Попередня     Головна     Наступна

Глава 15

Ω КНЯЖЕНИЇ ИЗЯСЛАВОМЪ, Ω МЕЖДОСОБНОИ БРАНИ /43зв./ РУСКИХЪ КН̃ЗЕИ И Ω ВЫГНАНЮ З КИЕВА ИЗЯСЛАВА

Изяславъ, сн̃ъ Ярославов, сЂлъ на киевскои столицы, и другиї братиї его — кождыи на своем удЂлномъ княжениї. В пятое зас лЂто по смерти Ярославовои умерлъ сн̃ъ его Вячеслав, кн̃зъ, и взялъ его княжение братъ Игоръ. Коториї то Игоръ, мало живши по братЂ ВячеславЂ, третиего року умерлъ.

Потомъ половцы першиї раз пришли на Русъ и, повоевавши і Всеволода збивши, з користъю великою и з полономъ вь свою землю вернулися. Зачалися затымъ в Руси междусобныя брани. Св̃тославъ, /44/ братъ Ерославовъ, пошолъ на Великиї Новъгород, в которомъ Ростиславъ, сн̃ъ Володимеровъ, ^В—В княжил, і воевал Св̃тослав ^Г—Г Новъгородъ такъ, ажъ кн̃зь Ростислав мусилъ з Новгорода утечи, и пришолъ къ Тмутороканю, выгналъ з Тмутораканя ГлЂба, сн̃а Св̃тославового, а самъ сЂлъ тамъ. Теды Св̃тослав пошол знову на Ростислава къ Тмутароканю, а Ростиславъ, не боячися Св̃тослава, але яко стрия своего шануючи, вышол з Тмутороканя доброволне. Св̃тославъ зас знову ГлЂба, сн̃а своего, посадилъ княжити вь Тмуторокани и отишолъ додому. Ростислав знову выгналъ ГлЂба, а самъ сЂлъ в Тмуторакани, /44зв./ але немного сидЂлъ, бо единь грекъ, Котопана названныи, далъ Ростиславу трутизну в напою, ωт которого Ростиславъ осмого дн̃я умер. За що Котопана корсунцы убили.

Потом сн̃ъ Брачеславов Всеслав взялъ под себе Новгород, за що розгнЂвавшися три Ярославичи, Изяславъ, кн̃зъ киевскиї, Св̃тославъ і Всеволодъ, воину поднесли на Всеслава и, присягши при томъ ему на покои, взяли его и посадили въ порубЂ, то естъ вь вязаню в КиевЂ, зь его двома сн̃ами. Тогды родился Всеволоду сн̃ь Ростиславъ, потомъ другиї сн̃ь Владимер. Изяславъ збудовал монастыр Св̃тго великωмученика Димитрия.

Затымъ пришли /45/ половцы на Рускую землю, против которыхъ гды з воисками Изяславъ, Св̃тославъ і Всеволод вышли, половцы ихъ звитяжили и спустошили землю Рускую. И гды Изяслав вернулъся до Киева зъ Всеволодомъ, просили бояре киевскиї, абы выпущено з поруба Всеслава. Але гды Изяслав не хотЂлъ выпустити, збунтовавшися и отбивши поруб, выпустили Всеслава и почали розгробляти скарбы вь дворЂ кн̃зя Изяслава. Видячи тыи бунты, Изяславъ, все покинувши, побЂгь в Лядскую землю з сн̃ами своими Мъстиславом и Св̃тополкомъ, а Св̃тославъ, от Половцовъ к ЧернЂгову прибЂгши и своих три тысячи забравши, гды половцы под Черниговомъ пустошили, /45зв./ выскочивь з Чернигова и ударил на половцов, которых двенатцать тысячєи было, звитяжил ихъ, побилъ и кн̃зя ихь поимал Секела, і вернулся до ЧернЂгова. А Всеслав сЂлъ в Кие†на столицы.

Глава 16

Ω ПРИВЕРНЕНЪЮ КИЕВСКОИ СТОЛИЦЫ ЗЯСЛАВУ ПРЕЗ БОЛЕСЛАВА, Ω ПРЕНЕСЕНИЇ МОЩЕИ СВ̃ТЫХ МУЧЕНИКЪ БОРИСА И ГЛЂБА

Року 6577-г^Д . Болеславъ СмЂлыи, кн̃зь полскиї, упрошенныї от Изяслава на помочь з воисками полскими, взявши с собою Изяслава и сн̃овъ его, пошелъ на Всеслава до Киева. Тое послышавши, Всеслав /46/ вышол противъ ихъ к БЂлагороду, гдЂ устрашившися, вночи побЂгь зь БЂлагорода без воїска кь Полоцку, а воиска назавтреє, обачивши, же кн̃зъ побЂгь, и сами до Киева вернулися. И послали дω кн̃зеи Всеволода и Св̃тослава, абы к нимъ на ωборону от ляховъ пришли, мовячи, же: «Боимося Изяславу здаватися, а если не придЂтє, то Киевъ спалимъ и сами до Грециї поїдемъ». Всеволод зас и Св̃тославъ потЂшилї ихь словамї и послали до Изяслава, абы ляхомъ не казал пустошити Рускои земли, а жебы взял Киевъ, спокоине поддаючися, поневаж Всеслав, кн̃зь ихъ, утеклъ. Тое Изяслав услышавши, учинил такъ. Пошол з Болеславомъ спокоине до Киева и, приходячи близко, /46зв./ послалъ вперед сн̃а своего Мъстислава в Киевъ. Которого гды киянє приняли, ωн приводцовъ до бунтовъ поимал, иншихъ постиналъ, а другихь послепил. А гды дал ω томъ ωтцу своему Изяславу знати, Изяславъ з Болеславомъ вишол в Киевъ. И посла Изяславъ к Полоцку против Всеслава. Оттолъ выгнаныї, Всеслав побЂгь до Варагов, а Изяславъ посадилъ на Полоцку сн̃а своего Мъстислава, которыи гды рыхло умерлъ, посадилъ в Полоцку другого сн̃а своего Свтополька Михаила Крол тежь полскиї Болеславъ, посадивши на столицы киевскои Изяслава и самъ немалыи чась в Кие†з воиском поживши, /47/ уконтентованы от Изяслава, вь землю Лядскую свою отишолъ.

Року 6578-г^Е родился Всеславу сн̃ь Ростиславъ. Сего ж року заложена быстъ цр̃ковъ Св̃того Михаила в манастыре на Выдубечи.

^40—Року 6579-г^Є половцы воевали у Ростова^—40 и выгнавъ Всеславъ Св̃тополка з Полоцка, а потом Ерополкъ звитяживъ Всеслава под Готычскомъ.

Року 6580-г^Ж Изяслав, Св̃тославъ и Всеволод, кн̃зи, перенесли на своих раменахъ мощи св̃тыхъ мученикъ Бориса и ГлЂба в ВышъгородЂ зъ старои цр̃кви в новую, от Изяслава змораванною. При перенесениї мощеи были митрополитъ Геωргиї, /47зв./ епископъ переясловскиї Петръ, епископъ юрьевскиї Михаилъ, св̃тыи Феодосиї, игуменъ печерскиї, Софрониї, игуменъ Св̃тго Михаила Золотоверхового, Герман, игумен Ст̃го Спаса, Николаї, игумен переясловскии и иншие игумены всЂ.

Глава 17

Ω ВТОРОМЪ ВЫГНАНЪЮ ИЗЯСЛАВА З КИЕВА ПРЕЗ БРАТИЇ И ОПАНОВАНЮ ЗНОВУ КИЕВА, И О СМЕРТИ ЕГО

Року 6581-г^З сн̃ы Ярославовы два, не памятаючи на упоминаньє от̃цевское, Св̃тослав і Всеволод, выгнали зь столицы киевъскої Изяслава. Которыї, выгнаныи, побЂгъ знову до Ляхов и мешкал в Лядскои земли четыре лЂта, а Св̃тослав сЂлъ /48/ на столицы киевъскои. При семъ кн̃зЂ Св̃тосла†^{И—И І—} року 6583^Ї почата быстъ цр̃ковъ чюдная Пресветои Бд̃цы Печерская и скончалася третяго году^{Й —І}.

Року 6584^К преставися Св̃тослав Ярославовичъ и положенъ естъ в цр̃кви Св̃того Спаса в ЧерниговЂ, а в Кие†на столицы сЂл Всеволод, братъ его, и ^41—родился у сн̃а Всеволодова Владимера сн̃ъ Мъстиславов^Л—41.

Року 6585-г^М Изяслав, кн̃зъ, пошол зъ кн̃зем Болеславомъ СмЂлымъ на свое княжение до Киева. Противъ его вышол Всеволод з воїскомъ на Волын и учинивъ тамъ зь Изясловомъ мирь. И пришовши, Изяслав сЂлъ на своеи столицы в Киевє, а Всеволод в ЧернЂговЂ, ωт которогω /48зв./ Ωлегъ Св̃тославичъ утекь кь Тмутороканю. Михаилъ Св̃тополкъ, сн̃ъ Изяславовъ, сЂль княжити на НовгородЂ и Полоцку. Владимеръ Всеволодовичъ сЂлъ вь Смоленску, Ярополкь Изяславичъ — в ВышъгородЂ.

Року 6586-г^Н тыхь часовъ ГлЂбъ, сн̃ъ Святославовъ, князя черниговского, от своихь подданых в Заволочъ^О и^П былъ забитыи, и положенъ в ЧернЂго†у Св̃тго Спаса, а Борисъ и Ωлегъ Св̃тославичи, князи, розгнЂвавшися на Всеволода за своего от̃ца столицу черниговскую, затягнувши полоацовъ, почали пустошити землю Рускую. Противъ которымъ кн̃зъ Всеволод черниговскии з воискомъ, гды вышол на урочищу Зичце, /49/ бившися, звитяженъ былъ и побЂгь до Киева з сн̃омъ своимъ Владимеромъ, до брата своего Изяслава. Которого Изяславъ мило принявши, утЂшилъ его, сєбе на приклад подаючи, же два разы былъ выганяныї зь князства и розграбленыи ^Р—зь княжства и розграбленыї^—Р, а знову свое отшукал. И, зобравъши воиска, князъ Изяславъ з сн̃омъ своимъ Ярополкомъ и зь Всеволодомъ, и зь его сн̃омъ Владимеромъ пошол до Чернигова. Ωлегь в Черниго†радилъ Борису о покої просити Изяслава и з нимъ кн̃зеи. ^С—С Не хотЂл, гордо отказалъ: «Смотри готового». Уфал вь множест†половцовъ. И такь, гды зышлися воиска, билися моцно под Черниговомъ. Там жє зараз забито Бориса. /49зв./ В тои воинЂ забито и князя Изяслава и положил дш̃у свою за брата своего Всеволода.

Року 6586-г^Т и Олегь побЂгь къ Тмутороканю, и розбиты половцы побЂгли. Изяславово зас взявши тЂло, привезли до Киева и положили вь цр̃кви Пресвятої: Бд̃цы вь гробЂ мармуровомъ.

Глава 18

Ω КНЯЖЕНИЇ ВСЕВОЛОДА

Всеволод, за помощию^У брата своего Изяслава ωтискавши Черниговъ, посадиль в ЧернЂго†сн̃а своего Владимера Маномаха, другого сн̃а Ярополкова в ТуровЂ, а самъ сЂлъ в Кие†княжати^Ф. Року 6587-г^Х Роман, кн̃зь, сн̃ъ Св̃тославов, нанявши /50/ половцовъ противъ Всеволода^Ц и пришовши з ними, сталъ у Переясловлю. Тамъже пришовши і^Ч Всеволод, помирився з Романомъ, и гды ворочался назад Роман, убили его за тое половцы. Тогды ж князя Ωлга поимавши козаре, завезли до Грекъ, до Цр̃игорода. Которыи четвертого року з Грекъ вышовши, пришол къ Тмутораканю, поималъ князеи Давыда і Володимера^Ш Ростиславовичов^Щ, а самъ, сЂвши въ Тмутораконю, позабивалъ козаров, которыї его до Грек загнали, а кн̃зеи отпустилъ. Которыї, гды Ярополкъ къ Всеволоду поЂхалъ до Киева на Великъденъ, прибЂгши, сЂли в Володимере на Ярополковомъ княжениї, але Всеволод, пославши Владимера, выгналъ ихь и знову посадил в Володимери на Волыни Ярополка. Року 6593-г^Ю /50зв./ Ярополкь Изяславовичъ повсталъ на Всеволода, же столицу от̃ца его Киевъ взялъ, послухавши злых порады. Тое увЂдавши, Всеволод послал против егω сн̃а своего Владимера, которыи пришол на Волын. Ярополкъ, в Луцку оставивши все, зведеныї от злых рады, побЂгъ до Ляховъ, а Владимеръ ωпановалъ Луцкъ и посадилъ князя Давыда в Володимере вмЂсто Ярополка, матку засъ и жону Ярополкову, и скарбы его привезлъ до Киева.

Року 6594^Я заложивъ Всеволод цр̃ковъ Св̃того АндрЂя и монастыр при цр̃ькви девичеї, в котором постригалася его дочка Янка и тамъ мешкала з черницами.

Року 6595-г^Ь пришол Ярополкъ от Ляховъ з воискомъ и учинилъ покои з Владимеромъ, и пошол Владимер /51/ знову къ Чернигову, а Ярополкъ сЂлъ в Володимере. И по малом часЂ, гды поЂхал до Звинагорода, от своего милого дворянина Нєрадца проколотыї и забитыї зосталъ. И привезли его до Киева, и споткали тЂло его кн̃зъ Всеволод з боярами и митрополит Иωань зъ свещенниками и иноками, и положили его в монастыре Св̃тго Димитрия, в цр̃кви Св̃тго Петра, от него початои муроватися. I всЂ по немъ свЂтскиї, а барзЂя духовныи плакали барзо, бо тои кн̃зь Ярополкъ былъ тихиї, покорныї, нищих любил, а наїбарзЂи иноковь, которымъ давалъ десятины збожя, з товару, зъ стад и з всего добытку своего. Набожныи, всегды просилъ Гсда Бг̃а, абы такою ж смертию умерлъ, якою Борисъ и ГлЂбъ св̃тыи были помордованы, и тую упросилъ смертъ. /51зв./

Року 6596-г^А ωсвещенна быстъ цр̃ковъ Св̃тго Михаила в монастырЂ Всеволодовомъ Выдубецкомъ през Івана, митрополита, и епископов Луку и Исаию, за игумена Лазоря. Того ж року перешолъ з Новгорода ^Б—к Турову^—Б князъ Михаилъ Св̃тополкъ Изяславичь. Потомъ кн̃зи рускиї, Владимер новгородскиї, Давыд и Олегь переясловскиї, Володоръ перемышлъскиї^В, Ярославъ Ярополчичъ, луцкиї и владимерскиї, зобравшися зъ своими воисками, пошли на Лядскую землю и, невымовны шкоды огнемъ и мечемъ в Лядскои земли починивши, з великими добытками и корыстми до своих домов вернулися.

Року 6597-г^Г освещенна бысть цр̃ковъ Пресвятои Бд̃цы Печерская Иоанномъ, митрополитом, /52/ и Лукою, епископомъ бЂлогородскимъ, Исакиемъ, епископомъ ростовскимъ, Иоаномъ, черниговским епископомъ, при бл̃говЂрномъ кн̃зе Всеволоде, за игумена Иоанна. Того ж року преставился Иоанъ, митрополитъ киевскиї, побожныї и учоны, а Янка, дочка Всеволодова, поЂхавши в Грецию, привезла митрополита, еинуха, до Киева.

Року 6598-г^Д Ефремъ, епископъ переясловскиї, змуровавши цр̃ков великую Св̃тго Михаила в Переясловли, осветилъ. Заложилъ тежь, и цр̃ковъ Св̃тго Феодора на воротахъ, и Св̃тго АндрЂя, и украсивши цр̃ков Св̃тго Михаила сосудами і всякою красотою цр̃ковною, и Переясловлъ, вес град, сеи епископъ цр̃ковными мурами и городомъ барзо приоздобилъ. ^Е—Е /52зв./ ^Є—Року 6599-г^Ж перенесены мощи св̃тго Феодосия Печерского з печери в цр̃ковь великую Пресвятои Бд̃цы^—Є.

Року 6600-г^З воевали барзо половцы рускую землю и взяли три городы. Того ж року Василко Ростиславичь, кн̃зъ перемыслъскии, зобравши воиско руское и половцовъ затягнувши, попустошилъ многиї замки, мЂста и села лядскиї и з великою корыстью вернулъся додому. Того ж року умерлъ Рурикъ Ростиславич. Потомъ морь былъ великиї в Рускои земли, которымъ зараженыи и кн̃зь киевскиї Всеволод умерлъ року 6601-г^И, и похован в цр̃кви Св̃тои Софиї в Киевє подлє от̃ца своего. Былъ справедливыи и, Бг̃а боячися, убогихь любилъ и давал имъ, духовных барзо шановал, а наибарзЂї /53/ иноковъ любилъ и давалъ имъ, што потребовали, за що еще от̃цъ его Ярославъ любилъ над иншихъ и обецал ему, же мЂл быти положенъ по смерти подлє его, що и сталося. Зоставилъ по себЂ Всеволод двох сыновъ, Владимера Маномаха и Ростислава. Владимерь по смерти от̃ца своего думал, же если бы сЂлъ в Киевє самъ на столицы от̃ца своего, то бы от Св̃тополка не мЂлъ покою, бо его от̃ца Изяслава Киевъ столица дЂдичная есть. И такъ послал по Св̃тополка, кн̃зя новгородцкого, к Турову.

Глава 19

Ω КНЯЖЕНИЇ МИХАИЛА СВ̃ТОПОЛКА ИЗЯСЛАВОВИЧА И О ПОРАЖЕНИЮ ЕГО ΩТ ПОЛОВЦОВЪ /53зв./

Пришолъ Михаилъ Св̃тополкъ Изаславовичъ до Киева после Воскресения Хр̃ства в НедЂлю Проводную року 6601-г^І, и сподканыи, і вдячне от киевъских житєлєи приняты^Ї, сЂлъ на столицы ωт̃ца своего Изяслава Ярославича. А Владимєръ Всеволодичъ сълЂ на ЧерниговЂ, братъ зас егω Ростиславъ на ПереясловлЂ. Послышавши половцы, же Св̃тополкь сЂлъ в Киевє княжати, прислали пословъ своихь къ Св̃тополку, абы з ними учинилъ примире, якь его от̃ць чинил, и далъ имъ, що належитъ. Св̃тополкъ тых послов всадилъ до вязенъя. Што послышавши, половъцы зараз вбЂгли в Рускую землю и почали ωгнемъ и мечемъ пустошити. Видячи Св̃тополкъ, же /54/ неслушне учинилъ, выпустилъ послов половецких и ωтослалъ до половцовъ, просячи у них примире, але половцы, розгнЂвавшися, не хотЂли примиря з нимъ чинити, пустошили Рускую землю. Послал теды Св̃тополкъ до Владимера чернЂговского и до Ростислава переясловского, кн̃зеи, просячи ихь к себЂ на помочь. Которыї, собравши свои воиска, пришли до Киева, сварилися на Св̃тополка, ижь неслушне противъ праву послов половецких сажал до вязеня, а потомъ, у Св̃тго Михаила поеднавшися, пошли всЂ три з воисками къ Стугни рецЂ и тамъ думали и радили два кн̃зи Св̃тополку не воеватися с половцами, алє послати ω примире, лечъ киевскиї воиска крикнули на Св̃тополка, абы воевал и ишол за Стугну.

И такъ /54зв./ пошли всЂ три кн̃зи противъ половцовъ и, скоро минули Триполъе^Й, зараз сподкали ихь половцы и битву моцную учинили. Св̃тополкь наипервЂи от стрелцовъ половецкихь зъ битвы убЂгь до Триполъя і вночи приЂхал до Киева. Потомъ половцы ударили на Владимера и Ростислава и розгромили ихъ воиска^К. И такъ гды утекали, Ростиславъ кн̃зъ утонулъ в рецЂ СтугнЂ, бо была в тои час широко^Л, а Владимеръ, з малою дружиною перебывши реку, вытягнулъ тЂло брата своего Ростислава и плакал над нимъ барзо. И привезши до Киева, поховали его в цр̃кви Св̃тои Софиї в гробЂ от̃цевскомъ. А половцы, роздЂливши воиско на двоє, еднымъ ωблегли замок Торческъ, а другимъ пошли до Киева. Противъ /55/ которых выехавши Св̃тополкъ, гды сточил на Жилянах битву, зосталъ от половъцов барзо пораженыи такъ, ижь самотретъ толко до Киева утеклъ^М. Половцы з великою добычъю и звитязствомъ всЂ пошли под Торчькъ къ своимъ. Русь, в оближенью в Торческу зостаючи, боронилися крЂпко, а гды облеженемъ зморены, помочи от Св̃тополка не могли одержати и не сподевалися, половцомъ здалися. Половцы, запаливши замокъ и людеи в полон побравши, из бесчисленною корыстью вь свою землю запровадили. Сего жь року преставился Ростиславъ, сн̃ь Мъстиславовъ, внукь Изяславовъ, и похован в церкви Пресвятые Бд̃цы Десятинної.

Року 6602-г^Н Св̃тополкъ по такои шкодЂ великои учинилъ /55зв./ примире с половцами и для моцнЂишеи приязни понялъ себЂ за жену дочку Тоготкана^О, кн̃зя половецкого. Але и такъ не стал досканалыи покои в Руси, бо кн̃зъ Ωлегь, упросивши половцовъ на помочь, пошов против Владимера доставатъ кнежения Черниговского и пустошилъ под Черниговомъ волости, мЂстечка, церкви и монастыри такъ долго, ажъ Владимеръ, поеднавшися зь Олгомъ, мусилъ ему уступитъ Чернигова, а самъ поЂхал до Переяславля на княжение. Ωлегь сЂлъ на столицы от̃ца своего в ЧернЂговЂ, еднакь же половцы еще, пустошачи около Чернигова, набравши много корыстеи и полону, завезли вь свою землю. Сего ж року саранча, прилетЂвьши в Рускую землю, поЂла все збоже и траву. /56/

Глава 20

Ω СПУСТОШЕнЮ ΩТ ПОЛОВЦОВЪ ЗЕМЛИ РУСКОИ И О ЗВЫТЯЗСТВАХЪ, И Ω МЕЖДОСОБНОИ ВОИНЂ КН̃ЗЕИ РУСКИХ, И ОСЛЕПЛЕНИЮ ВАСИЛКА

Року 6603-г^П Катан^Р и Итлярь^С, князи половецкиї, з воискомъ пришли против Владимєра кн̃зя под Переясловлъ. Владимер з ними ^Т—Т примирье под неслушною кондыциею, сн̃а своего Св̃тослава давши имъ в закладЂ. Потомъ за порадою своих и Славеты, посла Св̃тополкового, вперед сн̃а своего Святослава у половцовъ вывевши потаемнє, Итляра, которыи былъ в мЂсте, за^У его всЂми позабивалъ. Потомъ, Китана запросивши на слово до себе, не вЂдаючого ничого ω ИтлярЂ, /56зв./ зь его дружиною позабивалъ. И зараз кн̃зъ Св̃тополкъ, з своимъ воискомъ зъ Киева пришовши, з Володимеромъ ударили на половцов несподЂване, барзо ихь побили, погромили и на кочовисках ихь стада и челяд побрали в полонъ, и з тымъ всЂмъ до домов звитяжцы приЂхали. Того ж року знову половцы, воискомъ пришовши, Туровъ^Ф, замокъ Св̃тополков, облегли и цЂлое лЂто лежали, ажь Св̃тополкь ихь поедналъ, и ωтишли. Потомъ пришол Бонякъ Шолудивыї, кн̃зь половецкиї, к^Х Киеву з воїскомъ и повоевал округь Киева, и дворъ княжиї на Берестовомъ спалилъ. Тогды ж Тогорткан, тесть Св̃тополковь, з сынами пришол под Переясловль. Против ихъ Св̃тополкъ і Владимерь /57/ з воискомъ пришли и десятого дня июля зышовшися з половцами над Трубешъю рекою, побили наголову половцовъ. ТамЂ жє Торткана^Ц зь сынами забито.

Року 6604-г^Ч другиї разь Бонякъ пришол под Киевъ и мало не убЂгь у город, и попалил ωкола города, и пожеглъ монастыр Стефановъ. Оттолъ пришли к монастырю Печерскому и мы, мовитъ Нестор, чернцы, побЂгли з монастыря на берегъ, а иншиї на полаты. Вырубали ворота монастырскиі половцы и двери келиї разбивали, и брали, што нашли, запалили монастыр и двери церковныї збоку, и брали, што было з цр̃кви, и образы палили, и насмЂвалися, мовятчи: «Гдє есть Бг̃ь ихь, да поможеть имъ». Тогды и дворъ /57зв./ Красныи, ωт Всеволода на холму на Выдобичи поставлены, спалили.

Того ж року приъхали кн̃зи рускиї до Киева, хотячи промыслити, яким бы способомъ забъгти такимъ частымъ половецкимъ поганскимъ набЂгомъ, и послали до Ωлга, кн̃зя, просячи, абы к нимъ на раду тую приЂхаль. А Олегъ, насмЂваючися, отповЂдилъ: «Не поїду я и не хочю радитися в Киевє зъ владыками и з ченцами, и с подданными». Такою гордою ωтповЂдью розгнЂваниї, кн̃зи Св̃тополкъ і Владимерь Мономах пошли з воискомъ противъ Олга и облегли его вь Стародубе на замку, и штурмовали до его крЂпко тридцат и три дн̃и. Потомъ Олегь, боронившися крЂпко, з людми знемогь и упросил от тых кнзеи /58/ покои, под присягою обЂцавши к нимъ до Киева приЂхати, але не учинилъ ведлугь крестного целованя, лечь з воїскомъ пошол к Мурому. А Изяславь, сн̃ь Володимера Мономаха, зь Мурома зточилъ з нимъ битву, и в тои воинЂ забито Изяслава. I взялъ Олегь Муромское и Ростовское княжение.

Потомь Мъстиславъ, братъ Изяславовъ, кн̃зь новгородскиї, послалъ до Ωлега, ωбЂцуючи егω зъ отцемъ своимъ Владимеромъ поеднати, хотяи и брата его забилъ. И послал впередъ на провЂдки брата своего Ярослава. Але Олегь, лакомствомъ княжения Новгородского знятыи, собрал воиско^Ш—Ш и с нимъ Добрыню Ругаиловича з сторожею, которыхъ гды Мъстиславъ поималъ, Ωлегь, /58зв./ устрашившися, пошолъ к Ростову, а Мъстислав за нимъ гонился, и поеднался з нимъ Ωлегь. Але гды, поеднавшися, Мъстиславъ роспустилъ воиско, Ωлегь, зламавши примире, знову пошолъ з воискомъ несподЂване на Мъстислава. А Мъстиславъ скоро собралъ, сколко могь, воиска, приспЂлъ тежь к нему и Вячеслав, братъ его, от от̃ца з воїском присланы, и ударилися моцно зъ Олегомъ, и звитяжили, его, ажь Ωлегь утеклъ до Мурома, а оттолъ до Резани. Где догонивши его Мъстиславъ, послал к нему, лагодне намовляючи, абы не бЂгалъ по чюжои земли, але жебы, примирившися, вернулся до ωтчизны своеи.

Року 6605-г^Щ собравшися кн̃зи рускиї в Любечю, учинили межи собою примире /59/ под присягою, жебы на половцовъ воевали, а не свою землю междособною воиною пустошили, лечъ рыхло зламали тое примире. Бо Св̃тополку Давыд Игоровичъ сказал, в Киевъ приЂхавши, на Василка Ростиславича, кн̃зя перемыслъского, же ωн твоего брата Ярополка забилъ и тепер мыслитъ тебе и мене згубити, намовившися з Володимером, инши^Ю княжения побрати, промышляи ω немъ. Не хотЂлъ Св̃тополкъ Давыду в томъ вЂрити, але Давыд под присягою такъ быти сказалъ и намовлялъ Св̃тополка на Василка. Гды теды до Киева, перевезшися на Выдубечи, приЂхалъ Василко, Св̃тополкъ, запросивши его к себЂ, намовившися з Давыдомъ, казали кн̃зю Василку /59зв./ ωчи вылупити. Тое послышавши, Владимеръ Маномахъ, Олегь и Давыд Св̃тославичи плакали по Василку, же ослепленъ, собрали воиско и мысли поити противъ Св̃тополка за такъ неслыханое над братомъ Василкомъ окрутенство. Св̃тополкъ, послышавши тое, хотЂл побЂгьти до Половцов, але кияне его задержали. Митрополитъ киевскиї Никола и панове киевскиї перееднали Владимера и других кн̃зеи кь Св̃тополку, прекладаючи тое, жє гды межи собою будетє битися, половцы, урадовавшися, попустошатъ землю Рускую. И такъ кн̃зи усмирилися межи собою.

А Давыд Игоровичъ, хотячи княжение ^Я—Я ослЂпленого Перемыслскоє себЂ отняти, гды пошол з воискомъ, самъ от Володаря, /60/ брата Василкова, в Бузку былъ облежен. Тамъ жє Володаръ, пославши, строфовал Давыда ω окрутенство над Василкомъ. Давыд не себе, лечь Св̃тополка в томъ виннымъ чинячи, примире зъедналъ на тои часъ у Володаря. На початку весны кн̃зи Василко Ослепленыї і Володоръ, братъ его, з воискомъ пошли противъ Давыда Игоровича на Волынъ и, добывши Всеволода, мЂста запалили и людеи в немъ помордовали. Потомъ пришли к Володимеру, где Давыд заперлся былъ, и мусилъ Давыд з Володимера выдати двох, которых Василко и Володар потребовали, Василия и Лазаря, которых яко причинцов ослЂпления Василкового казали высоко на деревах /60зв./ повЂшати и стрелами насмертъ пострелялї. Св̃тополкъ тежъ, хотячи помъститися на ДавыдЂ Игоровиче, же он на Св̃тополка складалъ вину ослепления Василкового, поЂхал до Брестя, от Ляховъ помочи на Давыда просячи. А Давыд также побЂгь до Владислава Гирмана, кн̃зя лядского, на Св̃тополка просячи помочи. ОбЂцал обоимъ кн̃зь полскиї, побравши от обоих подарки великиї, и пришовши ляхи над Бугь, хотЂли Св̃тополка з Давыдомъ погодити, але гды не могли, ни едному не помагаючи ωтишли. Пришол теды Св̃тополкъ з воискомъ своимъ и облегь Давыда в Володимери, и стоял такъ седмъ недЂлъ, ажъ Давыд утеклъ знову до Ляхов, а Св̃тополкъ /61/ Володимерь город опановалъ. Ωттолъ Св̃тополкъ пошолъ з воискомъ на Василка и на Володаря, кн̃зеи премыслъских, а Василко і Володаръ зь своим воискомъ пошли противъ Св̃тополка и, бившися моцно, звитяжили Св̃тополка.

Пошол теды Св̃тополкъ знову до мЂста Володимера и посадилъ тамъ сн̃а своего Мъстислава, а Ярослава, сн̃а другого, послалъ до Венгерь, просячи ω помочь на Василка и на Володаря. Самъ пошол до Киева и збиралъ воиско. Коломань, кроль венгерскиї, з воискомъ своимъ пришолъ, и два епископы з нимъ. И положившися ωбозомъ меже реками Вяром и Саномъ, облегль Перемышлъ, где Володар былъ заперлъся. А Давыд, ижь не мЂлъ /61зв./ от ляховъ помочи, пошол до Половцов. Св̃тополкъ^Ь в дорозЂ Боняка, кн̃зя половецкого, затягь его против венгеров, и положивши

Боняк свое воиско недалеко от Перемышля, вночи самъ пошол в лЂсъ и завыл голосомъ волчиимъ. Волки на его голосъ такжє завыли, и с тоеи ворожки надЂю звитязства взявши, казал воиску своему быти готовому на воину. А такъ другогω дн̃я, розделивши воиско натрое, д†части на засадцЂ поставил, з третею самъ ударилъ на венгеры, а нарокомъ зараз от венгеровъ почалъ утекати. ВенгеровЂ, разумЂючи, же от правды Бонякъ утекаетъ, за ним несправне гонили, а Бонякь з засажеными двомя частми /62/ з-заду почалъ венгЂровъ сЂчи и латво ихь побилъ, и погромилъ, и двохь ихъ епископовъ там же забито. Самъ крол ихъ венгерскиї з остаткомъ воиска ледве утеклъ, а Ярославъ побЂгь к ляхомъ в Берестъє.

Давыд засъ Игоровичъ, звитязствомъ тымъ поднесшися, пошолъ и облегь Володимер. И гды штурмовалъ Давыд до мЂста, там жє в мЂсте пострелен о^А штурмуючихь застал Мъстислав, сн̃ь Св̃тополковь и умерлъ з тою вЂдомостью. Гды володимерцы прислали до Св̃тополка же не могутъ далеи отблеженья терпЂти, Св̃тополкъ з Киева з людми послал на отсЂчь воеводу своего Путяту, которыи приЂхавши тихо к мЂсту Володимеру, /62зв./ ударил зненацка на Давыда и поразилъ его такь, ижь мусилъ утечи от ωблеженя, а Путята, поставивши Василя старостою в Володимєри, самъ до Киева отЂхалъ. Кн̃зъ Давыд Игоровичъ, поражены от Путяты, знову побЂгь до Половцов и, затягнувши другиї раз Боняка з половцами, пошол под Луцкъ на кн̃зя луцкого Св̃тошу для того, ижь Светоша под присягою обЂцал был Давыду дати знатъ, гды бы на него Св̃тополково воиско ишло, аже^Б не перестерегль. Гды Путята ишол з тоеи причины Давыд Луцка добывал. А Светоша, поеднавши Давыда Игоровича, уступил ему Луцка, самъ пошол до Чернигова кь своему ωтцу, Давыду Св̃тославичю. Давыд /63/ тежь Игоровичъ, взявши Луцкъ, пришолъ з воискомъ къ Владимеру мЂсту, з которогω зараз Васил, от Путяты зоставлени, утеклъ, а Давыд опановал мЂсто^В Володимер.

Року 6606-г^Г знову на весну Св̃тополкъ, зобравши воиско, пошол противъ Давыда Игоровича до Володимера на Волынъ, з которого Давыд з жоною и зо всЂмъ утеклъ до Лядскои земли. А Св̃тополкъ, взявши Володимеръ ^Д—Д Маномахъ сего року заложил цр̃ковъ Пресвятыя Бд̃цы в Переясловлю на княжомъ дворЂ. Того жь року заложилъ Владимер и город на ΩстрЂ.

Року 6607-г^Е зъЂхалися кн̃зи рускиї Св̃тополкъ, Владимерь, Олегь и Давыд Св̃тославичъ и, учинивши у ВЂтичахъ межи собою покої, призвали /63зв./ до себе з Лядскои земли Давыда Игоровича выгнанного през пословъ, и сказали ему, иж Володимерского ему княжения не дадутъ для того, же часто краи Рускиї ωттолъ пустошил, еднак, жебы не волочился по чюжих земляхъ на смЂхъ людскиї, поступили ему тое: Св̃тополкъ далъ ему Острогь, Дубно, Заславъе и Чорториискь, придалъ к тому и Дорогобуж, а Владимерь и Давыд Св̃тославичь зъ Олгомъ по двЂсте гривенъ давати ему жь поступили. Давыд Игоровичъ тое все принял, але, недолго в Дорогобужи мешкавши, умерлъ.

Року 6609-г^Є преставился Всеслав, княз полотскиї, апрЂля 14. Того ж року кн̃зи рускиї Свтополкъ, Владимеръ, Давыд и Олегь учинили покої с половцами /64/ і дали себЂ заклад добрыи, зъ обоихь сторон людеи зацныхъ. Сего жъ року заложилъ Владимеръ цр̃ковъ Пресвятые Бд̃цы, епископи въ Смоленску. Року 6610-г^Ж хотЂл посадити Св̃тополкъ, сн̃а своего, кн̃земъ в НовгородЂ, бо Св̃тополкъ самъ первЂи тамъ княжил, а Мъстислава, сн̃а Владимерового, посадити в Володимєри на Волыни, але новгородцы не схотЂли Св̃тополковича, взяли знову себЂ Мъстислава. Сего жь року преставился Ярославъ Ярополковичъ, августа 11. Сего ж року дочку свою Збыславу отдалъ Св̃тополкъ за кн̃зя лядского Болеслава. Того ж року родился у Володимєра сн̃ъ АндрЂи. /64зв./

Глава 21

Ω ЗНАЧНОМЪ НАД ПОЛОВЦАМИ КН̃ЗЕИ РУСКИХЪ ПО КИЛКА РАЗ ЗВИТЯЗСТВЂ, О ВПИСАНЮ МЂЖИ СВ̃ТЫМИ СВ̃ТГО ФЕОДОСИЯ ПЕЧЕРСКОГО, О СМЕРТИ СВ̃ТОПОЛКА И О РОЗРУХУ В КИЕВЕ ПО ЕГО СМЕРТИ

Року 6611-г^З половцы, не додержавши примиря, часто в Рускую землю вбЂгаючи, полоны брали. Для того Св̃тополкъ, кн̃зъ киевскиї, і Володимер, з ыншими кн̃зями надумавшися, поднесли воину на половцов. Св̃тополкъ, Владимер, Давыд Св̃тославичъ, Давыд Всеславичъ, Мъстиславъ, внук кн̃зя Игоровича Вячеслав Ярополчичъ и Яраполкъ Владимеровичъ, зобравши воиска великиї, /65/ послали до Давыда и Олга, кнзеи черниговскихъ и сЂверскихь, абы ишли з ними на столних неприятелеи. Ωлегь хоробою вымовившися, а Давыд ^И—И своим воискомъ пришол. Пошли всЂ князи и пришли под Сутинъ, город половецкиї. Услышавши тое, половцы собралися в великомъ множствЂ, з гордостью хрестиянъ хотячи поглотити. Але на половцовъ самъ Гс̃дъ Бг̃ь страх великиї напустил, ижь и сами, и кони ихь дрижали, а русь, молячися Гс̃ду Бг̃у і уфаючи млсти его, весело ишли и кони ихъ ржали. Половцы, ωбачивши рускиї воиска, страхомъ Бжиимъ поражены, утекли зараз, а рус, скочивши за ними, били ихъ, сЂкли, топили такъ, иж полны поля и реки труповъ половецких были, и кн̃зєи /65зв./ ихь дватцатехь русь забила. И много корысти, и скарбовъ, и полону набравши, до Рускои земли вернулися. Того ж лЂта саранча была великая.

Року 6612^І Владимеръ отдалъ свою дочку за царевича грецкого АлеξЂевича царигородского. Того ж року Св̃тополкъ, кн̃зь киевскии, отдалъ свою дочку Предиславу за кролевича венгерского. Того ж ^Ї—Ї родился Св̃тополку сн̃ь Брячиславъ. Того ж року митрополит Микифорь^Й на митрополитанскои столицы посаженъ. Того жь року преставился Вячислав Ерополчичъ. Того ж року послалъ Св̃тополкъ Путяту з воискомъ и Володимеръ сн̃а своего Ярополка, а Ωлегъ самъ пошол до Минска на ГлЂба, взявши и Дв̃да Всеславича, але не одолЂвши, вернулся назад.

Року 6613^К /66/ митрополитъ поставиль епископовъ Амьфилохия в Володимери, Лазаря в Переясловлю, Мину в Полоцку.

Року 6614-г^Л половцы пришли на Рус къ ЗарЂчъю. Противъ ихь послалъ Св̃тополкъ Иванка Захарчича и козарина з воискомъ своимъ. Которыї половцовъ догонивши, подле Дуная побилї и полонъ весь ωтняли.

Року 6615-г^М Бонякъ и Шаруканъ, и инши многиї кн̃зи половецкии з воїсками пришли и стали около ^42—Лубенки реки^—42. А кн̃зи Св̃тополкъ, Владимеръ, Ωлегь, Св̃тослав, Мьстислав, Вячеславъ и Ярополкъ пошли противъ ихъ и, переправившися через Сулу рЂку, крикнувши, ударили знагла на половцовъ. Половцы зъ страху не могучи до справы приити, едны конми, /66зв./ другиї пЂши" розбЂглися. А рус ихъ бьючи, сЂкучи и имаючи, от Лубень гонили аж до Хорола. Там же забить Таша, Боняков родныи братъ. Пишет Ваповиї, же там же Бонякъ и Шараканъ, кн̃зи, забитыи застали, а кн̃зи рускиї з великимъ добытком, з корыстми и з полономъ вернулися до своихъ домовъ, а Св̃тополкъ, пришедши до Печерского монастыря ^О—и, поклонившися^—О Пресветои Бд̃цы и гробу св̃тго Феодосия, дякуючи за звитязство над поганами, мЂл бовЂмь звычаи Св̃тополкъ завждыи, идучи на воину, приходити до Печерского монастыря, и, ^43—поклонившися Пресветои Бд̃цы и гробу преподобного Феодосия^—43, и бл̃гословившися у игумена, ити на воїну. Того ж року преставилася княгиня Св̃тополкова мати. /67/

Року 6616^П заложилъ цр̃ковъ каменную Св̃того Михаила Золотоверхую великиї кн̃зь киевскиї Михаилъ Св̃тополкъ, весь верхъ цр̃кви позолотил и вшелякою ωздобою цр̃ковною украсил, бо перед тымъ была старая уже и не позалаченая, еще при кн̃зЂ ВладимерЂ поставленая за старанемъ первого митрополита Михаила на имя его. Того жъ року и трапезу печерскую скончали при игуменЂ ФеωкътистЂ, которыи то Феоктистъ радилъ Св̃тополку, абы преподобного Феодосия межи св̃тыми вписано и поминано. Св̃тополкъ самъ, знаючи св̃тое житие св̃тго Феодосия, митрополиту казалъ епископов собрати. А гды собралися епископы, самъ Св̃тополкъ всЂмъ /67зв./ житие преподобного Феодосия сказал чюдное. И такъ всЂ светители з радостию вписали межи св̃тых св̃тго Феодосия, и поминаютъ до сего дн̃я. Того ж року цр̃ковъ Пресвятые Бд̃цы Влахерна на Кло†докончена. ^44—Тогды ж Еупраксия^—44, точка Всеволодова, преставилася и положена в Печерскомъ монастырЂ.

Року 6617-г^Р посылалъ Володимеръ на Половцы Дмитра Игоровича, которыї вежи ихъ побралъ и с корыстъю вернулъся.

Року 6618-г^С половцы, убЂгши в Рускую землю, у Тучина полон побрали.

Року 6619-г^Т рускиї кн̃зи Св̃тополкъ, Володимеръ и иншиї, нарадившися, абы половцовъ знесли, з сн̃ами своими и з воисками навеснЂ, /68/ в великиї постъ второи недЂли, пошли на половцовъ. И перешовши Сулу, справилися порядне. Потомъ перешли Голтву і Ворсклъ, пришли к Дону. Через Донъ перешовши, пришли до мЂста Шураканя. Ωттолъ вынесеными имъ ЂдЂнемъ и виномъ покрЂпившися и молячися, пришли до замку половецкого Сувовора и запалили мЂсто и замокъ, а половцовъ готовых до битвы пришло много. Тамже кн̃зи рускиї, сприсягшися лЂпше умерти, ниж утекати, на Бг̃а уповаючи, ударили разомъ на воиска половецкиї и розбили ихь, роспорошили и навтреє^У, в суботу Лазареву, также і в недЂлю Вербную отпочинули, хвалячи Бг̃а. В понедЂлокъ Страшнои^Ф недЂли знову еще /68зв./ болшое мнозство половцовъ собралося, і гды зышлися, и почали зъ князями рускими битися, князи рускиї тоею жъ помочию Бж̃иею половцовъ побили, и през чтыри дн̃и утекаючихь гонячи, сЂкли, а забравши жоны ихъ, дЂти, таборы, стада і всЂ скарбы и полонъ, з звитязствомъ и з радостию до земли Рускои своеи вернулися. И сами половцы — неволники признавали, ижь видели над воисками рускими Ђздячихь ангеловь вь свЂтлых зброяхъ и помагаючих руси сЂчи половцовъ. И гды приЂхали кн̃зи рускиї в Рускую землю, въсюды ихь епископы і всЂ духовныи з крстми и свЂцкиї з радостью спотыкали, хвалячи Бг̃а за звитязство над половцами. И были безпечныї /69/ Рускиї краи ωт половцовъ. Слава того звитязства до Грециї и до Рыму ажь дошла. Того жь року преставилася княгиня Всеволодова, похована вь цр̃кви Св̃тго АндрЂя. Умерль теж Иωанъ, еп̃ископ черниговскиї.

Року 6620-г^Х Ярославъ, сын Св̃тополковъ, ходилъ противъ ЯтвЂговъ и звитяжил ихь, а вернувшися к Новгороду, послав і взявъ дочку Мъстиславову, Володимерову внуку, себЂ за жену. Того жь року Евфимию, кн̃яжну Володимеровну, венгерскиї корол взял себЂ за жену. Того жъ року Феоктистъ, игуменъ печерскиї, епископомъ черниговскимъ поставлен быстъ, а на его мЂсце поставлен был Прохор, попинъ, игуменомъ печерскимъ.

Року 6621-г^Ц /69зв./ преставился бл̃говЂрныи великиі кн̃зъ киевскии Михаилъ Св̃тополкъ Изяславичъ, тестъ короля Болеслава, в ВышгородЂ, мсца апрЂля 16 дн̃я. И привезли ево до Киева, и плакали над нимъ бояре і вся его дружина, и положили его в цр̃кви Золотоверхои св̃тго Михаила, которую самъ змуровалъ, на правои сторонЂ в притворЂ, в каменномъ гробЂ. А княгиня, жена Св̃тополкова, такъ великую млстиню за дш̃у мужа своего монастыромъ, свещенникомъ и убогимь роздала, же всЂ дивовалися, гдыж никто такои пред тымъ великои не учинилъ млстыни.

По смерти Св̃тополка стался розрухъ: жолнЂре и иншиї при них в Киевє розграбили двор Путяты и жидовскиї дворы, и скарбы побрали, а киянє /70/ што наирЂхлЂи послали з тоею вЂстъю до Владимера, просячи его на княжение Киевское. Тое услышавши, Владимеръ плакалъ смерти Св̃тополковы.

Глава 22

Ω КНЯЖЕНИЇ ВЛАДИМЕРА МОНОМАХА И Ω ВТОРОМ ПРЕНЕСЕНИЇ МОЩЕИ СВ̃ТЫХ МУЧЕНИКЪ БОРИСА И ГЛЂБА

Кн̃зь Владимеръ Мономахь приЂхал до Киева, усмирилъ тыи бунты и сЂль самъ на столицы от̃ца своего Всеволода в Киевє, а ^45—Ярополъкъ сЂлъ в Володимери на Волыню^—45. Послышавши половцы о смерти Св̃тополка, вбЂгли были /70зв./ в Рускую землю. Володимеръ о них услышавши, зъ Олгомъ посполу, из сынми и з сыновцами своими пошовши, прогнав половцов, з земли Рускои. Потомъ кн̃зъ киевскиї Владимерь Мономах, подзоръ маючи ω сынЂ Св̃тополковомъ ЯрославЂ, кн̃зЂ владимерскомъ, жебы его з княжения Киевъского не выгналъ, змовившися и зшовшися с князями перемышскими Восилкомъ^Ч, ^Ш—Ш Ростиславомъ Володимеровичомъ^Щ, пошовши з воискомъ, облегли в Володимери Ярослава Св̃тополковича, а Ярославъ, не чюючи себе і въ чомъ быти виннымъ, з мЂста без обороны вышол, а^Ю Владимера лагодными словами переедналъ, просячи, абы клеветниковъ не слухал и похлЂбцов. /71/ И такъ поеднаныи Владимеръ отишолъ до Киева. Знову не за долгиї часъ ωклеветали Владимеру Ярослава, якобы хотЂлъ Владимера з киевскои столицы выгнати албо забити. Владимерь послалъ до Ярослава, жебы к нему до Киева приЂхал. Але Ярославъ, остереженныи от жолнЂров, иж небезпечно здоровя Ђхати до Киева, покинувши свою столицу Владимеръ своему рыцерству, з женою, з детми и со всЂмъ своимъ скарбомъ отЂхалъ до кн̃зя Болеслава Кривоустого, швагра своего, ωт которого былъ вдячне принятыї. А кн̃зъ Владимерь вмЂсто^Я Владимера^Ь опоновалъ и посадилъ тамъ сн̃а своего Романа. Сн̃овъ теж своихь Св̃тослава в Переясловли, а Вячеслава /71зв./ вь Смоленску посадилъ. Сн̃у своему Роману понялъ за жену Володимеровну^А. Того ж року Мъстислав заложив цр̃ковъ каменную Св̃тго Николы на княжомъ дворЂ у торговища в НовгородЂ. Того ж року Владимерь посадиль сн̃а своего Ярополка в Переясловли.

Року 6622-г^Б преставился Св̃тославь, сн̃ъ Владимеровъ, и положенъ в це̃ркви Св̃тго Михаила в Переясловли, а Мъстислав Новгородъ болше первого роспространивъ.

Року 6623-г^В Владимеръ Мономахъ, змуровавъши в ВышгородЂ цр̃квъ камен. во имя Св̃тых мученикъ Бориса и ГлЂба, з братъею своею, сь Давыдомъ Св̃тославичомъ и Олгомъ, братомъ его, перенесли мощи св̃тыя мученикь Бориса и ГлЂба /72/ в тую цр̃ковъ. При томъ перенесениї былъ митрополитъ Никифорь и Феоктистъ, епископъ чернЂговскиї, Лазарь переясловскиї, Никита белогороцкии, Даниилъ гурговскиї, игумены Прохор печерскиї, Селивестръ Св̃того Михаила, Сава Св̃тго Спаса, Григориї Св̃тго Андрея, Петръ кловскиї и инши игумены. И перше освятили цр̃ковъ новую каменную, потом перенесли мощи св̃тых мученикъ в тую новую, на ихъ имя змурованную, а гды не могли за мнозствомъ людеї в церковъ внести, сребро казалъ Владимерь метати^Г . Которое хвотаючи, люди роступилися от части, и такъ ледве внесли в церковъ и поставили на правои сторонЂ /72зв./ в церкви. А Владимеръ труны св̃тых оковал сребромъ и позолотилъ. Также и мЂстце тое, гдЂ ихь поставлено, приоздобилъ. Того ж року преставился кнзъ чернЂговскиї Олегь Св̃тославичъ и похованъ у Св̃тго Спаса в ЧернЂго†подле от̃ца своего, В тои же рокъ Владимер учинил мостъ через Днепръ.

Глава 23

Ω ДАЛШОМЪ КНЯЖЕНИЇ ВЛАДИМЕРА МОНОМАХА И Ω ЗВИТЯЗСТВАХЪ ТАКЪ ЕГО, ЯКО И ИНШИХЪ КН̃ЗЕИ, Ω СМЕРТИ ВЛАДИМЕРОВОИ, И ПОХВАЛА ЕГО ВЕЛИКАЯ

Року 6624-г^Д кн̃зь Владимеръ з сн̃ами своими и з Давыдом /73/ Св̃тославичомъ, и зъ Олговыми сынами ходил на ГлЂба, кн̃зя, къ Смоленску за тое, жє ГлЂбъ повоевалъ Друговичи и Случескъ запалил, и укаряв Владимера. Тогды взялъ Вячеславъ Оршу, а Давыд зъ Ярополкомъ Дрогоитескъ. Владимер самъ пошолъ къ Смоленску. Князъ зас ГлЂбъ заперлъся въ Смоленску. И гды Владимер против Смоленску почалъ ставити избу, устрашился его ГлЂбъ, послалъ до Владимера, просячи ω покої. Владимерь, зжалившися кровопролития, ωбЂцал покои. И такъ ГлЂбъ, вышовши з мЂста, поклонился Владимеру, обЂцуючи ему послушным быти. А Владимер, давши ГлЂбу покої, дал ему Минскъ и отишолъ до Киева. Ярополкь тых же /73зв./ часовъ збудовал город Желды другоїчаномъ, которых былъ пополонилъ.

Мъстиславъ Володимеровичъ з новгодцами^Е и с пековцами^Є ходил на Чюд і взялъ ихъ город именемъ Медвежая Голова и погость, а набравши много корысти, з полоном великимъ вернулся додому. Того ж року Леωн, царевичь, зятъ Володимєров, ходив на куръ^Ж і взялъ с килка городов дунаискихъ, тамъ же ωт двухъ сарацениновъ лестию забив^З. А Владимеръ послал Иоанна Воїтишича и посажал старосты свои над Дунаемъ. Сына зас своегω Ярополка зъ Всеволодомъ Давыдовичомъ послал на.Дон, где взяли три городы половецкиї, Сугровъ, Щарукан и Балинъ. Оттолъ Ярополкъ /74/ привелъ себЂ жону, полонивши яскаго кн̃зя дочку. Вячеславъ тежь з Фомою Ратиборичемъ ходилъ къ Днестру. Того ж року преставился Романъ Всеславичь и Мъстиславъ, внук Игоровъ. А Володимер отдалъ дочку свою Агафию за Всеволода.

Року 6625-г^И Владимер привелъ сн̃а Мъстислава з Новгорода и далъ ему БЂлъгород, а внука своего, сн̃а Мъстиславового, посадилъ в НовгородЂ. Ярослав, сынь Св̃тополковъ, кн̃зъ володимерскиї і волынскиї, мешкалъ у кн̃зя полского Болеслава. ^І—І На помощъ и Коломана, брата короля венгерского Стефана, такъжє князеи Володаря и Василка перемышлъскихь и Володимера Володоровича, взявши /74зв./ от них воиска часть, зараз на Волыню свои мЂста Володимерь, Балзь и иншиї ωтобралъ. Потом з Болеславомъ и з ыншими пошол под Киевъ. Владимеръ Мономахъ ωтишолъ тогды на БЂлую Рус, и гды Ярославъ поишолъ под Киевъ, зъ Киева Владимерово рыцерство моцно было на Ярослава. И любо его ляхи и венгеры оборонили, еднакъ, в килкахъ^Ї мЂстъцах пораненыи, Ярослав рыхло умеурлъ, а Болиславъ з ляхами и з венгерами, за порадою и причиною Володоря и Василка покої давши Кафу^Й, отишли домовъ. Того ж року понялъ Владимєръ Тугортъканову внуку за жену АндрЂю, сн̃у своему, и ГлЂба вывелъ з Смоленска. Цр̃ковъ теж заложмл на АлтЂ рецЂ /75зв./ Св̃тых мученикъ Бориса и ГлЂба на томъ мЂстцу, где забито св̃тго Бориса.

Року 6626-г^К преставился Роман Володимеровичъ, кн̃зъ владимерскиї. На его мЂстце Владимерь послал другого сн̃а своего, АндрЂя, да^Л Володимєра.

Року 6627-г^М Владимерь взялъ кн̃зя ГлЂба з Минска и привез его до Киева, где того ж року и умерлъ ГлЂб Всеславичь.

Року 6628-г^Н Георгиї Владимеровичъ ходилъ по ВолзЂ на Болгары и повоевали ихь, вернулся с корыстъю и з полономъ многимъ. Такжє Андреи Владимеровичъ ходил на Ляхи и повоевал ихъ и, много корысти и полону набравши, вернулъся. Того ж року преставился Ростислав Давыдовичъ.

Року 6629-г^О Владимеръ прогналъ з Руси /75зв./ берендичеωвъ и тораковъ^П, и печенигов. Того жъ часу Володорь, кн̃зь перемышлъскиї, сн̃а своего Владимера з воискомъ послал на Ляхи и, много лядскихъ волостеи збуривши, зъ скарбомъ великимъ и з полоном ^Р—вернулся вєрнулся^—Р до ωт̃ца кь Перемышлю^С.

Року 6630-г^Т Владимерь Мономахъ Всеволодовичь, кн̃зъ киевскии, преставился и похован в церкви Св̃тої Софиї в Кие†при отцевскомъ гробЂ. Тои Владимер Маномахь Рус, утравленую и незгодами, і воинами междусобными сынов Владимеровых розорваную, своимъ разумомъ и мужествомъ вь едино злучил і в монархию албо самодерчс̃тво по-старому привел, смиривши незгодных кн̃зеи; всЂмъ неприятелемъ был моцныї и страшныї, половцов значне бивал, /76/ генвенсовъ и волохов в ТаврицЂ, гдЂ теперь Перекопъ, бивал и Кафу, мЂсто славное столечное, под ними взялъ. Тої же Владимерь, гды над моремъ з венгерами^У мЂлъ потыкатися, гетмана ихъ, старосту кафского, вызвалъ самъ-на-сам, и гды ωбодва^Ф до себе скочили, Владимерь того гетмана копиею з коня выпъхнул и, поимавши, звязал, и до своего воиска узброенного за всЂмъ привел, знялъ с него ланцугъ золотыи из^Х перлами и з^Х каменми дорогими саженыи, которыи бармои называют, да и поясъ золотыи з перлами, изоставил тыи клеиноты потомкомъ своимъ, великимъ кн̃земъ. Такжє и шапку кн̃жую з бляхами золотыми, перлами и иншими дорогими каменми /76зв./ коштовне саженую, зоставил на посвЂщение великих кн̃зеи и для маестату албо престола величєствия. И до сего дн̃я, повЂдаютъ, ижъ тыи клеиноты в скарбЂ цр̃еї бл̃гочестивыхъ московских сутъ, и уживаютъ ихь при посЂщению на црство, ωт того Владимера Маномаха род свои проводятъ и самодержцами албо монархами называются. Владимер тои для того Мономахомъ названныи, ижъ самъ-на-самъ неприятєлєи вызвалъ и з ними, самъ потыкаючися, звитяжал, ^46—бо «мономахъ» — грецкое слово, значитъ: «самоборець», «самъ-на-сам биючися»^—46.

Глава 24

Ω КНЯЖЕНИЇ МЪСТИСЛАВА, СН̃А ВЛАДИМЕРОВОГО, Ω ПОИМАНЮ КН̃ЗЯ ПЕРЕМЫШЛЬСКОГО ВОЛОДОРЯ И О СМЕРТИ МЬСТИСЛАВА /77/

По смерти Владимера Мономаха сЂлъ на столицЂ киевъскои сн̃ъ его старшиї Мъстиславъ, а Ярополкъ, другиї сын, сЂлъ в Переясловли. Того ж року и митрополитъ киевскиї Никифор преставился. ДовЂдавшися рыхло о смерти Владимерової, половцы пришли под Переясловлъ, которых Ярополкъ, кн̃зь переясловскиї, зь своимъ воискомъ поразил, звитяжилъ и утЂкаючихь в рЂкахь много натопил.

Року 6635-г^Ц умерла княгиня, Мъстиславова жена, а дочка его за грецкого цр̃я отдана, и Никита, митрополитъ, пришол з Грекъ до Киева. Того ж, року ляхи поимали князя перемышлъского^Ч Володора, которого братъ Василко дорого выкупил. Потомъ кнзъ Воладарь^Ш умерлъ и похован /77зв./ в Перемышлю, в цр̃кви Св̃тго Иоанна. Зоставил по собЂ двухь сыновъ, Владимера названыї городЂ^Щ и Ростислава на княжениї Перемышлъском, которыї также по смерти от̃ца своего Володоря за княжениє зь собою билися. Потом палочане выгнали Давыда зь сынами, своего кн̃зя, і взявши Говъголодалода^Ю, просили Мъстислава, абы его имъ далъ за князА. Учинил по воли ихъ Мъстиславъ, и посадили Ровголода в Полоцку. Того ж року преставился кн̃зъ Изяслав Св̃тополчич, декабрия тринатцатого дн̃я.

Року 6637-г^Я преставился кн̃зъ полотскиї Борисъ. Того ж року заложилъ Мъстиславъ цр̃ковъ каменную Св̃тго Феодора в КиевЂ.

Року 6638-г^Ь преставился /78/ Михаилъ Вячеславъ, внукъ Владимеровъ, а Мъстиславъ, кн̃зъ полотскиї, з женами и з детми на заточение въ Грецию послал, же приступили присягу и не слухали его. Того ж року Георгиї Шимоновичь ωковалъ сребромъ гроб св̃тго Феодосия Печерского при игуменЂ ТимофЂи.

Року 6639-г^А послал Мъстиславъ сн̃овъ своих Всеволода, Изяслава и Ростислава на Чюд и взяли их, и наложили на них данъ. Того ж року пришол митрополит Михаилъ.

Року 6640-г^Б родился у Мъстислава сн̃ъ Владимеръ, а Мъстиславъ самъ з сынами своими и зь Олговичами, и з Всеволодом городеским ходили против литвы и пожгли много, але литва имъ дала отпорь.

Року 6641-г^В /78зв./ преставился кн̃зъ киевскиї Мъстиславъ Володимеровичъ апрЂля 15 дн̃я и положенъ в церкви Св̃тго Феодора, которую самъ змуровалъ.

Глава 25

Ω КНЯЖЕНИЇ В КИЕВЂ ЯРОПОЛКА, Ω ЗВИТЯЗСТВЂ ЕГО ЗНАЧНОМЪ НАД БОЛЕСЛАВОМЪ, КН̃ЗЕМ ПОЛСКИМЪ, О ВОЇНАХЪ ЗЬ ОЛГОВИЧАМИ И О СМЕРТИ ЕГО

Ярополкъ, братъ Мъстиславовь, сЂлъ на княжениї Киевскомъ. Для того другиї кн̃зи природныї киевскиї облегли Киевъ з воїсками и Ярополка добывали. Теды Ярополкъ /79/ учинилъ з ними покои и далъ АндрЂеви, брату своему, Переясловлъ, а Изяславу Мъстиславичю Володимеръ. Потомъ Олговичи, кн̃зи черниговскиї, потребовали у Ярополка, абы имъ дал тое держати, що ихь от̃ць держалъ при его ωт̃цЂ. Ярополкъ имъ того не далъ. ^47—Року 6644-г^Г Всеволод з братиею своею, взявши на помочь половцовъ, пошли з Чернигова^—47 под Переясловлъ и над Сулою мЂстечка и села пустошили мечемъ и огнемъ. А гды пришли на Супонскиї^Д волости, пришол на них Ярополкъ зъ сынами Владимера, брата своего, и бившися з ними, поразил воиско Олговичовъ и половецкиї такъ, ижъ мусили утекати. Потом обернувшися Ωлговичи, /79зв./ з половцами исправившися, погнали ихь, женучих, и много побрали бояръ киевскихь и сыновца Ярополкового, кн̃зя Василка. А Ярополкъ отишол до Киева з братиею и зобралъ великиї воиска. Ωлговичи зась з половцами повоевали Триполъє, Василевъ, БЂлагород, Вышгородъ и облегли Ерополка в КиевЂ. А Ярополкъ, хотяї имЂль чЂмъ ихь прогнати, великое барзо воиско маючи, еднакъ яко барзо добротливыї, не хотячи кровопролития хрстиянского и суда Бж̃иего боячися, не выходил противъ ихь, але волЂл на собЂ ^Е— до собЂ^—Е досаду понести, послал до Олговичов и учинил покои з ними, пустивши имъ тыи волости, которыї /80/ от̃ць ихъ держалъ. И такъ кождыи до своего отЂхалъ княжения.

Року 6645-г^Є епископъ Маноелъ першиї в Смоленску поставлея. Того ж року суздалцы новгородцовь побили, и кнзь Юриі пошолъ к Ростову, а Всеволод отдал дочку свою в Лядскую землю Верхуславу.

Року 6646-г^Ж выгнали новгородцы от себе Всеволода Мъстиславича, а Св̃тослава Олговича себЂ кн̃зя взяли, и далъ Ерополкъ Всеволоду Вышъгород, але оттол плесковичи Всеволода себЂ за кн̃зя взяли. Тамъже ωнъ преставился и положенъ в церкви Св̃тои Троицы, которую ωн^З самъ збудовал. Потом князь Ерополкъ, созвавши иншихъ князеи до Киева, урадил /80зв./ з ними воину на Ляховъ поднести. Тое звЂдавши, кн̃зъ полскиї Болеславъ Кривоустыї радился з своими сенаторами на кн̃зеи руских. Там же нЂякиї панъ Петръ Влостовичъ поднялъся Болеславу Ярополка поимати и привести яко началника и порадцу воины на поляковь. Измысливши себе от Болеслава выгнанымъ, приЂхалъ до Ярополка, радячи ему воїну на ляховъ. Ярополкь, увЂривши, принялъ вдячнє Влостовича и ему своеї думы ω тои жє воинЂ звЂрился. А гды едного часу выЂхал Ярополкъ на футоръ з малою дружиною, Влостовичъ з ним жє выЂхалъ и, прибравшися з кревными^И товарыщами, порвалъ Ярополка /81/ несподЂване и занесь до Белеслава, где гды седЂлъ за сторожею, выкуплен от Василка, кн̃зя премышлъского, и от иншихъ, приЂхал до Киева.

А взаимъ свое хотячи ωтдати, Ярополкь направил венгрина своего, которыї учинился выгнанымъ ωт венгерскогω короля, пришол до Беласлава полского, повЂдаючи себе выгнанымъ за тое, же радил, абы Болеславового внука венгерскимъ королемъ учиненно. Болеслав его принялъ и до рады сенаторскои припустил, давши ему староство вь славномъ і великомъ на тотъ часъ мЂстЂ Вислицы и ωборонномъ, от Кракова милъ девятъ. А гды Болеслав з многими сенаторами ωтЂхалъ до Барберку^І, немецкого мЂста, на розмову з цесаромъ, веягринъ пустил вЂстъ, же /81зв./ кн̃зи рускиї идутъ на Ляховъ, и казал околечнои шляхтЂ и людемъ зо всЂмъ везстися до Вислицы, яко до оборонного мЂста. Где гды полно мЂсто людеи с скарбами навезлося, венгерынъ далъ знатъ Ярополку, а Ярополкъ, увЂдомаеныи^Ї, поспешилъся з воискомъ, и отворилъ ему венгерын, ^Й—дал знатъ^—Й Вислицу.

Там же вьишовши, Ярополкъ и иншихъ казал забивати, не смотрячи на възростъ, и инных з великими скарбами з собою позабирал, и мЂсто запаливши, и иншиї волости попустошевъ^К, вернулся до Киева.

Потомъ другиї раз Ярополкъ отдал за своє Болеславови. Выгнали кн̃зи з Галича Ярослава, кн̃зя галицкого, которыи выгнаны просилъ о помочъ Болеслава, абы его на княжение /82/ Галицкое впровадил. А Ярополкь намовил галичан, абы Болеслава просили, жебы имъ кн̃зя ихь привернул. Нанялъ тежь Ярополкъ себЂ на помочь венгеровь, абы и тыі посили^Л Болеслава о приверненьє Ярослава на Галицкое отчиское княжение. Болеслав, послухавши, поправадилъ з воискомъ своимъ до Галича Ярослава. И гды до Галича приближался, подкали его венгеры и, поклонившися, стали за Болеславомъ вь справЂ, потомъ галичане так жє учинили. Затымъ зараз Ярополкъ, з воискомъ своимъ пришовши^М, ударилъ на Болєслава зпереду, а венгеры з галичанами ззаду. И такъ ляховъ латво розгромили, побили в полон побрали и под самымъ Болеславомъ коня забили, ледве его единъ жолнЂрь, на своего коня узсадивши, унеслъ. /82зв./ Такъ два разы Ярополкъ значную помсту над Болєславомъ и звитязство взявши, з великими скарбами и з полономъ вернулся до Киева, а Болеслав, прибЂгши до Лядскои земли своеи, зафросовавшися тоею своею великою поражкою и соромомъ, умеръ.

Року 6647-г^Н выгнали новгородцы Св̃тослава Олговича, а Ростислава Гургиевича посадили у себе. Св̃тослава засъ смолянє приняли к себЂ.

Року 6648-г^О Всеволод Олговичъ, знову затягнувши половцовъ, взялъ Прилуку и иншиї городы понад Сулою. Ярополкъ тежь з братиею своею и з сыновцами собрал барзо великое воиско киянъ, суздалцовъ, ростовцов, полочан, смолянъ, переясловцовъ. И Василко Володаровичъ^П приславъ галичан, а кролъ /83/ венгерскиї венгровъ^Р на помочь, и берендичевъ, и иншихь много. И пошолъ к ЧернЂгову на Олговича. Всеволод Олговичъ, почювши воиско зъ Ярополкомъ великое, хотЂлъ з Чернигова утечи в Половецкую землю, але чернЂговцы ему радили, абы, не губячи своеи земли половцами, просилъ у Ярополка, яко у млсрдаго кн̃зя, покою. Учинилъ такъ Всеволодъ, просилъ. А Ярополкъ добротливыї, кровопролития не хотячи, учинил зъ Всеволодомъ примире и, роспустивши воиска, пошол до Киева. Того жъ року Ярополкъ, кн̃зъ киевскиї, преставился ^48—февраля 10-г дн̃я^—48, и положенъ в манастырЂ Св̃тго АндрЂя в Киевє. /83зв./

Глава 26

ВЯЧЕСЛАВЪ, БРАТЪ ЯРОПОЛКОВЪ, ВСЕВОЛОДУ КНЯЖЕНИБ КИЕВСКОГО УСТУПУЄТЪ, Ω КНЯЖЕНИЇ ВСЕВОЛОДОМ И ВОИНЂ ЕГО ТУТЪ, О ВЛАДИМЕРИ, КН̃ЗЂ ГАЛИЦКОМЪ, и Ω СМЕРТИ ВСЕВОЛОДОВОЇ

Вячеслав, братъ Ерополковъ родныи, сЂлъ на столицы киевскои, о чомъ довЂдавшися Всеволодь Олговичъ, собравъ воиско, з братомъ своимъ Св̃тославомъ и з Володимеромъ Давыдовичом пришол под Киевъ. А Вячеславъ, не хотячи кровопролития для княжения, выслалъ къ Всеволоду митрополита, которыї ихъ помирилъ, ижъ Вячеславъ поступил Всеволоду Киевъ, а самъ взял себЂ княжениє /84/ на ТуровЂ. СЂлъ на столицы киевскои Всеволод Олговичь, з великою честию принятыи, марта вь ден 5. Обецал тежь был Всеволод дати Игору по себЂ Чернигов и не далъ, але далъ Владимеру Давыдовичю и звадивъ тымъ братию. Тогды ж вышли з Грекъ засланы от Мъстислава, кн̃зя киевского, на заточение кн̃зи. Потомъ Всеволод, хотячи и иншиї княжения посЂсти и самодержцемъ быти, повстал на братовъ и на сыновцовъ Ярополка, умерлого князя киевского, на АндрЂя и Вячеслава Володимеровичовъ и на Изяслава, и Ростислава Мъстиславовичовъ^С, и на инших. У АндрЂя хотЂл взяти Переясловлъ, ^49—а ему Курскъ давал^—49, у Изяслава хотЂлъ Володимер взяти и у инших ихь княжения, /84зв./ ^50—а имь давал Берестъе, Дорогочин, ЧорторЂїскъ и Клецкъ^—50, а они не хотЂли. ^51—ПоЂхал теды Всеволод воиною на АндрЂя до Переясловля. Изяслав, сн̃овецъ АндрЂевъ, з своимъ воискомъ прибЂгши под Переясловлъ, помогь стрию АндрЂю^—51, и розбили воиска Всеволодовы ^52—Ростислав з полками смоленскими идучи и знявшися зъ Изясловомъ, братомъ своимъ, волости Олговичовъ, братиї Всеволодовыхъ, попустошили^—52 около Чернигова за тое, же на ихъ стриевъ, АндрЂя и Вячеслава, воевали. Игоръ Олговичъ з братиею, хотячи своего на Мъстиславичах, Ростисла†и ИзяславЂ, помъститися, пошол да^Т Переясловля на АндрЂя, стрия ихъ, и, три дн̃и тамъ стоявши и ничегω /85/ не учинивши, ωтишолъ.

Потомъ Всеволод, кн̃зъ киевъскиї, другиї раз послалъ брата своего Св̃тослава з воискомъ до Переясловля, але АндрЂеви Бг̃ь помогь, прогнали Св̃тослава ажъ до Караны. И оттолъ Всеволод учинилъ покои зь АндрЂемъ, на што обое себЂ присягли, также и зъ Вячеславом, братомъ его, и зь Изяславомъ Мьстиславичемъ, сн̃овцом его, учинил покои.

Того ж року родився у Всеволода сын Ярославъ. Тогды ж новгородцы выгнали от себе Ростислава Гургевича і, выпросивши у Всеволода брата Св̃тослава, посадили в НовъгородЂ. Потом повстали и на Св̃тослава, брата Всеволодового, такъ, же аж мусил з Новгорода з женою и з детми утечи, а новгородцы /85зв./ у Всеволода просили сн̃а его себЂ, и далъ имъ сн̃а Св̃тослава. Потомъ новгородцы рекли Всеволоду: «Не хочемъ твоего племяни себЂ князя, але хочемъ Владимерового племяни». Всеволод не хотЂл Владимеровому племяни Новгорода пустити, взял к себЂ значнЂишихь новгородцовъ и епископа и никого к нимъ не послал. Теды новгородцы послали к Гургиеви и упросили у него Ростислава Гургиєвича, и посадили в НовгородЂ ^У—СЂверскомъ^—У. Потом перешол в Курскъ. Потомъ дал ему братъ Всеволодъ БЂлъгород.

Року 6649-г^Ф преставился кн̃зь переясловскиї Андреи Владимеровичъ и положенъ в церкви Св̃тго Михаила в Переяславли. И сталося знамение на небЂ: три солнъцы /86/ и три столпы свЂтлыї от земли до неба, и мсцъ. И стояли потолъ, покол погребли князя АндрЂя. Того ж року^Х в Галичи преставился Іван Василковичъ и принялъ его волостъ Владимерь Володаревичь, и сЂлъ на обоихь княженияхъ: на своемъ Перемышлъскомъ і на Галицкомъ. Всеволод городенскиї тогды ж преставился.

Року 6650-г^Ц послалъ Всеволод, князъ киевскиї, Св̃тополка, швагра, шурина своего, къ Новгороду з тыми новгородцами, которых был у себе задержалъ. И посадили Св̃тополка в НовгородЂ, а Гургевича, стрЂичича своего, пустилъ къ ωт̃цу его в Суздалъ. Послалъ тежь Всеволод до Вячеслава, брата АндрЂева.мовячи: «Иди в Переясловлъ /86зв./ на свою ωтчину, а сынцу^Ч своему Изяславу даи Владимер, а Св̃тославу, сн̃у своему, даи Туровъ». И такь учинил, але братиї Всеволодовои, Св̃тославу, Игору, тое тяжко стало. ^53—Потомъ Игорь и Св̃тославъ^—53, Владимер Давыдичъ, Вячєславъ Владимеровичъ, Мъстиславичов два, Изяславъ и Ростиславъ, и Всеволодичовъ два, Борисъ и ГлЂбъ, и Ростиславъ ГлЂбовичъ,

і Владиславъ, кн̃зь лядскиї, пошли з воискомъ на Владимера Володаревича к Галичю, примушаючи его, жебы Всєволоду поклонился. А Владимеръ не хотЂлъ поклонитися Всеволоду, але собралъ свое воиско и, венгеръ на помочъ затягнувши, стали над БЂлкою рекою. Притягнул тут жє и Всеволод и казал /87/ гати чинити. А Владимеръ, видячи болшую силу Всеволодову, до того и за порадою галичан, послалъ до Игора, брата Всеволодового, просячи, абы его зъ Всеволодомъ поедналъ, обЂцуючи ему в потребахъ его помогати. Игор, послухавши прозбы Владимеровы, поедналъ его зъ Всеволодомъ и, выехав кь Всеволоду, Владимер поклонился Всеволоду и далъ Всеволоду 1400^Ш гривенъ сребра. И, цЂловавши Всеволод Владимера и сребро взявши, реклъ ему: «Болшеи не согрЂшаї». Ωтдалъ ему его^Щ городы и пошол до Киева.

Тоеи же зимы, гды Владимерь Володаревичъ выЂхал з Галича на ловы, галичане князя Івана Ростиславича з Звенигорода привели себЂ /87зв./ в город Галичъ за князя. Тое услышавши, Владимеръ собралъ дружину свою з воиском, пришолъ к Галичу и билися моцно з княземъ Іваномъ и з галичаны, и побивали галичанъ, и заступили в поли от города князю Івану, а ωн, видячи, же не можна в город вернутися, побЂгь кь Дунаю, а ωттолъ Полемъ Киеву. Галичане, еще весь тыжденъ бившися з Володимеромъ и звитяженыи, мусили его в город пустити. Где вьишовши Владимер, многихъ постинал, и сЂлъ на своемъ княжениї. Того жъ року заложилъ Всеволод цр̃ковъ в КаневЂ^Ю Св̃тго Георгия.

^54—Року 6651-г^Я—54 призвавъ Всеволод к себЂ братиї своихь Игора и Св̃тослава, і Володимера Давыдовича, Изяслава Св̃тославича и реклъ имъ: «По /88/ смерти моеи Игору, брату моему, даю киевскую столицу. ЦЂлуите на томъ крестъ, желаетє^Ь Игора слухати, а ты, Игоре, маешъ в любви с ними жити!». И целовавши на томъ всЂ кресть князи, любо Изяславъ не был до того охочи. Потом Игоръ з братомъ своимъ Св̃тославомъ и Владимеромъ, затягнены от Владислава полского, противъ братовь Владиславовых ходили и, воевавши, змирили братиї Владиславовых з нимъ и з корыстъю вернулися додому.

Тоеи ж зимы умерь Святославь, сын Ярославов, у МуромЂ. Брать его Ростиславъ сЂлъ у МуромЂ ^А—у МоромЂ^—А, а Ростиславича ГлЂба меншого посадили к Резани. Тогды ж Владислав ослепил /88зв./ Петрука своего, ляха, и языкъ ему урЂзал, і выгналь его з Лядскои земли. Которыи Петрукъ поимал был лестию Володаря, князя руского, и безчестилъ, и имЂние побравши, завезлъ в Лядскую землю, якь выше реклося.

^55—Року 6б52-г^Б—55 Всеволод зь Игоромъ, братомъ своимъ, и з Давыдавичами, и з Вячеславомъ Владимеровичомъ, Иззяславомъ^В Св̃тославичомъ, и з своим сн̃омъ Св̃тославомъ, и з Владиславомъ, лядским княземъ, з зятемъ своимъ, ходиль к Галичю на Володимера и, змиривши, дал Игореви Городецъ, Гургеви Роячевъ^Г , а Св̃тославу Клецкъ и ЧорторЂискъ. И розышлися тогды ж Вячеславъ, ωтдавши сн̃овцу своему Переяслъ, самъ пошол до Турова, а Всеволод сн̃у /89/ своему Св̃тославу ωтдалъ Володимер. Того ж року посылалъ Всеволод сн̃а своего Св̃тослава зь Володимеромъ галицкимъ на помочъ Владиславу лядскому, зятю своему, противъ братомъ его меншимъ Болеславичом, и ωттолъ вернулїся з корыстью. Знову Всеволодь з воискомъ ходилъ на Владимера к Галичу, же Володимеръ з нимъ вадился за сн̃а егω, ижь посадилъ в ВолодимерЂ. Але Владимер з галичанами далъ ωтпоръ Всеволоду и, вернувшися Всеволод до Киева, захорЂлъ и кияном посадилъ^Д брата своего Игора. Кияне егω приняли, але нещире.

^56—Року 6653-г^{Е —56} преставился кн̃зь киевскиї Всеволод Ωлговичъ августа 1-г дн̃я, и положили его в цр̃кви Св̃тых мученикъ. /89зв./

Глава 27

Ω ПОИМАННЮ ИГОРА ОТ ИЗЯСЛАВА, Ω КНЯЖЕНИЇ ИЗЯСЛАВОВОМЪ В КИЕВЕ, Ω ВОИНЂ ЕГО З СВ̃ТОСЛАВОМЪ, БРАТОМЪ ИГОРЕВЫМЪ, I Ω ПОСТРЕЖЕНЮ ИГОРА

По смерти Всеволода Олговича Игоръ, братъ его, сЂль на киевскои столицы, але кияне его любо приняли, еднакъ, не улюбивши его, послали до ^57—Изяслава Мъстиславича, внука Маномахова^—57, до Переясловля, просячи его, абы Ђхалъ на княжение Киевское, мовячи: ^58—«Тебе хочемъ, ты природныї кн̃зъ киевскиї, а Игорь черниговскихъ кн̃зєи»^—58. Изяслав, принявши поселство, з воискомъ ишол до Киева. Игоръ, почювши Изяслава, з братом своимъ Св̃тославомъ и зь сыновцом своимъ /90/ Св̃тославомъ собрался, и по Давыдичов, Владимера и Изяслава, послалъ, затягаючи на помочъ. Гды пришолъ Изяславъ под Киев, выехалъ Игоръ противъ его и билися моцно, але кияне и бЂлогородцы, і василяне зрадили Игора, прислали до Изяслава, що ωбачивши, Игоръ устрашился, и побЂгли. Св̃тослав, братъ Игоровь, побЂгъ за Днепръ, а Св̃тославъ Всеволодовичъ у Киевъ. Игорь засъ, утекаючи, угряз в болото з конемъ. Изяславъ Мъстиславичъ вьЂхал в Киевъ и сЂль на столицы от̃ца своего и дЂдов своихъ, а по четырех дн̃яхъ, поимавши Игора в болотЂ, привели до Киева до Изяслава. И послалъ его Изяслав в монастыр на Выдубечи, а тамъ, ωкававши, повезли до Переясловля /90зв./ і всадили в порубъ, в монастырЂ Светогω Иωанна. И разграбили кияне Изяславовы^Є домыї и села дружины Игоровы і Всеволодовы.

Св̃тославъ^Ж тежь Всеволодовича Изяслав, сестричича своего, водивши немало при себЂ, далъ ему Бузкъ и Межибожь и инших пять городовъ. А Вячеславъ, стриї Изяславав, побрал свои городы, которыи от него взял былъ Всеволод, и Владимеръ занял и посадил в немъ АндрЂевича. За що розгнЂвавшися, Изяслав послал Ростислава, брата своего, и Св̃тослава Всеволодича на стрия своего Вячеслава, и отнялъ ω^З негω Туров. Посадилъ в Туро†сн̃а своего Ярослава. ^59—Св̃тослав зас, брат Игоров, утекши /91/ за Днепръ, прибЂгь до Чернигова и упевнень от Давыдовичовъ, Владимєра, Изяслава, уповаючи^И на ихь присягу, сподЂвался от нихь помочи. Але иныи ему противъное мыслили, жебы его поимали и его волостъ взяли. З ЧернЂгова Св̃тославъ поЂхалъ кь Курску, з Курска до Новъгорода СЂверского, людеи к себЂ горнючи на Изяслава, князя киевского, затягнулъ тежь триста половцов себЂ^І на помочь. А Давыдичи пристали до Изяслава Мъстиславича. Теды Изяславъ послалъ сына своего Мъстислава з Давыдовичами и з переясловцами, и з берендЂями на Св̃тослава, Игорова брата^—59, кь Новгородку СЂверскому, /91зв./ самъ за ними ωбЂцуючи поїти. И пришовши под Новъгород, добывали Новгорода и билися моцно, и по селамъ попалили жита и дворы, и разграбили стада Игоровы и Св̃тополковови, клячъ стадныхъ три тысячи и конеи тысячю, и иншое все.

Св̃тославъ теж послал к Гургеви, на помочъ его просячи. Пошол был Гургиі, алє же за прозбою Изяслава Ростиславъ Ярославичъ з Резани ему перешкодилъ, его волости плюндруючи, послалъ сн̃а своего Івана Св̃тославу на помочъ, а самъ вернулъся.

^60—Изяславъ затымъ самъ з своимъ воискомъ поЂхалъ под Новъгород кь сн̃у своему и к Давидичемъ і взялъ Путивлъ^—60, путивлъцы бовЂмъ сн̃у и Давидичю не здавалися. А гдыжь пришолъ Изяславъ, самому здалися /92/ и присягли. I вишовши, Изяславъ казал всє, що было скарбу тамъ вь дворЂ Св̃тославовамъ, побрати и розделити. Що услышавши Св̃тославъ, порадившися зъ Іваномъ Гургевичомъ и з половцами, же корму мало мЂли, а жита попалены, з Новгорода пошол за всЂми своими на СЂвскъ до Карачева, за которым пошолъ Изяславъ Давыдовичъ, обЂцавши поимати Изяславу Св̃тослава. Але Св̃тослав, довЂдавшися ω его приходЂ, выбегши з своими, прогналъ Изяслава Давыдовича. Затым самъ Изяславъ з сыномъ своимъ и зь Владимером Давыдовичемъ притягнулъ под Карачєв. Што услышавши, Св̃тославъ бился з Карачева много, але не змогши, побЂгь до Вятичъ, а ^61—Изяслав Св̃тославич, /92зв./ Давыдичемъ давши Новгород СЂверскиї и всю волость Св̃тославу^Ї, самъ пошол до Киева^—61.

Тогω часу захорЂвши барзо Игоръ в вязеню в Переясловли, прислал до Киева, просячи Изяслава, абы позволил ему постричися у чернцы. Изяславъ, ωжалившися, позволилъ ему постричися и казал его з поруба выпустити. И привезли его до Киева, и постригъся у чернцы в монастыри Св̃тго Феωдора. Тогды жъ ^62—преставился Иванъ Гуревичь, помочникъ Св̃тославов, и приЂхали два браты его на Дон^—62 и, плакавши, поховали его, и пошли къ от̃цу своему къ Суздалю. А Св̃тославь пошол в верхъ Ωки реки ^Й—и, пришовши^—Й и пришовши, стал фрасовливыї на устью реки.

Року 6655-г^К послалъ кь Св̃тославу Гургиі, жебы до его приЂхалъ, и поЂхалъ Св̃тослав кь Гургию /93/ з малою дружиною и зь сн̃омъ своимъ Ωлгомъ, и з Владимеромъ Св̃тославичемъ. И приЂхавши, любезно привиталися з Гургиемъ, поцыловавшися, на похвалу Пресвятои Бд̃цы в постъ частовал ихъ Гургиї достаткомъ великимъ и, давши дары великиї Св̃тославу и сн̃у его Олгу, и Володимеру, отпустилъ, давши тєжь сн̃а своего з воискомъ Св̃тославу на помочъ.

Того ж часу Изяслав вывел з порубу Клима Смолятича, чернорисца и скимника, и казал поставити митрополитомъ в КиевЂ. И зьЂхавшися епископы мовили, же патриарху, а не намъ годится поставляти митрополита. А потом, же не могли послати до патриархи цр̃игородского, ^63—головою св̃тго Климента, папы рымского, котрую былъ привезлъ Владимеръ /93зв./ зъ Корсуня^—63, посветили митрополита.

Глава 28

Ω ЗМОВЂ ДАВЫДОВИЧОВЪ I ВСЕВОЛОДОВИЧА ^64—НА ИЗЯСЛАВА, КН̃ЗЯ КИЕВСКОГО^—64, Ω ЗАБИТЮ ИГОРА, О ВОИНЂ ИЗЯСЛАВОВОИ З ДАВЫДОВИЧАМИ И О ПРИМИРЮ З НИМИ

Св̃тославъ, ωтишовши от Гургия^Л з сыномъ Гургиевымъ ГлЂбомъ, взявши и половцовъ на помочъ, пошол на Давыдичовъ, побралъ ихъ волости и ишолъ на Изяслава Давыдича кь Крому. Затымъ Владимеръ Давыдовичъ и Св̃тославь Всеволодичъ прислали кь Светославу, просячи, /94/ абы ωн простил, что на его воевали ^М—МИзяславом, обЂцуючи под присягою ему на Изяслава помагати албо поиматї, албо убити Изяслава, и присягли на том Св̃тославу обадва Давыдовичи і Всеволод, и ωтдали Св̃тославу, що его было взяли. Зараз тєжъ ^65—послали Давыдовичи з Чернигова^—65 до Изяслава в Киевъ, зовучи его, ^66—жебы ишолъ на Св̃тослава за тое, жє ихъ Вятичи заЂхал, и на Гургия вь Суздалъ, жє Св̃тославу, ихь ворогу, дает помочь^—66. Изяславъ, увЂривши тому, думав з ними и зь Всеволодичомъ поити на Св̃тослава и на стрыя своего Гургия. Всеволодичь^Н67, держачи от Изяслава Бузкь, Межибож, Котєлницу и иншихъ десятъ городов, упросился у Изяслава наперед к Давыдичомъ в ЧернЂговь. Изяслав его отпустивши, собралъ киевлянъ и ознаимил имъ свою /94зв./ думу, же хочетъ ити на Гургия, стрия, и на Св̃тослава з Давыдовичами и з Всеволодовичем, и з братом своим Ростиславомъ, которои придетъ з воискомъ. Киевляне мовили: «Не иди на стрия, не вЂруи Давыдовичомъ и присязи ихь, ωшукаютъ тебе. Не поидемъ на племя Володимерово, а на Олговичов, то естъ на Давыдичов, издетми готовы». Изяслав, не слухаючи ихь, пошолъ и стал у Ростина, и през у ГлЂба взял з Чернигова вЂдомостъ, же его Давыдичи, змовившися с Св̃тославомъ Олговичемъ, хотятъ ошукати и поимати албо убити за Игора Олговича, жє ^68—его, въ чернъцы постригши, не отпускал з Киева^—68. Изяслав теды послалъ к брату своему Ростиславу, кн̃зю смоленскому, ωзнаимуючи тую зраду Давыдовичов, /95/ и приказал, абы к нему ишол Ростислав з воискомъ сопротивъ^О Гургию, смолян и новгородцов абы заставил, жебы его не пропускали.

Послал теж Изяслав и до Киева, до брата своего Владимера, которого был на своемъ мЂсцу оставил, и до митрополита, абы собравши киевълян на дворъ Св̃тои Софиї, ωзнаимили зраду Давидовичов на его и жебы ишли на Олговичов, якъ обЂцали. Киевляне тое учювши, з радостию за своим кн̃земъ Изяславомъ обЂцали на Олговъ род ити, а жє Игоръ постриженныи в Киевє у Св̃тго Феодора в монастырЂ был роду Олгового, надумали его перше убити, потомъ ити до ЧернЂгова на Давыдичев роду Олгового. И ^69—пошовши купою великою^—69, з монастыря, з цр̃кви Св̃тго Феодора похвати^П—ли /95зв./ Игора молящогося^—П. Владимер, прибЂгши, вырвалъ был Игора от нихъ и умъчав в домъ матки своеи, але киевляне мало и Владимера боронячого не убили и, митрополита не слухаючи, выбивши ворота в княжомъ дворЂ, похватили Игора и, на торгъ выволокши, ωкрутне забили сентябрия 19 дн̃я, и рекли: «Не мы его забили, але Давыдичи и Олговичи, на кн̃зя нашего зраду учинивши». За росказанемъ Владимера взяли тЂло Игорово нагое з торгу и положили ^70—в церкви Св̃тго Михаила Золотоверхого^—70. И сталося чюдо в це̃ркви Св̃тгω Михаила, сами свЂчи загорЂлися, а митрополитъ, пославши Ананию, игумена манастыря Феодоровского, погребсти тЂло казалъ. Которыї взявши честно /96/ тЂло Игорово, поховал в монастырЂ Св̃тго Семиона на концу мЂста, которыи манастыр был прадЂда его Св̃тослава. Услышавши тое Игорово забитъе, Изяславъ плакал и реклъ: «Гды бымъ тое зналъ, казал бымъ стеречи моцно ωт забоиства Игора. Скажутъ, же я его велЂлъ убити». Рекли ему дружина: «Убили его братия его Давыдовичи и Олговичи, которыї под тобою зраду чинили. Не фрасуися о томъ».

Владимер тежъ и Изяславъ Давыдовичи, вЂстъ взявши и^Р о забитъї Игора, брата своего, барзо плакали и, знявшися з ГлЂбомъ Гургиевичомъ и з Св̃тославом Олговичом, пошли на Св̃тослава, сн̃а Изяславова, до Курска. Не уфаючи курсчаномъ, Изяславичъ поЂхалъ до Изяслава, ωт̃ца своего, а Давыдичи и Гургиевич, /95зв./ знявшися с половцами, побрали мЂста Изяслава, кн̃зя киевского, чимъ розгнЂванныи Изяславъ, кн̃зъ киевскиї, собравши воиско великое, маючи помоч от Вячеслава, стрия своего, и призвавши брата своего Ростислава, з великимъ воискомъ пошол на Давыдичов и на Олговича. Але оны, услышавши ω потузЂ Изяслава, кн̃зя киевского, пошли к ЧернЂгову и немногω половцовъ з ними, и иншиї половцы розышлися, а Изяславъ з Ростиславомъ за ними пошолъ под ЧернЂговъ і взялъ мЂсто Всеволож, и иншиї городы три, а другие з городковь повыбегали в Черниговъ. И попаливши и попустошивши ЧернЂговские волости, пошол до Киева, а Ростислава, брата, отпустил до Смоленска.

Потом ГлЂб Гургиевичъ /97/ заняв Городецъ Изяславов и пошол до Переясловля, але его от Переясловля Св̃тослав Изяславичъ прогнал и дружину его поималъ. Самъ Гургевичъ в ^С—Острь убЂглъ в Городецъ^—С. За що розгнЂвавшися Изяслав, пошол на Гургиевича і в Городцы его облеглъ. Гуревичъ^Т послал до Давидичов, просячи помочи, которои гды не одержал, вышал^У з мЂста до Изяслава, поклонился Изяславу и упросил от него себЂ покои. Изяслав, давши ему покои, вернулся до Киева, а Гургиевичь знову послал до Давыдичовъ, ωзнаїмуючи, ижъ з ними хочєтъ быти, а Изяславу присягъ.

Року 665б-г^Ф Изяслав ходил под Черниговъ знову и села черниговскиї пожог и попустошил. Давыдичи зъ Олговичомъ Св̃тославомъ и з сыновцами его не смЂли противъ /97зв./ Изяслава выити, а Изяславъ пошол къ Любчю, абы и тамъ скарбы Давыдовычов побралъ. Тамъ же с Чернигова пришли за Изяславом Давыдовичи и Св̃тославъ Олговичь з сыновцомъ и с половцами, з которыми Изяслав хотЂлъ бытися, але через ДнЂпръ к нимъ нЂлзя было, же роспускался, и такъ вернулся до Киева. А Давыдовичи з Св̃тославомъ Олговичомъ послали кь Гурьгию, просячи его о помочь на Изяслава, же ихъ волости попустошил Черниговскиї, а не одержавши от Гургия помочи, послали до Киева къ Изяславу, просячи ω покои, ωбЂцуючи, же^Х за едно з нимъ быти. Изяславъ, упоминаючи ихъ, призволил на тое, абы болеи сами своеЂ земли междусобною воиною не губили, /98/ а Давыдичи Изяславу на томъ присягнули. Того ж часу пришолъ до Изяслава братъ его стрЂечныї Ростиславъ Гуревичъ, погнЂвавшися зъ от̃цемъ своимъ, же ему волости в Суздали не дал, и скаржился о тое Изяславу, мовячи, же при тобЂ хочю жити. Изяслав его ласкавє принялъ, повЂдаючи, же ωтць твои з нами не умЂетъ жити, и дал Ростиславу Гургевичю Изяслав Бузкъ, Межибожь, Котелницу и еще два городы. /98зв./

Попередня     Головна     Наступна