкъмо же малы видяхуть и еже сущю душю въ немь. Таче по трьхъ дьньхъ въставъ, и братии же вьсей събьравъшися, глагола имъ: «Братие моя и отьци! Се, яко уже вЂмь, врЂмя житию моему коньчаваеться, якоже яви ми господь въ постьное врЂмя, сущю ми въ пещерЂ, изити от свЂта сего. Вы же помыслите въ себЂ, кого хощете, да азъ поставлю и́ вамъ въ себе мЂсто игумена». То же слышавъше, братия въ велику печаль и плачь въпадоша, и по сихъ излЂзъше вънъ и сами въ себЂ съвЂтъ сътвориша, и якоже съ съвЂта вьсЂхъ Стефана игумена въ себЂ нарекоша быти, деместика суща цьркъвьнааго.

Таче пакы въ другый дьнь блаженый отьць нашь Феодосий, призъвавъ вьсю братию, глагола имъ: «Чьто, чада, помыслисте ли въ себЂ, еже достойну быти въ вас игумену?». Они же вьси рекоша, яко Стефану достойну быти по тебЂ игуменьство прияти. Блаженый же, того призъвавъ и благословивъ, игумена имъ въ себе мЂсто нарече. Оны же много поучивъ, еже покарятися тому, и тако отпусти я, нарекъ имъ дьнь прЂставления своего, яко «въ суботу, по възитии сълньця, душа моя отлучиться от тЂлесе моего». И пакы же призъвавъ Стефана единого, учааше и́, еже о паст†святааго того стада, се бо и не отлучашеся от него, служа тому съ съмЂрениемь, бЂ бо уже болЂзнию лютою одьрьжимъ.

И якоже пришьдъши суботЂ и дьни освитающу, посълавъ, блаженый призъва вьсю братию, и тако по единому вься цЂлова, плачющася и кричаща о разлучении таковааго имъ пастуха. Блаженый же глагола имъ сице: «Чада моя любимая и братия! Се бо и утробою вься вы цЂлую, яко отхожю къ владыцЂ, господу нашему Исус Христу. И се вамъ игуменъ, его же сами изволисте. Того послушайте, и отьця того духовьнааго себЂ имЂйте, и того бойтеся, и по повелЂнию его вься творите. Богъ же, иже вься словъмь и прЂмудростию сътвори, тъ васъ благослови и сънабъди от проныриваго без бЂды, и неподвижиму и твьрьду яже къ тому вЂру вашю да съблюдеть въ единоумии и въ единой любъви до послЂдьняаго издыхания въкупЂ суще. Дай же вамъ благодать, еже работати тому бес прирока, и быти вамъ въ единомь тЂлЂ и единЂмь духъмь въ съмЂрении сущемъ и въ послушании. Да будете съвьрьшени, якоже и отьць вашь небесьный съвьрьшенъ есть. Господь же буди съ вами! И о семь же молю вы и заклинаю: да въ ней же есмь одежи нынЂ, въ той да положите мя тако въ пещерЂ, идеже постьныя дьни прЂбываахъ, ниже омывайте убогаго моего тЂла, и да никътоже от людий мене, нъ вы едини сами да погребете въ прЂжереченЂмь мЂстЂ тЂло се». Си же слышавъше братия от устъ святаго отьца плачь и сльзы изъ очию испущааху.

Блаженый же пакы утЂшая глаголааше: «Се обЂщаюся вамъ, братия и отьци, аще и тЂлъмь отхожю от васъ, нъ духъмь присно буду съ вами. И се, елико же васъ въ манастыри семь умьреть, или игуменъмь къде отсъланъ, аще и грЂхы будеть къто сътворилъ, азъ имамъ о томь прЂдъ богъмь отвЂщати. А иже отъидеть къто о себЂ от сего мЂста, то же азъ о томь орудия не имамъ. Обаче о семь разумЂйте дьрьзновение мое, еже къ богу: егда видите вься благая умножающаяся въ манастыри семь, вЂдите, яко близь владыкы небесьнааго ми сущю. Егда ли видите скудЂние суще и вьсЂмь умаляющеся, тъгда разумЂйте, яко далече ми бога быти и не имуща дьрьзновения молитися къ нему».

Таче по глаголЂхъ сихъ отпусти я вънъ вься, ни единого же у себе оставивъ. Единъ же от братиЂ, иже вьсегда служааше ему, малу сътворь скважьню, съмотряше ею. И се блаженый въставъ и ниць легъ на колЂну, моляше съ сльзами милостивааго бога о спасении душа своея, вься святыя призывая на помощь и наипаче же — святую владычицю нашю богородицю, и тою господа бога спаса нашего Исус Христа моля о стадЂ своемь, и о мЂстЂ томь. И тако пакы по молит†възлеже на мЂстЂ своемь и, мало полежавъ, таче възьрЂвъ на небо, и великъмь гласмь, лице весело имый, рече:

«Благословленъ богъ, аще тако есть то: уже не боюся, нъ паче радуяся отхожю свЂта сего!». Се же, якоже разумЂти есть, яко обавление нЂкое видЂвъ, сице издрече. Яко по томь опрятавъся, и нозЂ простьръ, и руцЂ на пьрьсьхъ крьстообразьнЂ положь, прЂдасть святую ту душю въ руцЂ божии и прЂложися къ святыимъ отьцемъ.

Тъгда же братия сътвориша надъ нимь плачь великъ и тако, възьмъше того, несоша въ църкъвь, и по обычаю святое пЂние сътвориша. Тъгда же, акы нЂ от коего божьствьнааго явления, подвижеся вЂрьныихъ множьство, и съ усьрьдиемь сами придоша и бЂша прЂдъ враты сЂдяще и ожидающе, донъдеже блаженааго изнесуть. БлаговЂрьный же князь Святославъ бЂ не далече от манастыря блаженааго стоя, и се видЂ стълъпъ огньнъ, до небесе сущь надъ манастырьмь тЂмь. Сего же инъ никътоже видЂ, нъ тъкъмо князь единъ, и якоже от того разумЂти прЂставление блаженаго, и глагола сущимъ съ нимь: «Се, якоже мьню, дьньсь блаженый Феодосий умьре». БЂ бо прЂже того дьне былъ у него и видЂлъ болесть его тяжьку сущю. Таче посълавъ и увЂдЂвъ истЂе прЂставление, плакася по томь много.

Братии же врата затворивъшемъ и никогоже пустящемъ по повелЂнию блаженааго, и бЂша присЂдяще надъ нимь и ожидающе, донъдеже разидуться людие, и тако того погребуть, якоже самъ повелЂ. БЂша же и боляре мнози пришьли, и ти прЂдъ враты стояще. И се по съмотрению божию пооблачилося небо, и съниде дъждъ. То же ти тако разбЂгошася. И абие пакы дъждь прЂста и сълньце въсия. И тако того несъше въ прЂжереченую пещеру, положиша и, и запечатьлЂвъше и отъидоша, и без брашьна вьсь дьнь прЂбыша.

УмрЂтъ же отьць нашь Феодосий въ лЂто 6 и 582, мЂсяца маия въ 3, въ суботу, якоже прорече самъ, въсиявъшю сълньцю.

За вид.: Житие Феодосия Печерского / Памятники литературы Древней Руси. Начало русской литературы. XI — начало XII века. — М., 1978. — С.305-391.

Підготовка тексту О.В.Творогова.

«Житие Феодосия» друкується за списком у складі Успенської збірки (рукопис Державного Історичного музею в Москві, Синодальне зібр. № 1063/4), видане в книзі: «Успенский сборник XII — XIII вв.». Издание подготовили О. А. Князевская, В. Г. Демьянов, М. В. Ляпон. М., 1971.Виправлення та доповнення внесені за списком «Жития» у складі Києво-Печерського патерика, виданого у кн.: Дмитро Абрамович, Києво-Печерський патерик. У Києві, 1930. Всі виправлені слова виделені курсивом.

Див. також Переклад.

Попередня       Головна       Наступна