Уклінно просимо заповнити Опитування про фемінативи  


Попередня     Головна     Наступна






Йоаникій Волкович




Розмышлян[н]є о муцЂ Христа, спасителя нашего.
При тым веселая радость з триумфалного єго воскресеніа



Вящшихъ сподобляєтся пріатію, иже искушенъ будетъ собывшая ся на немъ благодЂянія въсегда въ сердцу имЂти.

Касіан

Не благодарно упованіє, яко зимный иній растаєтъ и излієтъ ся яко вода неключима.

Премудрость, Глав. 16



Побожному и благовЂрному мужу пану Гаврієлю Марковичу Ланкгишу, славному купцу и мещанину лвовскому, добродЂєви своєму ласкавому.

При благословенст†найвышшого, всЂ добр душевных и телесных з упріймого сердца зычит жадаєт и молитствуєт.

НайпреднЂйшій а праве гетман и вож всЂх красомовцов рымских, сладкомовный Цицеро, ласкавый добродЂю, знаменитую цноту вдячности улюбивши, и в оной роскохавшися, овыи слова в одной с книг своих написал: «Хочу же бы-м и был и всЂ мене мЂли за вдячного». Того ж и я, з дитинных праве моих лЂт прагнучи, каждому добродЂєви моєму старал-єм ся яковым-колвек слушным и от мене можным способом за отриманыи добродЂйства нагородити, в чом и тепер, не уставаючи, поневаж на том святом мЂстцу, в том богоспасаємом градЂ Лво†странствуючи, спосрод иных добродЂєв моих, от вашмости, яко от горливого милостника всЂх духовных, найпервЂй и найзначнЂй ласки, упріймости и добродЂйств дознал-єм, и по всЂ часы гойне дознаваю, вашмости, добродЂєви моєму, найпервЂй знак вдячности оказати, и за оныи нагородити пристоит и приналежит. Иж теды тыи вЂршЂ, от мене грубо и неумЂєтне написаныи, за усилною прозбою многих зезволил-єм до друку подати, оныи на знак вдячности за добродЂйства принятыи под именем вашмости на свЂт подаю, и вашмости, добродЂєви своєму, при жаданю гойного благословенства Божого, долгофортунного здоровя, огляданя любои утЂхи з милого потомства, и по промешканю спокойном веспол з боголюбезною панею малжонкою, добродЂйкою моєю, и цным потомством, до волЂ Божеи, на той мЂзерной выспЂ выгнанья нашого, в небесной утЂшной радостной отчизнЂ вЂчнои короны отриманя, дедикую, офЂрую и приношу, а о милостивоє и ласкавоє принятьє просячи, звыклой ласце и упріймости вашмости, пилне ся вручаю.



МногогрЂшный инок

Іоанникій Волкович









Смутныи трены в смутный день страстей Христа, спасителя нашего



Душа побожная І. Георгієвич


Тяжкая туга сердце моє уязвляєт,

ВсЂ внутрности, всЂ смысла сродзе прободаєт.

Знагла бо вЂм новая отмЂна ся стала,

Котрая всЂм округом свЂта замЂшала.

Недавно всЂ радости гойнои заживали,

На высокости богу «Осанна!» волали,

А тепер все створеньє горко ляментуєт,

С преразливым ужасом, смутне болезнуєт.

Солнце сличную свою шату отмЂнило,

Темносмутным одЂньєм смутне ся прикрило.

МЂсяць, сребрнобЂлои шаты позбываєт,

В кровь ся з трепетом всего свЂта премЂняєт.

А снать с фирмаменту и звезды ся рушили,

ВсЂ елемента своєи власности позбыли.

Над прироженьє своє земля ся рухаєт,

ВсЂх земнородных знагла страхом наполняєт.

И моцноє каменьє ото ся скрутило,

З ужасно страшным кгрмотом вполы розвалило,

В церкви Катапетазма смутку теж узнала,

Зверху ся до исподу надвоє роздрала.

Що-с ся то на свЂтЂ, щось и дивного стало.

Що от створеня єго нЂкгды не бывало.




ВЂстник 1

ОповЂдаєт, що за диво ся стало.

Оле скорби: чудо и дивноє ся стало,

Котороє на свЂтЂ нЂгды не бывало.

Народ ізраильскій, сын он перворожденный,

Над все створеньє честю честно увелбенный,

Сын, млеком ласки Божеи гойне воспитаный,

В особливой милости отцевской хованый,

Тяжкій камень на сръдце своє наложивши,

Мерзкою невдячностю очи заслЂпивши,

Над власным своим отцем страшне ся збыткуєт,

Ісуса невинного, невинне мордуєт.

Ісуса невинного на крест прибияєт,

Створителя своєго сродзе умерщвляєт,

Що, видячи створеньє, горко болезнуєт,

И тому ужасному чуду ся дивуєт.




Душа побожная 2. Ланкгиш

О смутная новина, полная фрасунку,

О пелынногорчистый мерзкой скорби трунку,

О трепетный ужасе, котрій сердце псуєш,

О диво, котороє ввесь округ мордуєш.

Ісус Христос, сын Бога вышняго, страдаєт,

Безсмертный окрутною смертю умираєт.

ВсЂ ж ся зо всего свЂта охотне зберЂте,

Чудеси предивному съ страхом дивЂте.

Обачте, чого око нЂкгды не видало,

Слухайте, чого ухо, як жив, не слыхало:

«Бог чловек, сын Божій, сын Маріи, страдаєт,

Агня незлобивоє смертю умираєт».




Душа побожная 3. Буневскій

О жалю срокгій, творец мой страдаєт,

На дре†крестнЂм Ісус умираєт.

Але що ж того, творче, за причина?

Азали в тобЂ єст якая вина?

Ты єст-есь агнец, агнец незлобивый,

Чистый, безгрЂшный, святый, справедливый;

Ты, спасе, єст-есь самая чистота,

Бога и отца вЂчная красота;

В тобЂ, о пане, жадной нЂмаш змазы,

Жадного грЂху, жаднои проказы.

А для чого ж ти сут сродзе заданы

Так окрутныи, о творче мой, раны?

Чему, безвинный, безвинне страдаєш,

БезгрЂшный, сродзе умираєш?




Милость Божіа

Твои-то, о чловече, тяжары мордуют,

Ісуса невинного окрутне крижуют.

Твои тяжари грЂха сам з хутю пріймаєт,

Пресвятый, проклятством ся для тебе ставаєт.

Иди ж за ним охотне, иди а слезися,

С тяжко болным стогнаньєм в сердцу умилися.

Твердыи сердца твого покруши опоки,

И вынусть з очій крвавых слез теплыи токи.

Видячи, иж пресладкій Ісус вожделЂнный,

Милостію ку тобЂ єст так уязвленный.

Же ото строкгоболне для тебе страдаєт,

Окрутныи терпливе муки подыймаєт.




Душа побожная 3. Буневскій

Ах мой жалю, Ісус мой для мене страдаєт,

Для мене окрутныи муки подьшмаєт.




Душа побожная 1. Георгієвич

О милости Божіа, тож ся розтираєш,

Тож ку нам беззаконным горливе палаєш.




Душа побожная 2. Ланкгиш

ВсЂ жалЂ, всЂ болезни, к нам ся згромадьте,

Нас смутно болных отвсюл смутне обточЂте.

И дайте, бы-смо могли обфите рыдати,

Пана нашего муку, слезне уважати.

Але где ж пан єст, где наш любый пребываєт,

Где ся облюбенец наш милый поспЂшаєт?

ПовЂжте нам, где єго маємо шукати?

Прагнемо бовЂм при нем миле умирати.

ПовЂжте, нехай за ним идем спЂшно втропы,

Слезми кропячи єго пречистыи стопы.




ВЂстник 2

ОповЂдаєт, иж звязаного Ісуса до Аннаша порвали.


Связавше, и ведоша его къ АннЂ пер›: и єдинъ от предстоящихъ слугъ, удари въ ланіту Ісуса.

Іоан, зачало, 58


Юж Ісус пресладкій єст в огродку порваный,

Як агнець незлобивый моцно скрепованый.

Преч законная арка нехай уступуєт,

Бо истотная арка в руках ся знайдуєт

Филистинчиков срокгих: иж єи плЂнили,

Абы, о тяжкій жалю, сродзе умертвили.

Мысленнаго Сампсона юж ото крепуют,

Смерть єму поносную безвинне готуют.

ІєремЂа истный ото єст пойманый,

До Вавилону в тяжких оковах посланый.

Где ся темности сыны над ним збытковати

Будуть, незлобивого агньца мордовати.

Леч не тут конец: далей треба поступити,

Смутной ся тракгедіи смутне присмотрити!

Звязаного Ісуса безчестно порвали,

И з ним пред трепроклятым Аннашом предстали.

Ово ж от невЂрных юж єст арка плЂнена,

При мерзливом ДагонЂ ово поставлена.

Где ся один з небожных сродзе заюшаєт,

Громогласный поличок пану вытинаєт.

Так негдысь и Михеи поличок задано,

Кгди правды от єго немиле слухано.

Для тебе то, чловече, Бог-творец страдаєт,

Для тебе так окрутне безчещен бываєт.

Приступи ж к нему, сердцем теплЂ умилися,

За мнозство твоих грЂхов болестне слезися.




Душа побожная 1. Георгієвич

Я до тебе, творче мой, сродзе поличную,

Множеством грЂхов моих я тебе мордую.

Я годен, бы пащеки земля отворила,

Мене, обтяженного грЂхами, прикрила.

Лечь ты, творче, мою злость на себе пріймаєш,

Окрутною мукою оныи зглажаєш.

За що тя не престану навЂки велбити,

ТобЂ пристойную честь миле приносити.




Душа побожная 3. Буневскій

О душе моя, душе моя, умилися,

С тяжко горким стогнанєм тяжко в перси бійся.

Рыдай горко, ляментуй, выпущай слез токи,

СкаменЂлого сердца покруши опоки.

Бій ся в перси, а обач, що-с то ты зробила,

На смерть прикро-горкую вЂчне-сь заслужила.

С котрои хотячи тебе пан освободити,

Ото ся праве рабско зезволил знижити,

Ото єго власныи сынове крепуют,

Ісуса невинного моцно поличкуют.




Душа побожная 2. Ланкгиш

О душе моя, душе моя, отрезвися,

Душе моя грЂшная, горко умилися.

Ото твой творец сродзе, о жалю, страдаєт,

Ото чистая панна жалостне рыдаєт:

Иж єи агньца волки срокгіи порвали,

Єднородного сына моцно скреповали.

Иж над єи любезным дико ся збыткуют,

Без вшелякои лютости сродзе поличкуют.

Плачет чистая горко, слезы выливаєт,

От срокгои скорби, ледво жива оставаєт.

О пречистая панно, рач и мнЂ то дати,

Бы-м гойнокрваве и я, грЂшный, могл рыдати.

Бы-м обфитыи слезы з очій моих точил,

Пелынною водою полички обмочил.

Бы-м могл при пану моєм завше пребывати,

С превожделЂнным моим Ісусом страдати.

Леч где єсть? Пред Аннашом юж єго не найдую.

Зачим тяжкій боль в сердци своєм быти чую.





ВЂстник 3

ОповЂдаєт, иж пред Каіафою Ісус предстоит: где Петр смЂлый Учителя ся своєго запираєт.

Они же, ємше Ісуса, ведоша къ КаіафЂ Архієреови: Петръ же внЂ сЂдяше въ дворЂ: и приступи къ нему єдина рабыни, глаголющи: «И ты быль єси съ Ісусомъ Галилейским»: Он же отвержеся пред всЂми, глаголя: «Не вЂмъ, что глаголеши».

Матфей, зачало 109


В дому Каіафы юж ся Ісус знайдуєт,

Где єго тренещасный род сродзе мордуєт.

БлюзнЂрцею Каіаф смЂле называєт,

ОдЂньє безрозумный на собЂ шарпаєт,

Без лютости Ісуса юж там поличкуют,

На любоє аггелом лице єго плюют.

Юж там и смЂлый Петр ся даремно лякаєт,

Учителя своєго юж ся запираєт.

Нендзная одверница єго побЂдила,

НЂкчемная рабыни латво звитяжила.

През невЂсту, Адаме, продку наш, упал-єсь,

И ты, Сампсоне, силы своєи пострадал-єсь.

И Давыда, котрій моц над лвы роспростирал,

И живот Голіадом окрутным выдирал,

Вирсавеа невЂста ораз обалила,

И Соломону невЂст моць тож учинила.

Ово ж и Петр камень он латво упадаєт,

На одно слово рабы латво ся скрушаєт.

«Чловека того, — мовит, — овшеки не знаю,

И овшем, що зазав єст, тебе ся пытаю».

Зачим пЂтел по трикроть голос выпущаєт,

До сердечнои скрухи Петра побужаєт.

БЂжи ж, о Петре, бЂжи, горко умилися,

З тяжко смутным вздыханєм усердно слезися.

БЂжи, и ляментуй, же при пану не стал-єсь,

Же єго явне пред всЂм родом не вызнал-єсь.




Душа побожная 1

Рабыни верховного Петра звитяжаєт,

А мене мнозство грЂхов лютЂ побЂждаєт.

Леч апостол Петр жалем сердце съкрушивши,

Вевнутр лютои жалости сердечне набывши;

За тяжкій свой выступок лзы горкіи точит,

Горкопелынным плачем лице своє мочит.

З сердца свого стогнаньє тяжко выпущаєт,

За явногрЂшника быть себе признаваєт.

Просит о милосердьє, бы ся злитовати

Пан рачил, в том упадку силном ратовати.

А я зась що: през грЂхи пана ся запрЂл-єм,

Єго отступити, о окаянный смЂл-єм.

А єднак не хочу ся в сердце своє ткнути,

До правдивои покуты охотне дерзнути.

За грЂхи ни слезную каплю выпущаю,

Ни щирей в сердцу моєм скрухи набываю.

Ах, мой смутку, Боже мой, рач ся злитовати,

В мнозстве грЂхов моих рач мене ратовати.




Душа побожная 3

Кгды мнозство моих грЂхов тяжких прекладаю,

Окаянным себе быть, окаянный, знаю,

Але, о душе моя, Петру подобися,

За грЂхи, душе моя, усердно слезися.

Христе-цару, ты рач сам къ мнЂ приступити,

Рач сам сердца моєго дверЂ отворити.

ЗакаменЂлость мою рач сам зепсовати,

Моцност каменій моих тяжких зкгрухотати,

ЗатвердЂлоє сердце моє рач змякчити,

Посухом милосердья рач в него вдарити.

Абы обфитоє слез море испустило,

Котороє бы грЂхи мои очистило.

Котороє бы могло мене убЂлити.

З чорного крука бЂлым голубом вчинити.




Душа побожная 2. Ланкгиш

Я, который моими грЂхи скреповал-єм

Пана, на муки, ах мнЂ, срокгіи выдал-єм.

Не смЂю, окаянный, на небо взирати,

Не смЂю плюгавых рук моих простирати.

Прето ж к тобЂ, чистая панно, прибЂгаю,

К тобЂ умиленный, з уст голос выпущаю.

Ты, котрая тяжкого смутку заживаєш,

Кгды на срокгость мук сына своєго взираєш,

Рач мнЂ, окаянному, сердечную дати

Скруху, рач милосердьє у него зъєднати.

Бым и я с Петром точил слезныи потоки,

ЗатвердЂлого сердца покрушил опоки.




Милость Божіа

Плач, чловече, ляментуй, выпущай стогнаня,

От внутр твоих тяжкіи з болестю вздыханя.

Плач за грЂхи, котріи Ісуса мордуют,

Незлобивого агньца убить усилуют.

Плач, а при нем соизволь любовне страдати,

Срокгіи єго муки з болем уважати.




Душа побожная 2. Ланкгиш

Прагнемо лзы горкіи обфите точити,

Болестныи вздыханья з внутра испустити.

Тылко ты сам, о творче, рач нам скруху дати,

Рач сам ласкаве сердцем нашим керовати.




Душа побожная 1. Георгієвич

Прагнемо, абы в духу, при пану страдати,

Але где ж єго маєм, смутныи, шукати?

В дому Каіафы юж єго не знайдуєм.

Где ж за ним сердечныи стропы закеруєм?




ВЂстник 4

ОповЂдаєт, иж Ісуса юж до Пілата отдано.


Ведоша єго къ Пілату, и разумЂвъ, яко от области Иродовы, посла єго къ Ироду: укоривъ же єго Ирод возврати къ Пілату.

Лука, зачало 111

Тогда убо Пілатъ поять Ісуса и би єго.

Іоан, зачало 59


У каменного столпа юж пана шукаймо,

И там веспол з ним смутне, смутныи, страдаймо.

Безбожноє ся бовЂм сонмище згодило,

Абы пана своєго невинне убило.

Прето ж єго Пілату Понтскому предают,

ВсЂ єднодушне, абы был распят жадают.

Который до Ирода напрод посылаєт,

А потом, кгды сонм «Распни!», «Укрижуй!» волаєт,

Росказал тиранско до столпа привязати,

Ісуса невинного сродзе бичовати.

Росказуєт Голоферн, некгдысь розгнЂваный,

Абы Ахіор был у древа привязаный.

Тоє ж и Пілат чинит, невинне мордуєт,

Невинного Ісуса у столпа крепуєт.

З пречистого тЂла крве токи выливаєт,

Которых гойность гойне землю напаваєт.

Непріателю наших душ скоро моць дано,

Терпливости Иовой абы спробовано.

От главы до стопы ног сродзе заражаєт,

Страшныи раны по всем тЂлЂ разшираєт.

Сродзе ся и проклятый народ заюшивши,

Над власным добротливым отцем розбествивши.

Тисячми ран на тЂлЂ пречистом задаєт,

Жаднои литости над ним незбожный не маєт.

Плач же, о вЂрный роде, и горко слезися,

Великому тиранству злых сынов дивися.




Душа побожная 2. Ланкгиш

О пречистая панно, як можеш вытрвати,

На окрутност мук сина як можеш взирати?

Видиш любоє своє чадо обнаженно,

На всем пречистом тЂлЂ болестно зраненно,

И сама болестныи вевнутр терпиш муки,

Кгды чистого катуют нечистыи руки.

Наполы жива слезы горко выливаєш,

Тресмутныи стогнанья з сердца выпущаєш.

О смутная матко, рач же и мнЂ дати,

Жебы-м и я могл гойне з стогнаньєм рыдати.

Видячи, иж для мене сын твой умираєт,

Єдинородный твой крве токи выливаєт.

О душе моя, душе моя, умилися,

Смутне ляментуючи, смутне прослезися.




Душа побожная 3. Буневскій

Ах, мой смутку претяжкій, тху и сил не стаєт.

Сердце ся въ мнЂ вполы, ах, мнЂ раздираєт.

Стойте, горніи кгмахи, смутне ся дивЂте,

Крвавую з себе росу гойне испустЂте.

Видячи, иж пред котрим не могли-сте быти,

Чисты, ни в своих кгмахах пространных вмЂстити

Каменный столп, о смутку, ото вмЂщаєт,

ПредвЂчную красоту темность помрачаєт.

Невинного невинне окрутне бичуют,

Пренайчистшеє єго тЂло канцеруют.




Душа побожная 1. Георгієвич

Чинове аггельстіи, с небеси зступЂте,

Окрутной муцЂ панской смутне ся дивЂте.

И обачте, що ся то предивного стаєт,

Як страшноє ся чудо на земли являєт.

Той котрого-сте пред тым в облачном видали

СтолпЂ, свЂтлоогненным на пущи познали.

При марморовом столпЂ ото ся являєт,

И окрутне, о ужас, катован бываєт.

О хоры аггелскіи, с небеси зступЂте,

Безчестіа панского сурове ся мстЂте.

Острого, ревнуючи, меча добывайте,

А той трепроклятый род з кгрунту вынищайте.




МилостьБожіа

Горливая Божіа милость то справила,

Же єго на той падол мЂзерный звабила.

Же єго чловеченства шатою прикрила,

Рабій зрак а послЂдній на него взложила.

Милость ото и тепер окрутне мордуєт,

їсуса невинного невинне бичуєт.

Милость не допущаєт над злыми ся мстити,

Овшем прагнет каждому спасенному быти.

Прагнет, горними абы всЂ мешканци были,

В вышних любоутЂшных кгмахах вЂчне жили.

У столпа каменного привязан бываєт,

Бо на собЂ каменю церков закладаєт.

На котором фундовне з кгрунту заложенна,

И пречистою кровью єго печатлЂнна.

Будет до конца вЂку недвижно стояти,

И жадных ся вражіих штурмов не бояти.

Милость то в нем любая, милость все справуєт.

За твоє преступленьє, чловече, крижуєт.




Душа побожная 2

Милостю к тобЂ и мы, о творче, палаєм.

Тую завше мЂть в сердцу усилне жадаєм.

Тую вевнутр нас рач сам, пане, разжарити,

Наше сердце ку тобЂ моцно прилЂпити.

Бысмо на твои муки з жалостю смотрили,

При тобЂ, творцу нашем, сердечне терпЂли.

Леч где ж тебЂ, о пане, маємо шукати,

Юж бовЂм и у столпа тебе не видати.





ВЂстник 5

ОповЂдаєт, иж с пана ся насмЂвают.


Воини же сплетше ВЂнецъ от терніа, возложиша єму на главу, и въ ризу багряну облекоша єго, и глаголаху: «Радуйся, Цару Іоудейскій», и біаху по ланитома.

Іоан, зачало 59


По смутку смуток, срокгом срожшій, в тропы ходит,

Що и час тяжшая ся болезнь в сердцу родит.

Досить мордерско пана нелютостне бито,

От главы аж до ног все тЂло страшне зрито.

А єднак ово єще сродзе ся ругают,

В порфирноє одЂньє пана одЂвают.

МЂсто сцептрум — трость в руки пречистыи дано,

З насмЂвиском, жидовским кролем называно.

З остробольного терня корону увили,

На пречистую главу окрутне взложили.

Ово ж, Ісус мой, вЂнцем терновым вЂнчаный,

Стоит агнец, который маєт быть закланый,

Котрій маєт быть для нас окрутне убитый,

На крестном дре†сродзе невинне пробитый.

К нему ж, о сіонскіє дщеры, приступЂте,

Горкіи з зрЂниць своих слезы испустЂте.

Видячи, иж прекрасный жених возлюбленный,

Стоит наполы живый сродзе уязвленный.

Видячи, иж пан наш, єст сродзе скатованы,

Безчисленныи терпит окрутныи раны.

Видячи, иж невиный безчестно страдаєт,

Пресладкій наш, поносне для нас умираєт.




Душа побожная 1. Георгієвич

Ах жалю срокгій, юж ми всЂ смысла слабЂют,

ВсЂ силы, всЂ внутрности остатнє трухлЂют.

О душе моя, душе моя уязвленна,

Острим копієм болю сродзе прободенна,

Як ся въ мнЂ, ах, грЂшном, можеш затримати?

Як можеш в такой тузЂ тЂло посиляти —

Претяжкост горкои скорби дом бЂдно струхлЂлый?

Опусти твой марный кгмах, окрутне зболЂлый.

Нехай я окаянный, нехай умираю,

ДалЂй на муки пана мого не взираю.

О болю страшно вспомнЂт, цару царем дано,

В руки трость острым вЂнцем окрутне вЂнчано.

Мои то грЂхи тебе, Ісусе, вЂнчают,

Мои тым острым терньєм остро уязвляют.

Боже мой, рач тернієм скрухи уранити

Моє сердце, мою мысль миле уязвити.

Бы-м я, горко за грЂхи мои рыдаючи,

Твой окрутный боль в сердцу выритый маючи,

До небеснои отчизны спЂшне пелькгримовал,

За тобою, гетманом, миле в путь шествовал.




Душа побожная 3. Буневскій

О душе моя, душе, чему не рыдаєш,

Горкобыстрих слез з очій чем не вынущаєш,

Видячи, иж ся творцу твоєму ругают,

С пана ся з безчестієм спросне насмЂвают?

О Боже мой, чему их сродзе не караєш?

Чему страшных перунов на них не выпущаєш?

Роскажи, бы пащеки земля отворила,

В своих отхланях адских навЂки закрила!

Роскажи огню з неба зненацка зступити,

З ужасом всего свЂта з кгрунту вынищити!

Роскажи, бы дикіи звЂрята повстали,

Незбожный проклятый род внЂвеч пошарпали!

Вжды, кгды з слуги твоєго смЂх дЂти строили,

През диких звЂрят знагла живота позбыли.

А тепер чем не кажеш тым ся ж заюшити,

Твоих треокаянных дЂтей поглотити?

Але милост руки от карности крепуєт,

Милость тебе от помсты, о пане, гамуєт.

Милость на окрутныи болести выдала,

Милость болестным вЂнцем терновым вЂнчала.

Который и я, смутный, на главу пріймаю,

С тобою, о творче мой, страдати жадаю.




Душа побожная 1. Георгієвич

Где-сь єст чистая панно, где тяжко страдаєш?

Откуль на любезного своєго взираєш?

То ли єсть, о дЂвице, сын твой возлюбленный,

Над всЂ израильскіи сыны увелбенный?

То ли над чловечіи всЂ сыны краснЂйшій?

То ли любый Соломон над всЂ оздобнЂйшій?

То заисте: леч лице єго помрачила,

Окрутност трепроклятых окрутне затмила.

Ово стоит, кровію очи затЂкают,

Уши мерзливост многих бласфемій слухают.

Лице єго, о смутку, безчестно оплвано.

Все пречистоє тЂло сродзе скатовано.

На гла†прикрій вЂнец, с терня уплетеный,

Глубоко, до самого мозгу притисненый,

Котрій и твоє сердце, панно, проникаєт,

Твою мысль, твою душу остро уязвляєт.

Рада бы-сь вмЂсто єго той вЂнец носила,

Сама ся з тяжким болем тым вЂнцем крвавила.

Але где-сь єст, о панно, где тяжко страдаєш?

Откуль на любезного своєго взираєш?

Нехай и я при тобЂ, панно, пребываю,

Нехай при тобЂ, дЂво чистая, страдаю,

Леч где єст наш Ісус, где маємо шукати,

Кгды ж юж и пред Пілатом єго не видати.





ВЂстник 6

ОповЂдаєт, иж пан крест на гору Голгоф двигаєт.


Тогда предаде єго имъ Пілатъ да распнет ся. Поємше же Ісуса, ведоша, и нося Крестъ свой, изыйде на мЂсто глаголемоє Лобноє.

Іоан, зачало 60


Декрет несправедливый, юж-юж єст выданый,

Абы Ісус невинный был укрижованый.

Юж на рамо єго ключ Давидов взложено,

Которим маєт быти небо отворено.

Юж Феникс єдиный сам древца згромажаєт,

На которих спаленый для нас быти маєт.

Юж ся Исаакова фЂгура сполнила,

Незбожност на рамо стос юж творцу взложила.

На котором за ввесь свЂт маєт быть пожреный,

Огнем любве к народу людскому спаленый.

Двигнет Ісус крестный стос, и хто ж помагаєт?

Хто в так значном тяжару Ісуса вспираєт?

Сам тылко Киринейчик, старушок зветшалый,

В слабом допоможеню двигати был трвалый.

Аггелскіи хоры вы вжды с небес зступЂте,

Двигат тяжар своєму пану поможЂте.




Душа побожная 1. Георгієвич

О смутку, о болезни, ах, що мовит маю,

Юж в словах, юж и в силах моих уставаю.

Тяжкая болезнь сердце моє тяжко щиплет,

Слеза ся за слезою с крвавых зрЂниц сыплет,

Видячи, иж кгды Ісус крест силный двигаєт,

От тяжкости на землю частокрот падаєт.

А то все мои грЂхи тяжкіи справуют,

Мои злости невинне Ісуса мордуют.

И що ж за то ти маю, о творче, воздати,

Якими тя, о смутку, почестми вЂнчати?

Не знаю, о нещасный, овшеки не знаю,

При тобЂ, Ісусе мой, страдати жадаю,

При тобЂ прагну муки срокгіи терпЂти,

Прагну при тобЂ, пане мой, ораз умрЂти.




Душа побожная 3. Буневскій

О стрЂла скорби, сердце котрая збодаєш,

О мечу острый, котрій внутра преражаєш!

Ісус на рамЂх своих крестный стос двигаєт,

Под тяжаром грЂх моих на землю падаєт.

О тяжкость, которая силы вынищаєш,

Сампсона, мысленнаго к земли приникаєш.

Двигнет Ісус махину, котрую зробили,

Мои тяжкіи грЂхи на рамо взложили.

Двигнет тяжар, абы могл мене облегчити,

З моєи шыи тяжар пекелный зложити.

Двигнет тяжар, котрого нЂхт не могл двигнути,

И єдным перстом не могл жаден ся доткнути.

Двигнет з тяжкостю през мою окрутност зболЂлый,

ПренезмЂрност тиранства незмЂрне земдлЂлый.

Двигнет, а кровь з єго ран струменем ся точит,

ВсЂ дороги обфите, о жалю мой, мочит.

А того причина — я, о горкій фрасунку,

О растворенный скорби прикрим плачем трунку!

Ісус мой, отец мой, пан мой, на смерть шествуєт,

ВсЂ стежки пречистою кровью знаменуєт.

Ісус мой єст моими грЂхи потлаченый,

Тяжарем беззаконій моих обтяженый.

Иди ж, о душе моя, за Христом спЂшися,

З тяжко-горким стогнаньєм обфите слезися!

Иди с поспЂхом и вжды слезми стежки мочи,

ПренезмЂрност болю, лзы обфитыи точи!

Иди, а стопы єго миле лобызати,

Не престань пречистои крве кроплЂ збирати!




Душа побожная 2. Лянкгиш

О пречистаа панно, духу в мнЂ не стаєт,

Гартовный кгрот болести сердце преражаєт,

Видячи, иж любого юж-юж утрачаєш,

О голубице-дЂво, юж сына нЂ маєш.

Юж твой любезный на смерть єст срокгую зданый,

Бы на безчестном крестЂ был укрижованый.

Юж ото крест поносный на собЂ двигаєт,

Частокрот з тяжким болем на землю падаєт.

На що смотрячи, о як срокгои заживаєш

Скорби, панно, як болно, увы мнЂ, волаєш,

Як ся утроба твоя чистая терзаєт,

Як сердце болестноє тяжко ся смущаєт.

В путь некгды-сь, кгды Товію матка выправуєт,

З горкою печалію горко болезнуєт,

Сердцем ся трвожит, часто єго вспоминаєт,

Пред враты сЂдит, сына видЂти жадаєт.

А ты, о пречистаа, тяжко взираючи,

Скрвавленного сына пред очима маючи.

Не ровно срожшеи скорби срокго заживаєш,

Бо юж-юж пресладкого свого утрачаєш,

О сердце моє горким трунком упоєнно,

Пелынномерзким ядом скорби обтяженно.

Чем тяжкого стогнанья звнутр не отригаєш,

Пресрокгость болю въ мнЂ не обумираєш.

О чистая панно, рач мене ратовати,

С каменя сердца мого рач слез добывати.

Рач дать, бы-м грЂхи мои могл слезми омыти,

Муку сына твоєго в памяти носити.

Але о болю, сердце въ мнЂ смутне мдлЂєт,

Не вЂдаючи, що ся с паном далей дЂєт.





ВЂстник 7

ОповЂдаєт, иж на крест єст Ісус поднесеный.


Идеже пропяша єго, Ісусом.

Іоан, зачало 60


ВсЂ ся горніи чины чудне ужасайте,

Небо, земля, море, съ страхом ся лякайте.

Обачте, ово чудо новоє ся стало,

Дивноє ся на свЂтЂ диво оказало.

Створеньє створителя своєго убило,

Ісуса невинного на крест пригвоздило.

БезгрЂшного грЂшныи ото утискують,

Ісуса невинного окрутне мордують.

ДЂти власного Отца ото забияють,

Ісуса невинного сродзе умерщвляють.

Слуги пана своєго юж на смерть предали,

Ісуса невинного окрутне распяли.

Безсмертный яду смерти ото юж вкушаєт.

На дре†крестном Ісус невинный вмираєт.

Юж єст посродку пущи свЂта поднесенный,

На превысокой горЂ сродзе завЂшенный.

Юж ся чистоє агня ото закалаєть,

Для спасенья нашего ото умираєть.

Плачте ж всЂ обфитыи, слезы испустЂте,

З тяжким воплем тяжкого ляменту зажите!




Душа побожная 3. Георгієвич

Рыдай о душе, душе умилися,

С тяжким стогнаньєм болестно слезися.

Выпущай з очій слез быстроє море,

Волай умилно: «Горе мнЂ, о горе —

Отец любый юж ото умираєт,

Для грЂхов моих проклятством ся стаєт,

На крест Ісус мой юж єст поднесеный,

Острым гвоздієм сродзе пригвожденый.

О жалю, чему сил моих не псуєш,

Чему и мене ораз не крижуєш,

Чем дху и мене ораз не збавляєш,

Мертвого в гробЂ чем не покладаєш?»




Душа побожная 2. Ланкгиш

Чистая панна з болестю взираєть,

На сына свого смутне поглядаєть.

Наполы жива у креста предстоит

Окрутный ся боль в сердцу єи роит.

Претяжкость смутку нЂ уст отворити,

Ни одно может слово испустити,

Бо стрЂла болю сердце преразила,

Скорб претяжкая отвсюль обточила.

Стоит от смутку праве скаменЂла,

Чистаа панна окрутне дрентвЂла.

Заледво очи ку небу двигаєт,

В тяжкой болезни ратунку жадаєт.

Але юж прожно надЂя устала,

Любого сына юж-єсь пострадала:

Острим гвоздієм єст сродзе прибитый,

Невинный агнец окрутне убитый.

Мои то грЂхи тоє уробили

Гвоздіє пана на крестЂ прибили.

И чем же горко, чем я не рыдаю,

Чем с тяжким воплем слез не выливаю?

Чистая панно, ты мя ратовати,

Ты скруху сердцу моєму рач дати.

Бы-м тяжко стогнал, плакал ляментливе,

Смутныи пЂсни спЂвал жалосливе.





ВЂстник 8

ОповЂдаєт, иж Ісус прагнет.


Глагола, Жажду.

Іоанн, зачало 61


Висит Ісус на дре†сродзе пригвожденный,

От власных своих сынов лютЂ уязвленный.

Висит, а горливоє прагненьє зснЂдаєт

Єго внутрности, як меч острій прободаєт.

Жажду, жажду, Ісус мой, Ісус незлобивый,

Творец наш, предвЂчный он судья справедливый.

Смутне волаєт, а хто б хижо утолити.

НЂ маш, хто б хотЂл єго жажду усмирити.

Некгдысь Сампсона жажда тяжко утискуєт,

Вполы праве живого знагла оставуєт.

Але врыхлЂ вода ся єму оказала,

В тяжком небезпеченст†живот даровала.

З Вифлеємскои криницЂ и Давид жадаєт

Воды вкусити, о то горливе волаєт.

Леч ся през врагов войска мужнє пребивають,

Три мужныи рыцерЂ, и воды достають.

А Ісус прагнет, оцет леч з жолчю подано,

И тым Ісуса-творца прикро напавано.




Душа побожная 3

Що чиниш, о проклятый, о невЂрный роде,

Котрій-сь сприкрил, жиючи в небесной свободе?

Що чиниш, чим прагненьє панскоє всмираєш?

Оцтом з горкою желчю пана напаваєш.

Не того-то Ісус мой напою жадаєт,

Не о той трунок смутне до тебе волаєт.

Прагнет, абысь ся в сердце могл з скрухою ткнути,

До пастыра своєго знову ся вернути.

Леч не хочеш прагненья того усмирати,

Волиш въвЂки вЂком вЂчне погибати.

Зачим преблагій Ісус окрутнЂй страдаєт,

Кгды на вольную твою згибель поглядаєт?

Срожей то єго мучит, же ся покорити

Не хочеш, до него ся въспят возвратити?

НЂж найокрутнЂйшіи з безчестієм муки,

От тебе заданыи срокгіи докуки.




Душа побожная 1. Буневскій

Я, о творче, цару мой, к тобЂ прибЂгаю,

Я пред твои святыи ноги упадаю.

Я твою жажду з хутью прагну утолити,

За грЂхи мои слезы горкіи точити.

Я до себе тяжкіи мои грЂхи знаю,

З тяжким воплем до тебе, пане мой, волаю.

Рач ся над мною, грЂшным, рач ся злитовати,

Мене, окаянного, до ласки приняти.

Кгды прійдеш в царствіє, рач мене вспомянути,

Рач при разбойнику и до мене рекнути:

«Днесь ти со мною в раи подобаєт быти,

Юж ты навЂки в ласцЂ моєй маєш жити».





ВЂстник 9


ОповЂдаєт, иж Ісус, тестамент учинивши, уснул.

Отче святый отпусти имъ, невЂдять-бо, что творятъ.

Матфей, зачало 111


Глагола матери своей: «Жено, се сынъ твой». Потом же глагола ученику: «Се Мати твоя». И преклонь главу предале духъ.

Іоанн, 61


Юж сладкий Ісус срокго страшне збитый,

Яко злочинца на крестЂ прибитый,

Претяжкост болю к смерти ся зближаєт,

До Бога-отца болестне волаєт:

«Отче мой, чему мене опущаєш?

Боже мой, чему мене оставляєш?

Отче мой, рач ся бозко злитовати,

Над злыми сыны карности нехати.

Рач им грЂхи их цале отпустити,

Покровом ласки твоєи прикрити,

Бо вЂм, що чинят, овшеки не знают,

ЗаслЂпленныи очи свои мают.

А ты, о матко, котрая рыдаєш,

Крвавыи слезы з очій выливаєш,

Попрестань плакат, попрестань стогнати,

За сына будеш Іоанна знати.

И тобЂ ото, о друже, вручаю,

Любую матку в опеку предаю.

УмЂй зерцало чистоты ховати,

Єй пристойную почесть выражати.

Але юж ся все скутком выполнило,

Все пророцтво юж, юж ся совершило,

Пристоит юж мнЂ духа испустити,

В руцЂ твои, о отче мой, вручити.

Выпустил Ісус духа, що познало

Все створеньє, кгды отмЂнноє стало,

З своєи моцы кгды ся все рушило,

Власности своєи зненацка позбыло.

А проклятый род єще не вставаєт,

Єще ся пану окрутне ругаєт,

Єще смЂєт бок копієм пробити,

Быстроє жрудло крве з ребр испустити.




Душа побожная 1

О смутку, уснул Ісус, агнец незлобивый,

Забитый єст окрутне судья справедливый.

Уснул отецъ наш любый, от сынов убитый,

На крестном древЂ, увы, окрутне прибитый.

Уснул живот всЂх, на крест за всЂх повЂшенный,

Окрутною мукою сродзе умерщвленный.

Уснул пастыр того, кгды овцы ся збествили,

Без лютости драпЂжне живота збавили.

Уснул безсмертный, и хто ж не будет рыдати,

Быстрых слез з очій своих гойне выливати.

Старыи и младыи, плачте, горко плачте,

Умершого Ісуса слезами урачте.




Душа побожная 2. Ланкгиш

Уснул Ісус, а панна чистая здрентвЂла,

Смутная матка тяжко в сердцы скаменЂла,

От болю и слова з уст юж не выпущаєт,

На мертвого смотрячи, сама умираєт.

Мои то грЂхи сына твого умертвили,

Тебе, чистаа панно, жалем наполнили.

Даруй мнЂ скруху, дЂво, абы-м могл рыдати,

Абы-м могл слезми мои скверны очищати.




Душа побожная 3

Увы мнЂ, душе, радость моя юж вмираєть,

Ісус мой пресладкій юж духа выпущаєть.

Висит Ісус на древЂ, висит обнаженный,

Окрутностю, о жалю, мук юж умерщвленный.




Душа побожная 2

Висит, але где ж висит; юж преч с креста снято,

От очій наших юж гдесь спасителя взято.




Душа побожная 1

О смутку тяжкій, отца юж-юж не видаєм,

И мертвого Ісуса юж-юж утрачаєм.

ПовЂжте, о друзи, где єст наш возлюбленный,

Где єст Ісус мертвый, где от нас пренесенный?




[Душа побожная] 2

ПовЂжте, о сестры, где єст наша утЂха,

Ку радости душевной скорая поспЂха?




[Душа побожная] 1

О сіонскіи цорки, повЂжте, где взято,

В котріи кгмахи пана нашего принято?




[Душа побожная] 3

ПовЂжте, любимыи, где наш пребываєт,

Где превозлюбленный наш уснув, почиваєт?




[Душа побожная] 2

ПовЂжте, нехай єго с поспЂхом шукаєм,

Нехай и мы, смутныи, при нем почиваєм.





ВЂстник 10

ОповЂдаєт, иж с креста снятый Ісус єст и в гробЂ положеный.


И снемъ и Іосифъ обви Плащеницею, и положи въ гробЂ изсЂченнЂ.

Лука, III


Дерзостне до Пілата смутный приступивши,

Іосиф, Ісусово тЂло испросивши,

В плащеницу чистую с плачем обвиваєт,

В темноузким каменным гробЂ покладаєт.

Ку гробу ж всЂ охотне сердцем приступЂмо,

Над умерлым Ісусом слезы испустЂмо.

Видячи, иж творец єст для нас пониженный,

В гробЂ каменном, як мертвец положенный.




Душа побожная 2. Ланкгиш


Где и плач пречистои панны.


Стойте, небеса, крвавыи точЂте

З облаков слезы, всю землю мочЂте,

Перунную моць на низкост спускайте,

Страшно блискайте.


И ты, о земле, чудне ужаснися,

Над прироженьє твоє подвигнися,

Нехай ся кгмахи з землею ровнают,

Моцно падают.


И ты, о море, отвори зрЂницЂ,


З замЂронои выскакуй границЂ,

Нехай воды ся гойне розливают,

Злых затопляют.


Превынеслыи горы ся трясЂте,

Страхом ввесь округ свЂта наполнЂте,

И вы твердыи скалы ся лякайте,

Вполы падайте.


Ово згола все створеньє двигнися,

З тяжкои отмЂны тяжко ужаснися,

БовЂм котроє нЂкгды небывало,

Диво ся стало.


Ісус наш, сродзе от створенья збитый,

На дре†крестном окрутне прибитый.

Мертвый ото ся в гробЂ покладаєт,

Там почиваєт.


Образ вЂчного отца украшенный,

Ото юж єст, о смутку, помраченный.

Юж єго темност тиранства затмила,

В гробЂ закрила.


Ото Соломон, котрого вЂнчала

Матка, в женитвы день короновала.

Открутне збитый, юж-юж умираєт,

Мертв ся явяєт.


Нащо чистаа панна, взираючи,

Тяжкоприкрую скорб в сердци маючи,

Горкокрвавыи слезы выливаєт,

Смутне волаєт:


«Увы, тяжкая скорб мя обточила,

Отхлань окрутных смутков поглотила,

Обыйшло мене глубокоє море,

Горкоє горе.


Бо любый мой сын сродзе скатованый,

От власных своих дЂтей поруганый,

Юж єст тиранско, ах, мнЂ, умерщвленный,

В гроб положенный.


Юж моя радость, юж преч уступуєт,

Лютая туга лютЂ обыймуєт.

Моя юж преч, юж утЂха отходит

В землю заходит.


О свЂте очій моих, тож зникаєш,

Мене, смутную, горко уязвляєш,

О солнце, мрачно тожесь ся затмило,

Мене земдлило.


И где ж твоя, о сыну мой, лЂпота,

Прелюбезная где твоя красота?

Юже-сь моя сличност опустила,

Мене знищила.


Юж на мя, любый сыну, не взираєш,

АнЂ слова з уст къ мнЂ выпущаєш.

О тяжкій болю, о прикрій фрасунку,

Пелынный трунку!


Утробою ся нестытеж терзаю,

Живая сполы, ах мнЂ, умираю,

Бо живот, сын мой, мене оставляєт,

Мертв ся явяєт.


А що ж, смутная, що буду чинити?

Откуль утЂхи маю юж зажити,

Кгды в гробЂ моя утЂха ся скрила,

Там ся затмила?


Нехай и я, о сыну, умираю,

С тобою в том ся гробЂ покладаю,

Бо розлученья не могу терпЂти,

Волю умрЂти.


Леч юж от гробу твоєго не встану,

Горкокрвавых слез точит не престану.

Тут, смутная, тут буду почивати,

Болно стогнати.


Аз, воскресшого, тебе оглядаю,

Веселую пЂснь миле заспЂваю.

Востаньєм твоим аз буду учтенна,

И утЂшенна».


Мои то грЂхи, дЂво, обнажили

Сына твоєго, в том гробЂ зложили.

МнЂ горкосмутне пристоит рыдати,

Тяжко вздыхати.


Леч хто ми может источник слез дати,

Твердость моєго сердца зкгрухотати,

Абы за грЂхи болестне стогнало,

Ляментовало?


К тобЂ, чистая панно, прибЂгаю,

От тебе, грЂшный, ратунку жадаю.

Рач сама душу мою посЂтити,

Сердце змякчити.


Абы до скрухи любо приступило,

Страсти Христовы вевнутр обносило.

Огнем милости к пану бы палало,

За злость рыдало.




Душа побожная 1. Георгієвич

А, а, малый отрок єсм, не могу мовити,

Не могу, увы мнЂ, уст моих отворити.

Сердце моє смутноє тяжко скаменЂло,

Сердце моє бЂдноє мЂзерне струхлЂло.

Язык въ мнЂ окрутне, нестетыж, дрент›т,

Взрок зрениць очій моих овшеки слабЂєт.

Кгды вижу, а Ісус мой сродзе умираєт,

Ісус мой сладкій в гробЂ темном почиваєт.




Душа побожная 3

Для меня то, грЂшного, Ісус умираєт,

Моих грЂхов мнозство в гроб єго покладаєт.

Мои то грЂхи пана окрутне убили,

И той каменный мои злости гроб зробили.




[Душа побожная] 2

Оле мнЂ, я и тепер лютЂ уязвляю

Ісуса, мнозством грЂхов моих роспинаю.

О незбожный чловече, що то учинил-єсь.

Не досыть же раз пана грЂхами убил-єсь.

Леч тож и тепер смЂєш дерзостне чинити,

Спасителя своєго смЂєш злостьми бити.




[Душа побожная] 1

Я, грЂшный, признаваю, иж тебе убил-єм,

Тебе, о пане мой, в том гробЂ положил-єм.

Лечь того жалуючи, к тобЂ прибЂгаю,

В твоих пречистых ранах гнЂздо увияю.

Прагну з горячостю там завше почивати,

Крест твой пречестный прагну в руках пЂстовати.




[Душа побожная] 3

(Крест кочет в руки взяти.)

Я той мой клейнот, тую утЂху пріймую,

Стою и до гробу ся моєго готую.




[Душа побожная] 2

(Того ж кочет.)

МнЂ дайте в руки той щит, тую оборону,

Нехай пЂстую тую от всЂх бЂд заслону.




[Душа побожная] 1

(Тримаєт крест моцно в руках.)

Мило ми любо тоє коханьє тримати,

Тоє многоцЂнноє древо лобызати.


(ВсЂ три крест цЂлуют.)


Тебе всЂ, пречестноє древо, лобызаєм,

ТобЂ ся з любовію утЂшне кланяєм.

На тобЂ пригвожденна царя величати,

Не престанемо страсти єго ублажати.

Твои, о Христе-цару, страсти величаєм,

Погребеніє твоє, пане, ублажаєм.

Здар нам бы-смо воскресша тебе оглядали,

УтЂшнои радости миле заживали.

И по смерти при тобЂ здар нам ликовати,

В немерцающем свЂтЂ вЂчне пребывати.



Упованіє спасеніа моєго,

пречиста дЂво!


Обач раны висячого, кров умираючого, цЂну откупуючого, язвы востаючого. Главу маєт преклоненну ку поцЂлованю, сердце отвореноє — ку умилованю, рамени распростертыи — ку объятію, все тЂло выставленноє — ку откупеню.

Тыи всЂ речи, яковыи суть, — уважайте, тыи на шалях сердца вашего завЂсте, абы ввесь на вашом сердцу был завЂшенный, которій ввесь єст для вас на крестЂ повЂшеный.


Августин в КнизЂ о панянствЂ.












ВЂршЂ на радостный день воскресеніа Христа, спасителя нашего



Ангел

Воста нЂст зде. Радуйтеся.


Новину утЂшную, з вЂков жаданую,

От Бога-творца, з давных лЂт обецаную,

Которои всЂ пророци горливе жадали,

Бы єи з утЂхою миле оглядали.

Ото з небесных кгмахов всЂм оповЂдаю,

Ку радости зевнутрней и внутрней взбужаю.

Христос, сын Бога, жива сродзе умерщвленный,

Яко мертвец, в каменном гробЂ положенный.

Дня нынЂшнего з мертвых всесилно повстаєт,

ВсЂх срокгих непріатель славно побЂждаєт.

Радуйся, веселися, христіанскій роде,

Же юж навЂки вЂком будеш жит в свободе.

Радуйся, же суть твои враги побЂжденны,

Зо всей своєй потуги юж суть обнаженны.

Радуйся, же строкгая смерть юж упадаєт,

Діавол трепроклятый моцы позбываєт.

Радуйся, же адскоє панство звоєвано,

Же юж моцныи єго брамы зкгрухотано.

Радуйся, же вЂчной юж збываєш тескницЂ,

З темнопреисподней юж выходиш темницЂ.

Радуйся, же твой запис юж єст пошарпаный,

Который от тебе был діаволу даный.

Радуйся, же за твой грЂх досыт учинено,

Ласку Бога-отца юж тобЂ привернено.

Радуйся, же юж небо отверзтоє маєш,

Же до небесных кгмахов юж дорогу знаєш.

Радуйся, же преславно єст-єсь увелбеный,

ВЂнцем несмертелности навЂки учтеный.

Радуйся, веселися, утЂхи заживай.

Взыгравшися въ духу меліодійне спЂвай.

Христос воскрес из мертвых, Христос триумфуєт,

В безконечный род той потужне царствуєт.

Воскрес Христос из мертвых, всЂм живот даровал,

всЂх непріателей под свою моц зголдовал.




Воскресеніа день просвЂтЂмся людіє:

О новина вдячная, полная радости,

О любая утЂхо, вЂчная сладости.

Христос, сын Бога, жива з мертвых повставаєт,

Народ чловечій вЂчной неволЂ збавляєт.

И хто ж ся з нас не будет миле веселити,

Хто не допоможет нам утЂхи зажити?

Емпирейскоє небо з мЂстца подвигнися,

Над прироженьє твоє моцно порушися.

Кришталныи окажи нам твои сличности,

Заживай веспол з нами любезнои радости.

В подземныи, Титане и ты злотовлосы,

Темныи краи, пусти свЂтло твои косы.

ВеселЂй, яснЂй, ранЂй, з оцеану мора,

Нехай повстаєт твоя пресвЂтлая зора.

В нагороду отмЂны, котрую терпЂл-єсь,

На умерлого пана, кгды смутне смотрил-єсь.

З веселым лицем выступ смЂх в устах маючи,

ВсЂх к радости обфитой миле взбужаючи.

И ты, Луно, крвавого одЂнья позбывши,

В сребросличную шату сличне ся упстривши,

Распущай свЂтлость, нехай темност уступуєт,

В день и ноч радости ся свЂтило знайдуєт.

И ты, оцеанскоє глубокоє море,

Радуйся, выскакуй, прерадост взбійся взгоре.

И вы, земле, каменьє, гойной заживайте

Радости, горких смутков овшеки нехайте.

ВсЂ розныи музики, к нам ся, к нам зберЂте,

Прелюбезнои утЂхи нам допоможЂте,

Орфеє и Аріон, вас к собЂ взываєм,

До нашего веселья и вас запрошаєм.

Стройте цитари, лютнЂ, в арфы миле бійте,

Меліодійными думы нас всЂх веселЂте.

Бійте в лютнЂ а нехай лЂсы выскакуют,

И морскіи делфины при брегу танцуют.

Хоры аггелскіи, и вы к нам завитайте,

И з нами «Христос воскрес» весело спЂвайте.





Отрок 1

О радости богородици.


Ты же, чистаа, красуйся, богородице, о востаніи сына твоєго.


Меліодійный музыку, кролю и пророче,

Мужу по сердцу Божію, небесный отроче,

Обфитою радостю гойне исполнися,

Взыгравшися въ духу, миле веселися.

Пред мысленным кіотом заживай утЂхи,

Бій любезнЂ в арфу для в радости поспЂхи

Ликуй, триумфуй, скачи, бо кіот плЂненный,

Обфитой радости єст ото исполненный.

Ото юж тескливого смутку позбываєт,

Що живо миле єго юж поздоровляєт.

Юж чистая, котрая над всЂх засмущенна,

Острим была копієм сродзе прободенна.

Панна, котрая над всЂх барзЂй ся смущала,

Кгды, видячи мертвого, сама умирала.

ГойнЂйшого веселЂя над всЂх заживаєт,

Обфитшую утЂху над всЂх в сердцу маєт.




[Отрок] 2

Тоєй радости и мы ть, дЂво, помагаєм,

Тебе, матку утЂхи, любезно витаєм.

Радуйся, панно, тобЂ над всЂх ликовати,

Над всЂх ся приналежит тобЂ радовати.

Бо твоя радость ото от гробу повстаєт,

Ввес свЂт тяжкоприкрого смутку позбавляєт,




[Отрок] 3

Радуйся, вмЂстилище, ты-с бовЂм вмЂстила,

З вЂков пожаданого гостя породила.

Ты єго, воскресшого, первЂй оглядаєш,

УтЂхи любезнЂйшей над всЂх заживаєш.




[Отрок] 4

Радуйся, заре солнца, котроє затменьє

УтерпЂло, в смутноє сына погребеньє.

Радуйся, бо аж ввесь свЂт солнце освЂщаєт,

ЗЂло рано променЂ свои роспущаєт.




[Отрок] 5

Радуйся, небо, небес всЂх пространЂйшеє,

И над емпирейскіи кгмахи чистЂйшеє.

Радуйся, бо твой цар, Ад темный, побЂждаєт,

С преславным триумфом нам ото ся являєт.




[Отрок] 6

Радуйся, Діадимо, предвЂчной денницЂ,

Радуйся, вЂнче, в горней увитый винницЂ.

Ты-с бовЂм, панно, слово вЂчноє вЂнчала,

Дня нынЂшнего чести преславной узнала.




[Отрок] 7

Радуйся, вышній троне небесного слова,

На котором почивал предвЂчный Єгова,

Котрій єст-єсь в горніи кгмахи пренесенный,

В емпирейских палацах сличных поставленный.




[Отрок] 8

Радуйся, мосте, котрій до небес провадиш,

На превысоком столку всЂх роскошне садиш.




[Отрок] 9

Радуйся, ЛЂствице, по которой вступуєм

На высоту горнюю, там вЂчне царствуєм.




[Отрок] 10

Радуйся, столпе церкви, которій вспираєш,

Церковь воюючую моцно укрЂпляєш.




[Отрок] 11

Радуйся, пречистаа, живота всЂх мати,

Єдиной ся пристоит тобЂ радовати.




Ангел

Радуйся, кролевая небесного двору,

Радуйся, о царице превышнего хору.

ЧестнЂйшаа херувім гойне веселися

СлавнЂйшая серафим, утЂхи исполнися.

Радуйся, бовЂм твоя радость триумфуєт,

Врагов побЂдивши, сын твой о то ликуєт.




Радость церкви

СвЂтися, свЂтися, новый Ієрусалим, слава-бо Господня на тебЂ восія.


Іастин кролевая, некгдысь ураненна,

Упорною гордостю лютЂ уязвленна.

Корону знагла тратит, панства позбываєт,

Безчестне погоржена от кроля бываєт.

А вмЂсто єи Єсфир корону пріймаєт,

Єсфир возлюбленная преславно царствуєт.

Іастин мысленная ласкою взгордила,

Кроля кролем на себе сродзе образила.

Зачим теж ласку єго знагла утрачаєт,

А праве рабынею юж, юж зоставаєт.

Юж церков законная юж преч уступуєт,

Як раба невдячная безчестно голдуєт.

А вмЂсто єи Єсфир єст коронованна,

Церковь благодатная честію вЂнчанна.

Юж цар царем милости ку ней ураненный,

Упреймою любовью миле уязвленный.

За малжонку охотне собЂ обираєт,

НеотмЂнный на крестЂ шлюб миле пріймаєт,

Который бы могл вЂчне недвижиме трвати,

Ото кровь свою гойне зезволил проляти.

Ото найдорожшою кровью печатлЂєт,

Короною, котрая нЂкгды не звендЂєт.

Ото єи з любовью преславно вЂнчаєт,

Ото для любви ку ней, охотне вмираєт.

Ото от гробу, як от чертога выходит,

На престол славы, єи з триумфом возводит.

Радуйся церкви гойне, гойне веселися,

Гойною утЂхою, гойне исполнися.

Радуйся, же-сь кровью єст єго фундована,

Кровью агньца чистого моцно вкгрунтована.

Радуйся, же-сь силная єсть же побЂдити

ВсЂх врагов, латво можеш внЂвеч роспрошити.

Радуйся и весело не престань волати,

«Христос воскрес из мертвых» радостне спЂвати.




Милосердіє Божіє

Радуйся миле и ты, смертельный чловЂку,

А уваж, що ся стало в том остатнем вЂку.

Як невдячный сын тяжко пред Богом згрЂшил-єсь,

Отца свого любого сродзе образил-єсь.

Годен-єсь, абы твоя памятка знищена,

С книг живота навЂки вЂком выглажена.

Але пан милосердный того понехавши,

Над тобою ся, бЂдным, бозко злитовавши.

Твои грЂхи на себе охотне пріймуєт,

Тебе силный остатнє падлого ратуєт,

Милосердієм знятый незносне страдаєт.

На безчестном дре†для тебе умираєт.

Милосердьє то єго послЂдне знижило,

Подлую чловеченства шату на нь взложило.

Моць милосердя єго всю землю тримаєт,

На милосердю єго моцно ся вспираєт.

Радуйтеся, людіє, в духу возыграйте,

Милосердьє панскоє славно ублажайте.

Радуйтеся, иж Христос от мертвых повстаєт,

Радуйтеся, же з Богом-отцем вас єднаєт.




Милость Божіа

Слово вЂчноє огнем милости зраненно

Ку чловеку, а праве лють уязвленно.

Бога-отца хотячи годне ублагати,

Долг от чловека винный достойне отдати.

В шату ся чловеченства рабско одЂваєт,

Кровь пренайдорожшую гойне проливаєт.

Радуйся, о чловече, же тя обточила

Милость слова вЂчного ласкою прикрила.

Радуйся, же-сь єст честно славно вознесенный,

БезцЂнною цЂною любо откупленный.

Радуйся, а взаємне огнем роспалися

Милости к Богу, в духу миле веселися.

Старайся єго любовь в памяти носити,

Душевную офЂру сердечне чинити.




Розум

Розумом чловек єст гойне учтеный,

Над аггелы щось ледво умаленный.

От быдлят єго розум разрозняєт,

Розум єго мысль ку Богу вперяєт.

Розум то значне, явне оказуєт,

Иж кождый слуга панови голдуєт.

Створеньє творца иж маєт велбити,

В памяти єго ласку обносити.

Бог для нас умер, єст ласка обфитая,

Ласка то свыше єст знаменитая.

Тую пристоит завше памятати,

И добродЂйства єго уважати.




Память

Пристоит то заисте памяти чинити,

Внутр себе страсти Христовы выразити.

Толко нехай в том воля розуму слухаєт.

Различных фарб охотне нехай додаваєт.

Треба чирвоной любви, зеленой красоты,

Чорной покори, бЂлой внутрнеи чистоты.

О пендзель ласки Божей, треба ся старати.

И так страсти Христовы всЂ обмалевати.




Воля

И Воля маєт на том же престати,

Розумови в том маєт голдовати.




Память

Воля з розумом нехай ся злучаєт,

Нехай памяти з хутю помагаєт.




Воля

Воля на том,




Память

А память простираєт

Руки,




Розум

Сам розум за майстра бываєт.

Знак то єст добрій, можем подолати,

Толко ж вдячности фарб треба додавати.




Воля

Тых досыть, может спотребу тых стати,




Розум

Просто пристоит пендзлем керовати.

Добре єст, значне, пьєнкне выраженный,

Нехай же єще будет покощенный.

Любве покосту обфите додати

Треба, абы ся могл полысковати.




Память

В памяти, о чловече, пристоит носити

Муки Христовы, тыми завше ся щитити.

Оглашай, иж от него єст-єсь увельбенный,

Шатою несмертелности сличне приодЂнный.

Триумф єго опЂвай, а миле волати,

«Христос воскрес из мертвых» не престань спЂвати.




Звитязство

ВсЂ смутки, всЂ скорби преч от нас отступЂте,

К нам ся всЂ радости, всЂ веселья зберЂте.

Бо гойне утЂха нас ото обыймуєт.

Кгды пан над паны, и цар над цары кролюєт.

Ото триумф на свЂтЂ нЂгды не слыханый,

Триумф здавна от продков миле пожаданый.

Церковь матка утЂшне з весельєм празднуєт,

На що смотрячи, и хор аггелскій ликуєт.

Ото монарха свЂта потычку сточивши.

Непріателей срокгих срокго роспрошивши.

Яко потужный гетман мужнє побЂждаєт,

На знак звитязства, тую хоругов выставляєт.

Под тую ж всЂ охотне миле ся зберите,

З утЂшным сердцем гойной радости зажите.




Триумф

Ово славный звитязца, славне триумфуєт,

На триумфалном возЂ весело ликуєт.

Ово три тираннове лежат уязвленны,

Зо всей своєй потуги внЂвеч обнаженны.

Ово цар царем смертю смерть силно зголдовал,

Нам об умерлым живот навЂки даровал.

Ово діавол, котрій, яко лев рыкаєт,

Кгды бЂдного чловека поглотит шукаєт.

Лежит праве бездушный, лежит потужне скремпованый,

Мысленный гигант лежит, потужне звязаный.

Ото ад темный внЂвеч силне зкгрухотавши,

ВсЂ моцныи фортеци з землею зровнавши.

Вязней долго триманых с пащек выриваєт,

С подземнои темницЂ вЂчне свобождаєт.

Ото монарха вЂчный всЂх врагов крепуєт,

Ото, яко звитязца, славне триумфуєт.

Ото трофеа єго всЂм нам выставляєт,

Церков матка к радости всЂх нас побужаєт.




Крест

Ово ключ Давидов, тым небо отверзено,

Ово махина, тою пекло превернено.

Ово лЂствица тая до неба провадит,

В превышних горних кгмахах безконечне садит,

Ово мост, през которій єсте-смо введены

До обецанной землЂ, и там вкоренены.

Ово меч, которим єст Голіад зраненый,

Трепроклятый діавол вЂчне умерщвленный.

Ово оружьє тоє врага побЂдило,

Непріателя всЂх нас вЂчне умертвило.

Ово древо, котроє проклятством бывало,

Благословенством вЂчным ото ся юж стало.

Ово древо, котроє нас возвеличило,

Неволников свободы вЂчной набавило.

Древо, котороє єст славне увельбено,

Кровыю чистого агнца гойне покроплено.

Радуйся, о чловече, же-сь єст увелбеный,

Же-сь тым древом с тяжкого рову поднесеный.

Радуйся, и не престань весело волати,

Триумфалнои пЂсни не престань спЂвати.




Копіє

Ово трофеум, котрим смерть єст уязвленна,

Ядовитая Парка сродзе умерщвленна.

Копіє, Голіад єст котрим ураненый,

Діавол трепроклятый внЂвеч оберненый.

Копіє, котроє бок пану отворило,

През рочистоє окно аж к сердцу вчинило,

През котороє можем латво оглядати,

Якою милостю пан рачил к нам палати.

О копіє, ты в церкви вЂчне пребываєш,

Ты непріатель наших завше побЂждаєш,

Тобою діаволскіи полки прогоняєм,

През тебе преславноє звитязство мЂваєм.

Радуйся, чловече, же-сь єсть вооруженный,

Так славными арматы моцно узброєнный.

Радуйся прелюбезне, гойне веселися,

Тым оружієм завше утЂшне щитися.




Трость

Ото трость, котрою єст діавол попраный

Смерть срокгая, Ад темный, внЂвеч звоєваный.

Трость, которою грЂх наш незбедный змазано,

А вЂчную свободу вЂчне подписано,

На котрую з любою радостю взираєм,

И тую з утЂхою миле лобызаєм.




Гвоздіє

Ово гвоздіє, тыми дьавол пригвожденный,

Яд окрутнои смерти внЂвеч оберненный.

Тыи вЂчной туги ад темный набавили,

Нам вЂчноє спасеньє навЂки справили.

Тыи тяжкіи грЂхи нашЂ пригвоздили,

Проклятство наше внЂвеч з кгрунту вынищили.

То сличныи клейноты, то церкви красота,

То благовЂрным царем любая лЂпота.

Тыми ся христіане утЂшне щитили,

Тыи в коронах своих любезне носили,

Тыи не преставаймо и тепер велбити,

Тыми ся як сличными, клейноты здобити.

Тыи трофеа завше в сердцу обносЂмо,

Тыми ся з усердієм пред всЂми хвалЂмо.




Ангел

Радостію ж, чловече, гойне исполнися,

Миле триумфуючи, миле веселися.

Радуйся и трофеа тыи ублажати,

Не престань воскресшаго пана величати.




Отрок 1

Тыи знаки звитязства в духу ублажаєм,

Воскресшого Ісуса славно величаєм.

Єму пристойный поклон вЂчне отдавати,

Не престанем востаньє єго прославляти.

Воскресеніє твоє, творче, ублажаєм,

Триумфалныи гимны весело спЂваєм.

Христос воскрес из мертвых, живот нам даровал,

Непріатель срокгих под моц свою зголдовал.




Розныи отрочата

Христос воскрес из мертвых, то й нехай царствуєт,

Щасливыи Жикгмунту-кролю дни даруєт,

Сенатором — пораду, потугу — рыцерству,

Мужност, силу, побЂду — славному жолнерству,

Побожных пастырей рач здоровых ховати,

Долгоденственных, пане, рач нам даровати.

Союз братства от тебе нехай поспЂх маєт,

Во всем благим помочи с небеси уживаєт.

ВсЂм ктитором церкве, рач ласку оказати,

Живым — здоровьє, всопшим — вЂчный покой дати.

ВсЂх под кровом крил ховай, всЂ нехай узнают

Твоєй ласки, всЂ тебе вЂчне ублажают.

ВсЂм дай, бы тебе — пасху — в небЂ оглядали,

За столом твоим вЂчной пасхи заживали.


Упованіє спасеніа моєго,

пречистая дЂво!











ПРИМІТКИ


Йоаникій Волкович


Иоаникій Волкович — православний чернець, діяч Львівського братства. Роки народження і смерті не відомі. У 1630 — 1631 рр. священик і проповідник у львівській братській церкві Успіння Богородиці, вчитель школи Львівського братства. Автор декламації «Розмышлян [н] є о муцЂ Христа, спасителя нашего» («Смутныи трены в смутный день страстей Христа, спасителя нашего» і «ВЂршЂ на радостный день воскресенія Христа, спасителя нашего»).



Розмышлян[н]є о муцЂ Христа, спасителя нашего. При тым веселая радость з триумфалного єго воскресеніа. ВЂршами напысаныи през многогрЂш-ного инока Иоаникіа Волковича, проповЂдника слова Божого, и в Льво†при церкви братской Успеніа Пречистыя ДЂвы Маріа, през отрочат отпровованыи. Там же за благословенієм ero милости преподобнЂйшого отца Кир Петра Могилы, воєводича земль молдавских, великого архімандрита кієвопечерского до друку поданым року от рождества Христова 1631. — Львів, друкарня Братства, 1631, 31 арк. (Запаско, Ісаєвич, № 219.)

Публікація: Возняк М. Діалог Йоаникія Волковича з 1631 р. // ЗНТШ — 1920. — Т. 129. — С. 33 — 79.

Подається за першодруком (примірник ЛМУМ і ЛІМ).
















Див. також:

«Размышлян’є о муцЂ Іоаникіа Волковича». Хрестоматія давньої української літератури О.Білецького.











Попередня     Головна     Наступна


Етимологія та історія української мови:

Датчанин:   В основі української назви датчани лежить долучення староукраїнської книжності до європейського контексту, до грецькомовної і латинськомовної науки. Саме із західних джерел прийшла -т- основи. І коли наші сучасники вживають назв датський, датчанин, то, навіть не здогадуючись, ступають по слідах, прокладених півтисячоліття тому предками, які перебували у великій європейській культурній спільноті. . . . )



 


Якщо помітили помилку набору на цiй сторiнцi, видiлiть ціле слово мишкою та натисніть Ctrl+Enter.

Iзборник. Історія України IX-XVIII ст.